Ku Omba-Ombiwa ki Zibo Ye Nepahezi ya Mulimu

KU BA bañwi, litaba ze mwa Bibele ze ama lilato la Mulimu ni sishemo sa hae li zusa lipuzo ze zinga. Ba buza kuli: Haiba Mulimu u bata ku feza bumaswe, mi w’a ziba mwa ku bu feleza, mi u na ni m’ata a ku eza cwalo, ki kabakalañi bumaswe ha bu sa ekezeha? Ku bona, litaba ze talu ze, ha li lumelelani, za kuli: (1) Mulimu u na ni m’ata a matuna ka ku fitisisa; (2) Mulimu u na ni lilato mi ki yo munde; ni (3) likozi li sa zwelapili ku ezahala. Ba talusa kuli, bakeñisa kuli taba ya bulalu yeo ki ya niti fo ku si na likañi, f’ohe niheba i liñwi fela kwa litaba ze peli ze siyezi kuti haki ya niti. B’a nga kuli Mulimu h’a koni ku feza bumaswe kamba h’a na taba ni ze ezahala.

Mazazi a sikai hamulaho wa ku sinyiwa kwa miyaho ya World Trade Center mwa New York, mueteleli yo muñwi wa bulapeli y’a tumile wa kwa United States n’a ize: “Mwa bupilo bwa ka se ni buzizwe . . . hañata-ñata ka za libaka Mulimu h’a tuhelela likozi ni manyando. Ku bulela fela niti, ha ni na hande kalabo, mane ni sa tokwa ku ziba ni na.”

Ka ku ama kwa manzwi ao, caziba yo muñwi wa tuto ya za bulapeli n’a ñozi kuli n’a tabisizwe ki “tuto ye nde ya za bulapeli” ya n’a kutalize mueteleli wa bulapeli y’o. Hape n’a lumezi mubonelo wa caziba yo muñwi ya n’a ñozi kuli: “Ku sa utwisiseha kwa manyando ki nzila ye ñwi ya ku sa utwisiseha kwa Mulimu.” Kono kana ki niti kuli ku utwisisa libaka Mulimu h’a tuhelela bumaswe ha ku konahali?

Makalelo a Bumaswe

Ka ku shutana ni ze ba kana ba bulela baeteleli ba bulapeli, Bibele ha i bonisi kuli libaka Mulimu h’a tuhelela bumaswe ha li utwisisehi. Kuli lu utwisise taba ya za bumaswe, ki kwa butokwa ku lemuha kuli Jehova n’a si ka bupa lifasi le li maswe. Batu ba pili ba n’a bupile ne ba petahalile, ba si na sibi. Mi Jehova n’a ngile za n’a bupile ku ba ze “lukile hahulu.” (Genese 1:26, 31) Mulelo wa hae ne li kuli bo Adama ni Eva ba yandulule miseto ya Paradaisi ya mwa Edeni ku fitela lifasi kamukana li ba paradaisi, ni kuli ba taze lifasi ka batu ba ba tabile ba ba silelezwa ki bubusi bwa hae bwa ka lilato.—Isaya 45:18.

Bumaswe ne bu kalisizwe ki sibupiwa sa moya, ili se ne si sepahala ku Mulimu pili, kono hamulaho sa ba ni takazo ya ku lapelwa. (Jakobo 1:14, 15) Bukwenuheli bwa sona ne bu bonahezi fa lifasi muta ne si kukuelize bo munna ni musali ba pili kuli ni bona ba kwenuhele Mulimu. Mwa sibaka sa ku latelela taelo ya Mulimu ye ikutwahalela ya kuli ba si ke ba ca kamba ku swala kwa muselo wa kota ya ku ziba bunde ni bumaswe, bo Adama ni Eva ne b’a ngile kwateñi ni ku ca. (Genese 3:1-6) Ka ku eza cwalo, ne ba si ka utwa Mulimu mi ne ba bonisize kuli ne ba lakaza kuli ba ipuse.

 Taba ya Bubusi Ne I Zusizwe

Bukwenuheli b’o bwa mwa simu ya Edeni ne bu zusize taba ya bubusi, ye ama pupo kaufela. Batu be ne ba ipanguzi ne ba honona ka za kuli Jehova n’a busa libupiwa za hae hande. Kana Mubupi n’a na ni tukelo ya ku bata kuli batu ba ipeye ku yena ka ku tala? Esi mwendi batu ne ba ka eza hande ha ne ba ka ipusa?

Jehova u alabile kanyezo yeo ya bubusi bwa hae ka nzila ye bonahalize mw’a likanyeleza hande tulemeno twa hae twa lilato, katulo ye lukile, butali, ni m’ata. N’a ka be a itusisize m’ata a hae kuli a feze bukwenuheli b’o onaf’o fela. Mi seo ne si ka be si bonahezi ku luka, kakuli n’a na ni swanelo ya ku eza cwalo. Kono fela ne si si ke sa tatulula litaba za bubusi ze n’e zusizwe. Hape, Mulimu n’a ka be a ikatulezi fela ku libala sibi seo. Ba bañwi kacenu ba kana b’a nga kuli yeo ne i ka ba keto ye lilato. Kono f’o, buipapato bwa Satani bwa kuli batu ne ba ka eza hande ha ne ba ka ipusa ne bu si ke bwa alabiwa. Mi mane, kana seo ne si si ke sa susueza ba bañwi kuli ni bona ba fulalele nzila ya Jehova? Ze n’e ka zwa mwateñi ki manyando a’ sa feli.

