Jehova Wa Mi Babalela
Jehova Wa Mi Babalela
“Mu nepele lipilaelo za mina kaufela fahalimw’a [Mulimu], kakuli wa mi tokomela.”—1 PITROSI 5:7.
1. Jehova ni Satani ba shutana hahulu ka nzila ifi ya butokwa?
JEHOVA ni Satani ba shutanela kwahule-hule. Mutu kaufela ya lata Jehova u toya Diabulosi. Shutano yeo i bonisizwe mwa hatiso ye ñwi ye zibahala. Ka za misebezi ya Satani ka mo i ñolezwi mwa Bibele, mwa buka ya Jobo, hatiso ye bizwa Encyclopædia Britannica (1970) i li: ‘Musebezi wa Satani ki wa ku zamaya-zamaya mwa lifasi ku bata likezo kamba batu ba ku bulela maswe; kacwalo, musebezi wa hae u shutana ni wa “meto a Muñ’a Bupilo,” kakuli ona a talimisisa mwa lifasi kaufela, ku tiiseza ze nde kaufela (II Makol. xvi, 9). Satani h’a sepi bunde bo ba eza batu ka ku sa itata mi u lumelelizwe ku bu lika. Kono u bu lika ka tumelezo ya Mulimu mi h’a swaneli ku tula tikanyo y’a filwe ya ku bu lika.’ Ee, ki shutano kwa butuna!—Jobo 1:6-12; 2:1-7.
2, 3. (a) Ze n’e ezahezi ku Jobo li bonisa hande cwañi taluso ya linzwi la “Diabulosi”? (b) Bibele i bonisa cwañi kuli Satani u zwelapili ku tameleza batanga ba Jehova fa lifasi?
2 Linzwi la “Diabulosi” li zwelela fa linzwi la Sigerike le li talusa “mutamilikezi,” “musawani.” Buka ya Jobo i bonisa kuli Satani n’a tamelelize Jobo, mutang’a Jehova ya sepahala, kuli kuti n’a Mu sebeleza fela kakuli ne ku na ni za n’a fumana mwateñi. N’a ize: “Kikuli Jobo u saba Mulimu fela, a sa kutelwi ki se siñwi?” (Jobo 1:9) Taba ye mwa buka ya Jobo i bonisa kuli niha n’a tahezwi ki miliko, Jobo n’a sutelezi hahulu ku Jehova. (Jobo 10:9, 12; 12:9, 10; 19:25; 27:5; 28:28) Ha s’a zwile mwa butata b’o, n’a ize ku Mulimu: “Ne ni utwile za hao ka lizebe fela, kono cwale meto a ka a ku bona.”—Jobo 42:5.
3 Ku zwa mwa linako za Jobo, kana Satani u tuhezi ku tameleza batanga ba Mulimu ba ba sepahala? Kutokwa. Buka ya Sinulo i bonisa kuli mwa nako ya maungulelo ye, Satani u zwelapili ku tameleza banyani ba Kreste ba ba tozizwe, mi kaniti ni balikani ba bona ba ba sepahala. (2 Timotea 3:12; Sinulo 12:10, 17) Kacwalo, kaufel’a luna Bakreste ba niti lu tokwa ku ipeya kwatas’a Mulimu wa luna ya na ni pabalelo, yena Jehova, ku mu sebeleza kabakala kuli lwa mu lata luli. Ha lu ka eza cwalo lu ka bonisa kuli litamelezo za Satani ki za buhata. Kacwalo lu ka tabisa pilu ya Jehova.—Liproverbia 27:11.
Jehova U Bata ku Lu Tusa
4, 5. (a) Ka ku shutana ni Satani, Jehova u batangañi fa lifasi? (b) Kuli Jehova a lu shemube, lu tokwa ku ezañi?
4 Diabulosi u zamaya-zamaya mwa lifasi inz’a bata wa ku tameleza ni ku tataula. (Jobo 1:7, 9; 1 Pitrosi 5:8) Ka ku shutana, Jehova u bata ku tusa ba ba tokwa m’ata a hae. Mupolofita Hanani n’a bulelezi Mulena Asa kuli: “Meto a [Muñ’a] Bupilo a talimisisa lifasi kaufela, kuli a tahise mata a hae ku tusa ba ba mu file lipilu za bona, kaufela zona.” (2 Makolonika 16:9) Pabalelo ya Jehova luli i shutanela kwahule ni kaiñole ka Satani!
5 Jehova h’a lu lisi kuli a kwacise mafosisa a luna kaufela. Walisamu n’a ñozi kuli: “[Muñ’a] Bupilo, ha u ka londoloza bumaswe, Mulena, ku ka pila mañi?” (Samu 130:3) Kalabo ye lukela ku fiwa f’o kikuli: ha ku na. (Muekelesia 7:20) Haiba lu sutelela ku Jehova ka pilu kaufela, meto a hae a ka lu talima, isi ku lu nyaza, kono ili ku bona buikatazo bwa luna ni ku alaba litapelo za luna za kuli a lu tuse ni ku lu swalela. Muapositola Pitrosi n’a ñozi kuli: “Meto a Mulena a talimile ba ba na ni niti, mi lizebe za hae li teeleza tapelo ya bona; kono pata ya Mulena i sosobanela ba ba eza maswe.”—1 Pitrosi 3:12.
