“Kana Mwa Ziba Libaka Ha Ni Mi Kutiseza Mali a Mina?”

‘HAKI mo ni tokwela mali,’ ki mona mwa n’a hupulezi Nana cwalo, me wa likwasha wa bana ba balalu ya pila mwa Kaspi, kwa Republic of Georgia. Muta o muñwi kakusasana, a fumana mali ka mwa n’a lakalelize. N’a itopezi mali a’ eza 300 lari bukaufi ni polisi. Ne ku si na mutu fakaufi. Pene yeo ne li ye tunanyana. Mane, lilimo ze ketalizoho ku zwela f’o lari ne i ezizwe yona mali a naha, ne li lona lwa pili ku Nana ku bona pene ya pepa ya 100 lari. Ba pisinisi ba mwa silalanda seo ne ba si ke ba panga mali a’ kuma f’o ni ha ne ba ka ipulukusha ka lilimo li sikai.

Nana a singanyeka, a li: ‘Ni tokwelañi mali a, kakuli tumelo ya ka, sabo ya Mulimu, ni buiketo bwa ka bwa kwa moya li ka ni yubeka?’ N’a satalalile ku ba ni mikwa yeo ya Sikreste, mane ni ku nyandela ha butuku tumelo ya hae ni ku lindaulelwa yona.

H’a ya kwa polisi, Nana a bona mapokola ba ketalizoho inze ba fufulezwi ku bata nto ye ñwi. A lemuha kuli ne ba futoka mali ao, mi a ya ku bona, a li: “Ku na ni nto ye mu latile nji?”

Ba alaba, ba li: “Ki mali.”

“Ne li bukai?”

“300 lari!”

Nana a li: “Ni nopile mali a mina.” Kihona a ba buza kuli: “Kana mwa ziba libaka ha ni mi kutiseza mali a mina?” Ne ba sa zibi.

Nana a zwelapili a li: “Kakuli ni yo muñwi wa Lipaki za Jehova. Kambesi cwalo, ne ni si ke na mi kutiseza mali a mina.”

Nduna wa mapokola ya n’a latehezwi ki mali ao a tambeka Nana 20 lari ka ku itumela busepahali bwa hae.

Taba yeo ya hasana inge lubya mwa sikiliti kaufela sa Kaspi. Habusa, musali wa mukenisi ya n’a zwa kwa polisi a bulelela Nana a li: “[Nduna] kamita u bulukanga lihatiso za mina mwa ofisi ya hae. Cwale mwendi u ka li tabela hahulu ni ku fita.” Mupokola yo muñwi mane n’a ize: “Kambe batu kaufela ki Lipaki za Jehova, ki mañi ya n’a ka lobanga mulao?”