Lipuzo Ze Zwa kwa Babali

Mañolo a fa likuka mañi ze ama tuto ya bana haiba kwa bashemi ki a li muñwi fela ya li yo muñwi wa Lipaki za Jehova?

Mwa Mañolo, mushemi ya li Paki ili ya nyalani ni mutu ya si Paki u filwe teñi likuka ze peli za butokwa ze li lumonyi lo lu bonisa za tuto ya bana. Sikuka sa pili ki se: “Ki swanelo kuli lu utwe Mulimu ku fita batu.” (Likezo 5:29) Sa bubeli ki se: “Munna ki toho ya musali, sina Kreste h’a li toho ya Keleke.” (Maefese 5:23) Sikuka sa bubeli seo si ama ni basali bao munn’a bona a si Paki, ha si ami fela ba ba nyezwi ki Paki. (1 Pitrosi 3:1) Mushemi ya li Paki u kona ku likanyeza cwañi likuka zeo h’a luta bana ba hae?

Haiba munna ki yo muñwi wa Lipaki za Jehova, ki buikalabelo bwa hae ku tokomela lubasi ku za bulapeli ni za kwa mubili. (1 Timotea 5:8) Me ya si mulumeli niha n’a ka tola nako ye telele ni bana, ndate ya li Paki u swanela ku luta bana ba hae ka ku ba fa lituto za bulapeli kwa ndu ni ka ku ya ni bona kwa mikopano ya Sikreste. Teñi k’o, ba ka ba mwa sango se sinde mi ba ka fiwa lituto za mupilelo o munde.

Ku cwañi haiba musal’a hae ya si Paki a pihelela ku isa bana kw’a lapela kamba ku ba luta litumelo za hae? Mulao wa naha mwendi u mu fa tukelo ya ku eza cwalo. Ka za haiba bana ba ka kukuezwa ku kena mwa likezo za bulapeli kwa libaka ze cwalo ku kana kwa itinga hahulu ka za m’o ndat’a bona a ba lutela lituto za bulapeli. Bana ha ba nze ba hula, tuto ya Mañolo y’a ba luta ndat’a bona i swanela ku ba tusa ku latelela niti ye mwa Linzwi la Mulimu. Ndate wa mulumeli n’a ka taba hakalo bana ba hae ha ne ba ka yemela bulapeli bwa niti!

Haiba me ki yo muñwi wa Lipaki za Jehova, u na ni ku kuteka sikuka sa butoho h’a nze a iyakatwa za buiketo bwa ku ya ku ile bwa bana ba hae. (1 Makorinte 11:3) Hañata, munna ya si mulumeli h’a na ku bilaela musal’a hae ya li Paki h’a ka luta bana za muzamao ni bulapeli, mi tuso ya ku eza cwalo i teñi kwa mikopano ya batu ba Jehova. Me wa kona ku tusa munn’a hae ku bona lituso za tuto ye nde ye ba fiwa bana mwa kopano ya Jehova. Wa kona ku koñomeka ka maseme bunde bwa ku suña likuka za Bibele za muzamao mwa lipilu za bana ba bona, ka ku ba kuli ba pila mwa lifasi m’o mizamao i ya i sitana hahulu.

Kono munna ya si mulumeli a kana a ñañelela kuli bana ba hae ba lapele kw’a lapela yena, ili ku ba isa kwa keleke ya hae ni ku ba luta lituto za bulapeli ka ku ya ka tumelo ya hae. Kamba mwendi munna a kana a hanyeza bulapeli kaufela ni ku itakata kuli bana ba hae ba si ke ba ituta za bulapeli. Ka ku ba toho ya lubasi, ki yena sihulu ya na ni tukelo ya ku eza katulo yeo. *

Hailif’o wa kuteka situlo sa munn’a hae sa ku ba toho, ka ku ba Mukreste ya ineezi, musali ya li Paki n’a ka hupula moya o ne ba na ni ona baapositola bo Pitrosi ni Joani, be ne ba ize: “Luna ha lu koni ku sa bulela ze lu boni, ni ze  lu utwile.” (Likezo 4:19, 20) Kabakala ku iyakatwa buiketo bwa kwa moya bwa bana, me ya li Paki u ka fumananga kolo ya ku ba eleza ka za mwa ku pilela. U na ni buikalabelo fapil’a Jehova bwa ku luta ba bañwi z’a ziba kuli ki za niti, mi h’a swaneli ku libala bana ba hae. (Liproverbia 1:8; Mateu 28:19, 20) Me ya li Paki u kona ku eza cwañi h’a li mwa singanyenganye seo?

Mu nge ka mutala taba ya tumelo ku Mulimu. Musali ya li Paki mwendi h’a koni ku tomahanya ku ituta Bibele ni bana ba hae bakeñisa likaniso za munn’a hae. Kana libaka leo li swanela ku mu tibela ku taluseza bana ba hae nto ifi kamba ifi ka za Jehova? Batili. Lipulelo ni likezo za hae kaniti ne li ka bonisa kuli u na ni tumelo ku Mubupi. Mwendi bana ba hae ne ba ka ba ni lipuzo fa taba yeo. Kabakala tukuluho ya hae ku za bulapeli, a ikutwe ku lukuluha ku taluseza batu za tumelo ya hae ku Mubupi, ili ku i taluseza ni bana ba hae. Niha ne ku si ke kwa konahala ku zamaisa tuto ya Bibele kwa bana ba hae kamba ku yanga ni bona kamita kwa mikopano, wa kona ku ba taluseza ka za Jehova Mulimu.—Deuteronoma 6:7.

Ka za swalisano ye mwahal’a Paki ni ya si Paki, muapositola Paulusi n’a ñozi kuli: “Munna ya sa lumeli u keniswa ki musali ya lumezi, mi musali ya sa lumeli u keniswa ki munna ya lumezi; kabesi cwalo, kabe bana ba mina ki ba ba masila; kanti cwale ki ba ba kenile.” (1 Makorinte 7:14) Jehova u nga kuli linyalo leo li kenile kabakala mulumeli, mi Jehova u nga bana ku ba ba ba kenile. Musali ya li Paki u swanela ku ikataza mw’a konela kaufela ku tusa bana ba hae ku utwisisa niti, ili ku siyela Jehova mafelelezo a’ ka zwa mwateñi.

Bana ha ba nze ba nonoboka, ba na ni ku iketela za ku eza ka ku ya ka litaba ze ba ba file bashemi ba bona. Ba kana ba iketela ku eza ka ku ya ka manzwi a Jesu, a’ li: “Ya lata ndat’ahe, kamba m’ahe ku fita mw’a ni latela, h’a ni swaneli.” (Mateu 10:37) Hape ba laezwi kuli: “Bana, mu utwe bashemi ba mina ku Mulena, kakuli ki tukelo.” (Maefese 6:1) Mikulwani ba bañata ba ketanga ku ‘utwa Mulimu’ ku fita mushemi ya si Paki, ni ha ba nyandiswa ki mushemi y’o. Neikaba mupuzo o munde ku mushemi ya li Paki bana ba hae ha ne ba ka iketela ku sebeleza Jehova ku si na taba ni ku hanyezwa!

[Litaluso za kwatasi]