6. Taba ya Davida i lu omba-omba mi hape ni ku lu lemusa ka nzila ifi?
6 Davida n’a si ka petahala mi n’a ezize sibi se situna. (2 Samuele 12:7-9) Kono a itilelela ku Jehova ni ku sutelela ku yena ka ku lapela ka t’ata ku yena. (Samu 51:1-12, manzwi a fahalimw’a kauhanyo) Jehova n’a utwile tapelo ya Davida ni ku mu swalela, nihaike sibi seo ne si tahiselize Davida ze maswe. (2 Samuele 12:10-14) Taba yeo i swanela ku lu omba-omba, mi hape ni ku lu lemusa. Kwa omba-omba ku ziba kuli Jehova wa lata ku swalela libi za luna haiba lu baka luli, kono hape ku ziba kuli sibi hañata si tahisanga ze maswe ki temuso. (Magalata 6:7-9) Haiba lu bata ku sutelela ku Jehova, lu swanela ku ba kwahule ka mo lu konela kaufela ni nto ifi kamba ifi y’a sa tabeli.—Samu 97:10.
Jehova U Hohela Batu ba Hae ku Yena
7. Jehova u bona batu ba ba cwañi, mi u ba hohela cwañi ku yena?
7 Davida n’a ñozi ku ye ñwi ya lisamu za hae kuli: “[Muñ’a] Bupilo ki Ya pahami; nihakulicwalo u bona ba ba ishuwa. Kono u ziba baikuhumusi ba sa li kwahule.” (Samu 138:6) Ka ku swana, samu ye ñwi i li: “Ki mañi ya swana sina [Muñ’a] Bupilo Mulimu wa luna, ya yahile mwa mabaka a kwahalimu-limu, ya inamela ku ukumela ze mwa lihalimu ni lifasi? Ya maibile, u mu zwisa mwa liluli.” (Samu 113:5-7) Ee, Mubupi ya pahami wa pupo kamukana u ukumela ku talima fa lifasi, mi meto a hae a bona “ba ba ishuwa,” “ya maibile,” batu “ba ba lila, kabakala bumaswe kaufela bo bu eziwa.” (Ezekiele 9:4) Ba ba cwalo, u ba hohela ku yena ka Mwan’a hae. Jesu ha n’a li fa lifasi n’a ize: “Ha ku na mutu ya ka ta ku na, konji h’a ka hohiwa ki Ndate ya ni lumile; . . . ha ku na ya ka taha ku na konji ya filwe cwalo ki Ndate.”—Joani 6:44, 65.
8, 9. (a) Ki kabakalañi kaufel’a luna ha lu tokwa ku taha ku Jesu? (b) Ki nto mañi ye ipitezi ka za tukiso ya tiululo?
8 Batu kaufela ba swanela ku taha ku Jesu ni ku lumela mwa sitabelo sa tiululo kakuli ne ba pepilwe ba li baezalibi, ba ba kwahule ni Mulimu. (Joani 3:36) Ba tokwa ku kutisana ni Mulimu. (2 Makorinte 5:20) Mulimu n’a si ka libelela kuli pili baezalibi ba mu kombelele kihona a ka eza tukiso yeo ka yona mwendi ba ka kona ku kutisana ni yena. Muapositola Paulusi n’a ñozi kuli: “Mulimu fo a tahisize kanya ya lilato la hae ku luna, kikuli lu sa li baezalibi Kreste u shwile bakeñisa luna. . . . Kakuli mbali lu sa li lila, lwa kutisezwa ku Mulimu ka lifu la Mwan’a hae, ha lu se lu kutiselizwe ku Yena, lu ka piliswa hahulu ka bupilo bwa hae.”—Maroma 5:8, 10.
9 Muapositola Joani n’a tiiselize niti ye ipitezi ya kuli Mulimu u kutisana ni batu, ha n’a ñozi kuli: “Lilato la Mulimu ku luna li bonahezi ka se: Mulimu u lumile mwa lifasi Mwan’a hae a li muñwi ku Yena kuli lu pile ka yena. Lilato ki le: Hasi luna lu latile Mulimu, kono ki Yena ya lu latile, mi u lumile Mwan’a hae kuli a be tifo ya libi za luna.” (1 Joani 4:9, 10) Ya n’a ngile muhato pili ki Mulimu, isiñi batu. Kana ha mu tabeli Mulimu ya bonisize lilato le lituna cwalo kwa “baezalibi,” bao hape ba li “lila”?—Joani 3:16.
