Mikulwani Ba Ba Lata Niti

LILIMO ze fitelela 2,400 kwamulaho, walisamu wa Muheberu n’a buzize kuli: “Mutangana a eze cwañi kuli a kenise mizamao ya hae?” (Samu 119:9) Puzo yeo i sa li ya butokwa ni kacenu kakuli mikulwani ba na ni butata bo buñata mwa lifasi. Buhule bu tahiselize mikulwani ba bañata ku ba ni butuku bwa AIDS, mi ibat’o ba licika la ba ba na ni bona butuku bo bumaswe b’o ki ba lilimo za mwahal’a 15 ni 24. Ku itusisa maswe milyani ye kola ni kona ku tahisa butata bo buñata, ili ku kauleza bupilo bwa mikulwani ba bañwi. Lipina ze na ni litaluso ze maswe, mafilimu a bonisa mifilifili ni mizamao ye maswe, mavidio ni liprogilamu za fa TV; ni maswaniso a mapunu fa Intaneti li tahisa kukuezo ye maswe hahulu kwa mikulwani. Kacwalo, puzo ya n’a buzize walisamu i hupulwa hahulu ki bashemi ni mikulwani ba bañata kacenu.

Walisamu ya swana n’a alabile puzo ya hae cwana: “Kih’a ka itemuhela yona ka ku ya ka linzwi la hao.” Kaniti, mwa Bibele, lona Linzwi la Mulimu, ku na ni litaba ze nde ze kona ku etelela mikulwani, mi ka ku li latelela, mikulwani ba bañata ba sweli ba kondisa mwa bupilo. (Samu 119:105) Ha lu tatubeñi mitala ye miñwi ya mikulwani ba ba lata Mulimu ili ba ba lika ka t’ata ku zwelapili ku tiya kwa moya mwa lifasi le le li lata hahulu bufumu ni minyaka.

Ba Itebuha Ketelelo ya Bashemi

Ka lilimo li sikai, Jacob Emmanuel n’a li sikombwa ya li paina wa ka nako ye tezi a si ka yo sebeleza kale kwa ofisi ya mutai wa kwa Mexico wa Lipaki za Jehova. U hupula ka buitebuho mo ne ku tahezi kuli a tabele ku sebeleza Mulimu: “Be ne ba ni tusize hahulu ki bashemi ba ka, nihaike mizwale ba bañwi ba ba tiile kwa moya be ni ezize silikani ni bona, ni bona ba ni tusize hahulu. Ne ba ni susuelize ku lata ku kutaza. Ka sishemo ne ba ni bonisize nzila ye lukile; ne ni sa ikutwi kuli ne ba ni hapeleza.”

David, ya s’a bile lilimonyana mwa sebelezo ya ka nako ye tezi, u hupula mwa n’a tuselizwe kikuli bashemi ba hae ne ba kalile sebelezo ya ku ba mapaina ba ba ipitezi yena ni munyan’a hae inge ba sa li banana. Bondat’ahe ha ne ba timezi, bomahe ba zwelapili ku ba mapaina ba ba ipitezi. Kwand’a ku kutaza taba ye nde, ba babalela yena ni munyan’a hae. David u li: “Ne ba sa ni hapelezangi ku ba paina, kono ka ku ba lubasi, ne lu ikola bupaina mi sango ni muinelo wa teñi za ni susumeza kuli ni na ni be paina.” Ka za ketelelo ye nde ni ku iswa mamelelo ki bashemi, David u li: “Busihu ni busihu, boma ne ba lu balelanga makande mwa buka ya Kuzwa Paradaisi ye Latehile ku ya Paradaisi ye Fumanwi—Sinca. * Mo ne ba lu balelanga ona ne ku lu tusize ku lata lico za kwa moya.”

Ku Itebuha Mikopano

Mikulwani ba bañwi ba fumana butata ku itebuha mikopano ya Sikreste. Ba yanga teñi kakuli ba iswanga teñi ki bashemi ba bona. Kono haiba ba zwelapili ku  yanga kwa mikopano, nako ha i nze i ya ba kana ba fita fa ku lata mikopano. Mu nge mutala wa Alfredo, ya n’a kalile sebelezo ya ka nako ye tezi inge a na ni lilimo ze 11. U itumelela kuli ha n’a na ni lilimo ze bat’o ba ze keta-lizoho, n’a likanga ku picuka ku ya kwa mikopano kakuli ne i mu ozelisanga kono bashemi ba hae ne ba sa mu lumelezangi ku lobala mwa mikopano. U hupula kuli: “Ha ne ni nze ni hula, hanyinyani-hanyinyani na kala ku tabela hahulu mikopano, sihulu ha se ni zibile ku bala ni ku ñola kakuli f’o na kala ku fanga likalabo mwa manzwi a ka.”

