“Mu Swalelane”

KANA mwa lumela kuli Mulimu u swalezi libi za mina? Mwa United States, ku bonahala kuli buñata bwa ba bahulu b’a lumela cwalo. Dr. Loren Toussaint, ya n’a kalile patisiso ye n’e ezizwe fa University of Michigan Institute for Social Research, u biha kuli ha ne ku buzizwe batu ba 1,423 ba ba pila kwa America, ne ku fumanehile kuli ibat’o ba b’a 1,138 ku ba bahulu ba ba fitelezi lilimo ze 45 ne ba bulezi kuli Mulimu u swalezi libi za bona.

Kono kwa komokisa kuli ku bao be ne ba buzizwe kaufela, ibat’o ba b’a 810 fela be ne ba ize ni bona b’a swalelanga ba bañwi. Lipalo zeo li lu hupulisa manzwi a Jesu mwa Ngambolo ya fa Lilundu, a’ li: “Ha mu swalela batu lifoso za bona, Ndat’a mina ya kwa lihalimu u ka mi swalela ni mina. Kono ha mu sa swaleli batu lifoso za bona, Ndat’a mina ni Yena h’a na ku mi swalela lifoso za mina.” (Mateu 6:14, 15) Ee, kuli Mulimu a swalele libi za luna, se siñwi sa lika ze lu swanela ku eza kikuli ni luna lu itatele ku swalela ba bañwi.

Muapositola Paulusi n’a hupulisize Bakreste ba kwa Kolose ka za sikuka seo. N’a ba elelize kuli: “Mu ezane hande, mi mutu h’a na ni s’a tongoka yo muñwi, mu swalelane; sina Kreste h’a mi swalezi, mu eze cwalo ni mina.” (Makolose 3:13) Ki niti, ku swalela haki kamita ku li ko ku bunolo. Ka mutala, haiba mu bulelelwa manzwi a si ka nahanisiswa hande kamba a’ bukiti, ku kona ku mi bela t’ata kuli mu zwise fela pilu kwateñi.

Niteñi, mwa ku swalela ba bañwi ku na ni lituso ze ñata. Dr. David R. Williams, caziba wa za mipilelo ya batu, n’a bulezi ka ku ama kwa patisiso ya hae a li: “Lu fumani kuli buiketo bwa munahano wa ma-America ba ba hulile ni basupali bu amiwa hahulu ki ku swalela ba bañwi kwa bona.” Seo si lumelelana ni manzwi a Mulena Salumoni, y’a butali, ya n’a ñozi lilimo ze bat’o eza 3,000 kwamulaho kuli: “Pilu ye sweu i pilisa mubili.” (Liproverbia 14:30) Bakeñisa kuli moya wa ku swalela u hulisa silikani se sinde ni Mulimu ni batu ba bañwi, lwa swanela luli ku tabela ku swalelana ku zwelela kwa pilu.—Mateu 18:35.