Kana Mwa Swanela ku Ba Ba Ba Iketile?

BUÑATA bwa batu mwendi ne ba ka ikutwa kuli b’a babazwa ha ne ba ka ngiwa kuli ba iketile, ki ba mombecima, ki libombolwa, ba ba lumelela lika kaufela. Kono ku na ni nto ye ñwi ye ama ku iketa. Bibele i li: “Buiketo bwa matanya bu ka ba sinyeza.” (Liproverbia 1:32) Taba yeo i talusañi?

Fo ku bulezwi “buiketo,” Libibele ze ñwi li toloka linzwi la Siheberu la kwa makalelo ka manzwi a’ cwale ka “likesha hahulu” (American Standard Version), “ku ishefula” (The New American Bible), ni “ku sa isa pilu kwa lika.” (The New English Bible) Ka taluso yeo, buiketo bu balelwa kwa buzwa ni ku isa lika mwa lishea hahulu mi kacwalo ni kwa butanya kamba bukuba.

Mwa linako za baapositola, Bakreste ba mwa puteho ya mwa Laodisea, ka likesha, ne ba si ka lemuha kamba ku isa pilu kwa bufokoli bwa bona bwa kwa moya. Ne ba itumba ka likesha hahulu kuli “ha ku na se [lu] tokwa.” Jesu Kreste n’a ba hakuluzi, a ba eleza kuli ba zusuluse tukufalelo ya bona ku za Sikreste.—Sinulo 3:14-19.

Mukwa wa batu ba mwa linako za Nuwe ni ona ne li wa ku sa isa pilu kwa lika. Ne ba patehisizwe hahulu ki ku ikola lika za mwa bupilo, mi “ne ba ca, ba nwa, ba nyala, ba nyalisa, . . . ha ba si ka lemuha se siñwi, mane munda wa kena, mi wa ba kukisa kaufela.” Ku tuha f’o Jesu a li: “Ku ka ba cwalo h’a ka taha Mwan’a mutu.”—Mateu 24:37-39.

Bupolofita bwa Bibele bo bu talelelizwe bu bonisa kuli lu pila mwa nako y’a “ka taha Mwan’a mutu,” Jesu Kreste. Haike lu pime likesha, ku isa lika mwa lishea, ni bupilo bwa ku ishefula hahulu—bona buiketo bo bu sa lukeli.—Luka 21:29-36.