Cintia, musizana wa lilimo ze 17 ya li paina wa kamita, u talusa ka m’o sango ne si mu tuselize hahulu ku lata ku sebeleza Mulimu. U li: “Ku utwana hande ni mizwale ni ku fumanehanga kamita kwa mikopano ku ni tusize ku sa ikutwa ku latehelwa ki balikani ba ka ba silifasi ni ku yawa lika ze atile kwa mikulwani, ze cwale ka ku yanga kwa ma-disco. Kwa mikopano, ku teelezanga kwa likalabo ze fiwa ni makande a ze ezahezi ne ku ni tahiselize takazo ya ku fa Jehova ze ni na ni zona kaufela, mi ni ikutwa kuli nto ye nde ka ku fitisisa ye ni na ni yona ki bunca bwa ka. Kacwalo na ikatulela ku itusisa bona ka ku mu sebeleza.”

Kono u itumelela kuli: “Ne ku na ni nako ni si ka kolobezwa kale, fo ne ku ni belanga bunolo ku sa ya kwa mikopano, ka ku puma kuli ne ni na ni ku ñola za kwa sikolo kamba ku eza lika ze ñwi za kwa sikolo. Ne ni sa yangi kwa mikopano hañata, mi nto yeo ya kala ku ni fokolisa kwa moya. Na kala ku eza sango ni mushimani ya n’a si muituti wa Bibele. Kono ka tuso ya Jehova, na hakulula muinelo w’o.”

Katulo ya ka Butu

Pablo, mukulwani yo muñwi ya sebeleza Jehova ka nako ye tezi h’a buziwa kuli nto y’a nga ku ba ya butokwa hahulu kwa ku lata niti ya Linzwi la Mulimu ki ifi, u li: “Ni bona kuli ki lika ze peli: ku eza tuto ya ka butu kamita ni ku ba ni cisehelo mwa musebezi wa ku kutaza. Ni itumela hahulu kwa bashemi ba ka, kuli ba ni lutile niti ka za Jehova, mi ni bona kuli yeo ki yona nto ye nde ka ku fitisisa ye ba ni file. Niteñi, ni na ni ku ikolwisa luli kuli ze ni latela Jehova kiñi. Kuli ni eze cwalo, ni tokwa ku ziba ‘bupala ni butelele’ bwa niti ya Bibele. Ki ka yona nzila yeo fela lu kona ku lakaza Linzwi la Jehova, lona le li tahisa ‘mulilo o cisa’ o tahisa kuli lu bulelele ba bañwi ka za lona. Cisehelo yeo ya musebezi wa ku kutaza i ka tahisa kuli lu zwelepili ku itebuha niti.”—Maefese 3:18; Jeremia 20:9.

Jacob Emmanuel, ya s’a bulezwi, ni yena wa hupula butokwa bwa ku iketela ku sebeleza Jehova. U li bashemi ba hae ne ba si ka mu hapeleza ku kolobezwa. “Ni bona kuli yeo ne li nto ye nde kakuli na bona ze nde ze zwile mwateñi. Ka mutala, mikulwani ba bañwi be ne ni bapalanga hahulu ni bona ne ba ikatulezi ku kolobezwa ka nako ye swana. Nihaike ku eza cwalo ne ku si ka fosahala, ne ni boni kuli ba bañwi ne ba ikolobelezwa fela, mi nakonyana fela ku zwa f’o, cisehelo ya bona kwa misebezi  ya Mubuso ya fokola. Kono na, bashemi ba ka ne ba si ka ni hapeleza ku eza katulo ya ku ineela ku Jehova. Ne ni ikezelize katulo yeo na muñi.”

