Ku Omba-Ombiwa mwa Nako ya Matata

MAZAZI a, makande h’a tabisi. Mutu yo muñwi n’a ñozi kuli: “Likezahalo za kacenu li sabisa hahulu kuli mane mutu hañata u zina-zinanga ku buha makande manzibwana.” Lifasi li tezi lindwa, likezo ze tisa sabo ni businyi kwa linaha, manyando, bukebenga, ni matuku, ili liziyezi ze kana za lu wela ka butu ona cwanoñu fa, haiba ha lu si ka kopana kale ni zona.

Bibele ne i bulezi cimo ka ku nepahala ka za muinelo wo wa lika. Jesu ha n’a talusa za nako ya luna, n’a bulezi kuli ne ku ka ba ni lindwa ze tuna, matuku a’ yambukela, litala, ni lizikinyeho za lifasi. (Luka 21:10, 11) Ka ku swana, muapositola Paulusi n’a ñozi za “linako ze tata,” muta batu ne ba ka ba ni buhali, ba ba lata mali, ni ba ba toya batu ba bande. N’a bizize nako yeo kuli ki “mazazi a maungulelo.”—2 Timotea 3:1-5.

Kacwalo, makande h’a talusa za miinelo ya lika mwa lifasi, ka nzila ye ñwi a swana ni ze n’e bulezwi cimo mwa Bibele. Kono f’o ki fona fo ku felela ku swana k’o. Bibele i fa mubonelo o shutana ni o fiwa ki makande a ze ezahala. Ka Linzwi la Mulimu le li tahile ka moya o kenile, lwa kona ku utwisisa libaka bumaswe ha bu atile cwalo ni mo li ka bela lika kwapili.

Ka M’o Mulimu a Bonela Bumaswe

Bibele i talusa ka m’o Mulimu a bonela miinelo ye maswe ye li teñi kacenu. Nihaike  Mulimu n’a bonezi cimo matata a kacenu, h’a katelwi kamba ku lela ku a tuhelela ku ya ku ile. Muapositola Joani n’a ñozi kuli “Mulimu u lilato.” (1 Joani 4:8) Jehova u babalela hahulu batu mi u toile bumaswe kaufela. Kona libaka ha lu swanela ku sikuluhela ku Mulimu kuli a lu omba-ombe, kakuli ki yo munde mi u na ni mufelañeke mi hape u na ni m’ata ni tato ya ku felisa bumaswe mwa lifasi. Walisamu n’a ñozi kuli: “[Mulena wa kwa lihalimu ya ketilwe ki Mulimu] u ka lamulela mubotana ya itilelela ku yena, ni yena mukunyandela ya si na ya mu tusa. Ya fokozi, ni ya shebile, u ka ba utwela butuku, a lamulele bupilo bwa ba ba nyandile. A ba liulule ku ba ba limba, ba ba ba nyandisa. Mali a mwa mibili ya bona a ka babaleha mwa meto a hae.”—Samu 72:12-14.

Kana mwa utwelanga butuku ba ba nyanda? Mwendi mwa ba utwelanga butuku. Makeke ki kalemeno k’a beile Jehova ku luna, kakuli ne lu bupilwe ka siswaniso sa hae. (Genese 1:26, 27) Kacwalo, lwa kona ku ikolwisa kuli Jehova h’a itibazi manyando a batu. Jesu, ya n’a ziba hande Jehova ku fita mutu ufi kamba ufi, n’a lutile kuli Jehova u lu tabela hahulu mi u tezi mukekecima.—Mateu 10:29, 31.

Pupo ka sibili i paka kuli Mulimu w’a babalela batu. Jesu n’a ize kuli Mulimu “u pazuliseza ba ba maswe ni ba bande lizazi la hae, mi u neliseza ba ba lukile ni ba ba maswe lipula za hae.” (Mateu 5:45) Muapositola Paulusi n’a bulelezi batu ba munzi wa Listra ka za Mulimu kuli: “H’a si ka lisela ku izibahaza, ka ku eza batu hande, ni ku mi tusa lipula za kwa lihalimu, ni linako za ku kutula, a mi fa lico ka buñata, a taza lipilu za mina tabo.”—Likezo 14:17.

Ki Mañi Y’a Tisa Bumaswe?

Paulusi hape n’a bulelezi batu ba kwa Listra nto ye ñwi ye ipitezi, kuli: “Mwa linako za kale, Mulimu u tuhezi macaba kaufela kuli a ye ka mikwa ya ona.” Kacwalo, macaba kamba bona batu ka sibili ki bona ba ba itiseza buñata bwa makayamana e ba ipumana ku ona. Haki Mulimu ya a tisa.—Likezo 14:16.

Ki kabakalañi Jehova h’a tuhelela lika ze maswe ku ezahala? Kana luli u ka felisa bumaswe? Likalabo za lipuzo zeo li kona fela ku fumanwa mwa Linzwi la Mulimu. Libaka kikuli kalabo yeo i ama mutu yo muñwi wa moya ku kopanyeleza ni taba ya n’a zusize yena mutu y’o mwa liluko la kwa moya.

[Maswaniso a fa likepe 4]

Batu ba na ni makeke. Kana Mulimu yena a ka itibaza manyando a batu?

 [Manzwi a bañi ba maswaniso fa likepe 2]

COVER: Tank: UN PHOTO 158181/J. Isaac; earthquake: San Hong R-C Picture Company

[Manzwi a bañi ba siswaniso fa likepe 3]

Kwa nzohoto fahalimu, Croatia: UN PHOTO 159208/S. Whitehouse; mbututu ye lapile: UN PHOTO 146150 BY O. MONSEN