Lipuzo Ze Zwa kwa Babali

Kana Abele n’a ziba kuli ne ku tokwahala sitabelo sa folofolo kuli a shemubwe ki Mulimu?

Taba ya mwa Bibele ye bulela za bo Kaine ni Abele ha ba eza matabelo ki ye kuswani hahulu. Kwa Genese 4:3-5, lu bala kuli: “Ha ku nze ku ya, Kaine a tiseza [Muñ’a] Bupilo nubu ya lico ze beilwe ki mubu. Abele ni yena a mu tiseza ku za maizibulo a mitapi ya hae ni mafula a zona. [Muñ’a] Bupilo a talima Abele ni nubu ya hae; kono h’a si ka talima Kaine ni nubu ya hae.”

Bibele ha ku na fo i bulela za kuli pili kezahalo yeo i si ka ezahala Jehova na s’a tungunyuzi kale za matabelo kamba ku talusa mufuta wa matabelo a n’a kona ku amuhela. Kacwalo, ku bonahala kuli bo Kaine ni Abele ne ba iketezi fela matabelo a ku fa. Ne ba tibezwi ku kena mwa lihae la pili la bashemi ba bona la Paradaisi; ne ba kalisize ku ikutwela ze zwa mwa sibi; mi ne ba kauhani ni Mulimu. Ka ku ba kuli ne ba na ni sibi ni matomola, ku lukela ku ba kuli ne ba iponezi luli libaka la ku bata tuso ku Mulimu. Ku fa mpo ku Mulimu i swanela ku ba kezo ye ne ba ezize ka ku itatela ilikuli ba shemubiwe ki Yena.

Se ne si ezahalile kikuli, Mulimu n’a amuhezi sitabelo sa Abele kono isi sa Kaine. Kabakalañi? Kana ki kabakala kuli Abele n’a file limpo ze swanela mi Kaine yena n’a si ka eza cwalo? Ha lu na buniti bwa kuli mufuta wa mpo ne u si wa butokwa, kakuli mwa bubeli bwa bona ha ku na ya n’a bulelezwi mufuta wa limpo ze amuheleha ni ze sa amuhelehi. Niteñi, ku swanela ku ba kuli limpo zeo kaufela ne li amuheleha. Mwa Mulao w’o Jehova n’a file sicaba sa Isilaele hasamulaho, matabelo a n’a amuheleha n’e si fela a lifolofolo kamba lilama ze ñwi za folofolo; ne a kopanyeleza ni bubeke bo bu halikilwe, makunka a mabele, bupi bo bu nekile, lico ze besizwe, ni veine. (Livitike 6:19-23; 7:11-13; 23:10-13) Ku bonahala kuli n’e si fela mufuta wa matabelo a bo Kaine ni Abele o n’o tahisize kuli Mulimu a amuhele sitabelo se siñwi ni ku hana se siñwi.—Mu bapanye Isaya 1:11; Amosi 5:22.

Hamulaho wa lilimo ze likiti-kiti, muapositola Paulusi n’a ize: “Ka tumelo, Abele u tahisize fapil’a Mulimu sitabelo se si fita sa Kaine; mi kabakala tumelo, u pakilwe kuli ki ya lukile, kakuli Mulimu u pakile limpo za hae.” (Maheberu 11:4) Kacwalo, n’e li kabakala tumelo Abele ha n’a bonwi ku luka ki Mulimu. Kono Abele n’a lumela mwañi? N’a lumela mwa sepiso ya Jehova ya kuli n’a ka tahisa Peu, ye n’e ka ‘pyata toho ya noha’ ni ku tahisa sinca kozo ni bupetehi b’o batu ne ba na ni bona kwa makalelo. Ku zwelela kwa pulelo ya kuli Peu yeo ne i ka ‘lumiwa kwa lisito,’ Abele n’a kana a nahanile kuli ne ku tokwahala sitabelo se si ama ku sulula mali. (Genese 3:15) Kono niti ki ya kuli, ne li tumelo ya Abele ye n’e tahisize kuli sa hae ibe “sitabelo se si fita sa Kaine.”

Ka nzila ye swana, Kaine n’a hanilwe, isi kabakala kuli n’a file sitabelo se si fosahalile, kono kabakala kuli n’a si na tumelo, ili nto ya n’a bonisize ka likezo za hae. Jehova n’a bulelezi Kaine patalaza a li: “Ha u eza hande, kana u si ke wa lumelelwa?” (Genese 4:7) Mulimu n’a si ka hana Kaine kabakala ku nyazahala kwa mpo ya hae. Kono libaka Mulimu ha n’a hanile Kaine “kikuli misebezi ya hae ne li ye maswe”; n’a i bonahalisize ka muna, sitoyo, mane ni bubulai.—1 Joani 3:12.