Ba Tabile ku Ituta ku Bala!

MWA likalulo ze ñwi za Solomon Islands, buñata bwa bao cwale se li Lipaki za Jehova ba lwanisize butata bwa ku sa ziba ku bala. Kabakaleo, ku ba bezi t’ata ku abananga kwa mikopano ya puteho ya ka viki mi hape ku ba tatafaliselize hahulu ku luta ba bañwi litaba za Mubuso. Kana luli kwa konahala kuli ba bahulu, bao ba sa li ku simwa ba swale potoloto, ba zibe ku bala?

Buka ye bizwa Mu Itute ku Bala ni ku Ñola, ye hasanyizwe ki Lipaki za Jehova, se i itusisizwe mwa litopa za ku ituta ku bala ibat’o ba mwa puteho ni puteho ya Lipaki za Jehova kai ni kai mwa Solomon Islands. Litaba ze latelela li bonisa m’o mianda-nda ya batu ba tuselizwe hahulu ki tukiso yeo. Sa butokwa ni ku fita, ku ituta ku bala ku ba konisize ku fa hande bupaki ka za tumelo ya bona.—1 Pitrosi 3:15.

Mulumiwa ya n’a lumezwi kwa puteho ye na ni bahasanyi ba Mubuso ba ba fitelela mwanda n’a lemuhile kuli kwa tuto ya Bibele ya ka viki ye eziwa ka Tora ya ku Libelela, ki ba sikai be ne ba na ni kopi ya bona ya magazini yeo mi be ne ba alabanga ne li ba sikai ni ku fita. Libaka? Ku sa ziba ku bala. Puteho ha ne i zibisize za ku tomwa kwa sikolo sa ku ituta ku bala ni ku ñola, mulumiwa y’o a ifana ka tabo ku ba muluti. Kwa makalelo, ki baituti fela ba sikai be ne ba tahanga, kono hañihañi kwa kala ku tahanga batu ba ba fitelela 40 ba lilimo kaufela za buhulu.

Ne ku zwile siselo sifi? Mulumiwa y’o u kandeka kuli: “Sitopa sa ku ituta ku bala ha ne si sa kala-kala fela, na ya kwa musika ka 6 kiloko ya kakusasana ku y’o leka lico za kwa lihae la balumiwa. Kwateñi na bona ba bañwi ba baituti, mane ni twanana-nana, inze ba lekisa misheke ya koko ni miloho. Libaka? Kakuli ne ba bata mali a ku leka siñoliso ni buka za ku itusisa mwa sitopa sa ku ituta ku bala ni ku ñola!  Hape, ku banga mwa sitopa seo ne ku ba susuelize ku ba ni kopi ya bona ya Tora ya ku Libelela.” U ekeza kuli: “Cwale ka nako ya tuto ya puteho ya Tora ya ku Libelela, banana hamoho ni ba bahulu ba alabanga, mi lipuhisano za luna li banga ze tabisa.” Mulumiwa y’o n’a tabile hahulu ba bane mwa sitopa ha ne ba kupile kuli ba zwelange mwa musebezi wa ku kutaza nyangela kakuli kuti ne ba “tuhezi ku saba.”

Tuso ye ba fumani baituti mwa likolo zeo ha i si ka ba fela ya ku ituta ku bala ni ku ñola. Ka mutala, ka lilimo-limo musali ya si mulumeli ili y’o munn’a hae ki Paki, n’a bilaeza hahulu puteho. N’a posanga batu macwe ba sa mu foseza nihaiba hanyinyani fela mi mane n’a lwanisanga basali ba bañwi ka kota. Musali y’o ha n’a yanga fokuñwi kwa mikopano ya Sikreste ni munn’a hae, n’a ezanga hahulu lifufa kuli mane wa munna a kala ku tinanga mangilasi a mansu ilikuli musali y’o a si ke a mu tameleza kuli n’a talima basali ba bañwi.

Kono likolo zeo za ku ituta ku bala ni ku ñola li sa kala-kala fela, musali yo a buzeza mwatasi kuli: “Kana na kona ku kena mwa sitopa ni na?” Kalabo ne li ee. Ku zwelela onaf’o, n’a sa tondahali mwa sitopa kamba kwa mikopano ya puteho. N’a ikatalize hahulu ku ituta ku bala mi a eza zwelopili ye komokisa, ili nto ye ne i mu nyakalalisize hahulu. Kupo ya hae ye n’e tatami ne li kuli: “Kana na kona ku fiwa tuto ya Bibele?” Munn’a hae, ka tabo, a kala ku ituta ni yena, mi u sa eza zwelopili mwa ku bala ni ku ñola ni mwa zibo ya hae ya Bibele.

Ku mutu wa lilimo ze 50 y’o ya sa li ku ba a swale potoloto, ku swala fela siñoliso ni ku ñola litaku za mwa sipeleta i kona ku ba nto ye t’ata hahulu. Ba bañwi ba banga ni matutwa kwa minwana ya bona kabakala ku fwañata hahulu potoloto ni pampili mwa mihato ya pili ya tuto. Hamulaho wa ku lwana ka liviki-viki ku swala hande potoloto, baituti ba bañwi ba makala inze ba menya-menya, kuli: “Ha, se ni kona ku ñola ka bunolo fa pampili!” Ku bona zwelopili ya baituti ku nyakalalisanga hahulu ni baluti. Muluti yo muñwi n’a ize: “Ku luta sitopa ku tabisa hahulu, mi buitumelo bwa baituti bo bu zwelela kwa pilu kabakala tukiso ya Jehova yeo hañata ba bu bonisanga ka ku kwashela kwa mafelelezo a sitopa.”

Lipaki bao be se ba ziba ku bala ni ku ñola ni bona ba nyakalala sina balumiwa. Libaka? Kakuli cwale se ba kona ku lumbeka Jehova ka zibo ya bona ya ku bala ni ku ñola.

[Maswaniso a fa likepe 8, 9]

Banana hamoho ni ba bahulu ba itebuha litopa za ku ituta ku bala ni ku ñola