Ze I Peta Puteho

Mikulwani ba bañwi ba itutezi niti ya Linzwi la Mulimu ku sili, ba sa tusiwi ki bashemi ba bona. Kaniti, mwa miinelo ye cwalo, ku t’ata ku ituta ku eza ze lukile ni ku zwelapili ku li eza.

Noé u hupula m’o niti ne i mu tuselize. Ku zwelela kwa bwanana, n’a na ni buhali mi n’a li wa mifilifili. Ha n’a kalile ku ituta Bibele, inge a na ni lilimo ze 14, buhali bwa hae bwa kala ku kuyuka, mi bashemi ba hae, be ne ba sa tabeli ku ituta Bibele ka nako yeo, ne ba itebuhile hahulu nto yeo. Noé ha n’a nz’a hula kwa moya, n’a bata ku sebeleza Mulimu ka ku tala. Cwale u eza sebelezo ya ka nako ye tezi.

Ka nzila ye swana, Alejandro a kala ku tabela niti ya Sikreste inge a sa li mwanana hahulu, nihaike bashemi ba hae bona ne ba sa i tabeli. U bulela ka za buitebuho bwa hae bwa niti kuli: “Ne ni huliselizwe mwa lapa la Sikatolika. Kono na ba ni mubonelo wa Komyunizimu wa kuli Mulimu h’a yo, kakuli keleke ne i si ka alaba lipuzo ze n’e ni zingile ku zwelela kwa bwanana. Kopano ya Jehova ne i ni tusize ku ba ni zibo ya Mulimu. Ne i ni pulusize luli kakuli kambe ne ni si ka ituta Bibele, kambe ne ni bile ni muzamao o maswe, ku ba cakolwa kamba ku itusisa maswe milyani ye kola. Mane kambe ne ni keni mwa sikwata sa ba ba bata ku tahisa licinceho, mi ku eza cwalo ne ku ka ni tahiseza ze maswe.”

Mukulwani u kona ku tundamena cwañi ku bata niti ni ku kumalela ku yona a sa tusiwi ki bashemi ba hae? Kaniti, maeluda ni ba bañwi mwa puteho ba tusa luli. Noé u hupula kuli: “Jehova kamita u bile bukaufi ni na, mi ha ni si ka ikutwa buinosi. Hape, ni tusizwe ki mizwale ba bañata ba ba lilato, ba ba bile bondate, boma, ni balikani ba kwa moya.” Cwale u sebeleza fa Betele mi u itusisa nako ya hae kwa ku sebeleza Mulimu. Ka nzila ye swana, Alejandro u hupula kuli: “Se ni ka itumela kamita kikuli ne ni bile ni tohonolo ya ku ba mwa puteho m’o maeluda ne ba ni isa pilu ka butu. Ni itebuha hahulu seo kakuli ha ne ni kalile ku ituta Bibele, ha ne ni na ni lilimo ze 16, ku sa wa pilu ko ku tahelanga mikulwani ba bañata ni na ne ku ni tahezi. Mabasi a mwa puteho n’a si ka ni fulalela. Kamita ne ku na ni ya ni amuhela hande ni ku ni fa kwa ku ina, lico, mane ni ku ni omba-omba.” Alejandro s’a bile mwa sebelezo ya ka nako ye tezi ka lilimo ze fitelela 13.

Batu ba bañwi ba nahana kuli bulapeli ki bwa macembele fela. Niteñi, mikulwani ba bañata ba itutile niti ya Bibele inge ba sa li banana mi ba fitile fa ku lata Jehova mi ba zwelapili ku sepahala ku yena. Manzwi a Davida a’ ñozwi kwa Samu 110:3 a kona ku sebeza ku bona bao, a li: “Sicaba sa hao si kopana si nze si lata, mwa lizazi la hao la ku puma ndwa, ka ze kenile za mikabo. Micaha ya hao i ta ku wena, sina puka ya malungasiku.”

Kwa mikulwani, ku ituta niti ni ku kumalela ku yona ku t’ata. Kwa tabisa luli ku bona kuli ba bañata ba zwelapili ku ba hahulu bukaufi ni kopano ya Jehova, ku fumaneha kwa mikopano kamita, ni ku ituta hahulu Bibele. Ka ku eza cwalo, ba konile ku fita fa ku lata h’a buniti Linzwi la Mulimu ni sebelezo ya hae!—Samu 119:15, 16.

[Litaluso za kwatasi]