Ka butali, Jehova u tuhelezi batu kuli ba ikezeze mo ba latela ka nakonyana. Nihaike kuli seo ne si tokwa kuli matata a tuhelelwe ka nakonyana, nako yeo i file batu kolo ya kuli ba bonise haiba b’a kona ku ipusa hande inze ba ikauhanyize ku Mulimu, ka ku pila ka lipimo ze ba iketezi za se sinde ni se si maswe. Ki sifi se si zwile mwateñi? Ku zwa kwamulaho, ku bile hahulu ni lindwa, ku sa luka, buhateleli, ni manyando. Ku palelwa ku ipusa hande kwa batu ba ba ipanguzi ku Jehova, ku ka wiseza likamba litaba ze n’e zusizwe mwa Edeni.

Kono, Mulimu u bonahalize lilato la hae ka ku fana Mwan’a hae, Jesu Kreste, ya n’a fanile bupilo bwa hae bwa fa lifasi sina sitabelo sa tiululo. Tiululo yeo i konisa kuli batu ba ba utwa ba lukuluhe kwa sikuto sa sibi ni lifu ze n’e tisizwe ki ku sa utwa kwa Adama. Hape i konisa batu ba ba bonisa tumelo ku Jesu  kuli ba fumane bupilo bo bu sa feli.—Joani 3:16.

Lu omba-ombiwa ki sepiso ya Jehova ya kuli manyando a batu a tuha a fela. Walisamu n’a ñozi kuli: “Ku sa na ni nakonyana ye nyinyani, mi ya maswe h’a sa na ku ba teñi; e, u ka bata sibaka sa hae, kono si se si ka ba siyo. Kono ba ba ishuwa ba ka luwa naha, ba ka ikola kozo ye tuna.”—Samu 37:10, 11.

Bupilo bwa Buiketo ni Tabo Kwapili

Ku talelezwa kwa bupolofita bwa Bibele ku bonisa kuli nako ya Mulimu ya ku felisa makulanu, maswabi, ni lifu i fakaufi. Ha mu bone mbengenge ya miinelo ye minde ye ka taha ya n’a bonisizwe muapositola Joani mwa pono. N’a ñozi kuli: “Na bona lihalimu le linca ni lifasi le linca; kakuli lihalimu la pili ni lifasi la pili ne li felile; ni liwate ha li sa li yo. . . . Mi Mulimu u ka ba ni [batu], Yena luli, ibe Mulimu wa bona. Mi u ka takula miyoko kaufela kwa meto a bona; mi lifu ha li sa na ku ba teñi; nihaiba ku tahelwa ki maswabi ni ku lila, ni ku utwa butuku; kakuli za pili li felile.” Ka ku koñomeka ku sepeha kwa lisepiso zeo, Joani n’a bulelezwi kuli: “Ñola; kakuli manzwi ao a sepahala, ki a niti.”—Sinulo 21:1-5.

Ku cwañi ka za bolule-lule ba batu ba ba si na mulatu ba ba shwile hasamulaho a bukwenuheli bwa mwa Edeni? Jehova u sepisize kuli u ka kutiseza kwa bupilo ba ba itobalezi mwa lifu. Muapositola Paulusi n’a ize: “Ni na ni sepo ku Mulimu . . . ya kuli ku zuha kwa bafu ku ka ba teñi, kwa ba ba lukile ni ba ba si ka luka.” (Likezo 24:15) Ba ba ka zusiwa bao ba ka ba ni tibelelo ya ku pila mwa lifasi “mo ku yahile Ku Luka.”—2 Pitrosi 3:13.

Ku swana sina ndate ya lilato h’a kona ku tuhelela mwan’a hae kuli a alafiwe ka ku pazulwa haiba w’a ziba kuli mwan’a yo kihona ha n’a ka fola, nihaike mwana u ka utwa butuku. Jehova ni yena u tuhelezi nakonyana bumaswe mwa lifasi, bo bu ziyeza batu. Niteñi, limbuyoti ze inelela li bulukezwi bote ba ba eza tato ya Mulimu. Paulusi n’a talusize kuli: “Ze bupilwe ne li beilwe mwa puso ya buhata, isi ka ku lata kwa zona, kono kabakala hae ya li beile mwateñi, nze ku na ni sepo ya kuli ni ze bupilwe li ka lukululwa kwa butanga bwa ku bola, kuli li fiwe tukuluho ya kanya ya bana ba Mulimu.”—Maroma 8:20, 21.

Taba yeo y’a tabisa luli, mi ha i swani ni makande e lu buhanga fa televishini kamba e lu balanga mwa mutende, kono ki taba ye nde. Ki taba ye nde ka ku fitisisa ye zwa ku “Mulimu wa ze tiisa pilu kaufela,” ili ya lu babalela luli.—2 Makorinte 1:3.

[Maswaniso a fa likepe 6]

Nako ye fitile i bonisa kuli batu ha ba koni ku ipusa hande ba sa etelelwi ki Mulimu

[Manzwi a bañi ba maswaniso]

Lubasi lwa Masomalia: UN PHOTO 159849/M. GRANT; mbomba ya atomiki: siswaniso sa ba USAF; munganda wa tukufazo: siswaniso sa ba U.S. National Archives