Butokwa bwa ku Bata Jehova
10, 11. (a) Lu tokwa ku ezañi kuli lu bate Jehova? (b) Lu swanela ku nga cwañi lika za mwa lifasi la Satani?
10 Ki niti kuli Jehova h’a lu hapelezi ku taha ku yena. Lu lukela ku mu bata, ku mu ‘babatela, lu ka swana lwa mu fumana, nih’a sa ini kwahule ni mutu ni mutu wa luna.’ (Likezo 17:27) Lu lukela ku lemuha kuli Jehova u na ni tukelo ya ku bata kuli lu ipeye kwatas’a hae. Mulutiwa Jakobo n’a ñozi kuli: “Mu ipeye kwatas’a Mulimu; mu hanele Diabulosi, mi u ka saba ku mina. Mu sutelele ku Mulimu mi u ka sutelela ku mina. Mina baezalibi mu tapise mazoho a mina; ni mina ba lipilu ze peli, mu kenise lipilu za mina.” (Jakobo 4:7, 8) Lu si ke lwa kata-kata ku hanela Diabulosi ni ku yemela Jehova ka ku tiya.
11 Ku eza cwalo ku tokwa kuli lu be kwahule ni lika za mwa lifasi la Satani. Jakobo hape n’a ñozi kuli: “Ha mu zibi kuli ku lata za lifasi ki ku lwanisa Mulimu? hakulicwalo ya lata ku ba mulikani wa lifasi, u ipeya sila ku Mulimu.” (Jakobo 4:4) Kono haiba lu bata ku ba balikani ba Jehova, lu zibe kuli lu ka toiwa ki lifasi la Satani.—Joani 15:19; 1 Joani 3:13.
12. (a) Davida n’a ñozi manzwi mañi a’ omba-omba? (b) Jehova n’a file temuso mañi ka mupolofita Azaria?
12 Lifasi la Satani ha li lu lwanisa ka nzila ye ñwi, sihulu lu tokwa ku lapela ku Jehova, ku kupa tuso ya hae. Davida, y’o ka linako ze ñata n’a pulusizwe ki Jehova, n’a ñozi taba ye omba-omba, y’e li: “[Muñ’a] Bupilo u fakaufi ni ba ba mu lapela kaufela, ili kaufela ba ba mu lapela ka ku eza niti. U fa ba ba mu saba se si shukezwi ki bona, hape u utwa ni mihuwo ya bona, mi wa ba lamulela. [Muñ’a] Bupilo u babalela kamukana ba ba mu lata, kono u ka yundisa ba ba maswe kaufela.” (Samu 145:18-20) Samu yeo i bonisa kuli ha lu likiwa ka buñwi, Jehova wa kona ku lu pulusa, hape ni kuli ka nako ya “ñalelwa ye tuna,” u ka pulusa batu ba hae kaufela. (Sinulo 7:14) Haiba lu ba bukaufi ni Jehova, ni yena u ka ba bukaufi ni luna. Mupolofita Azaria, ka ketelelo ya “Moya wa [Muñ’a] Bupilo” n’a bulezi nto ye lu kona ku nga kuli ki sikuka se situna, ha n’a ize: “[Mun’a] Bupilo u ku mina ha mu nze mu li ku Yena. Ha mu ka mu bata mu ka mu fumana. Kono ha mu ka mu fulalela, u ka mi fulalela ni Yena.”—2 Makolonika 15:1, 2.
Jehova U Lukela ku Ba Wa Luli ku Luna
13. Lu kona ku bonisa cwañi kuli Jehova ki wa luli ku luna?
13 Muapositola Paulusi n’a ñozi ka za Mushe kuli “n’a tiya, inge u bona ya sa bonwi.” (Maheberu 11:27) Niti kikuli Mushe n’a si ka bona Jehova ka meto a hae. (Exoda 33:20) Kono ku yena, Jehova n’a li wa luli hahulu kuli mane inge n’a iponela Yena. Ka nzila ye swana, ha s’a likilwe, meto a Jobo a tumelo n’a boni Jehova hande ni ku fita. N’a mu boni ku ba Mulimu ya tuhelela batanga ba hae ku tahelwa ki miliko, kono a sa ba fulaleli. (Jobo 42:5) Bo Enoke ni Nuwe ne ba bulezwi kuli ne ba ‘zamaile ni Mulimu.’ Ne ba ezize cwalo ka ku bata ku tabisa Mulimu ni ku mu utwa. (Genese 5:22-24; 6:9, 22; Maheberu 11:5, 7) Haiba lu nga Jehova ku ba wa luli, sina mo ne ba mu ngezi bo Enoke, Nuwe, Jobo, ni Mushe, lu ka mu ‘beya mwa milelo ya luna’ ku ze lu eza kaufela, mi u ka “lukisa linzila za [luna].”—Liproverbia 3:5, 6.
14. Ku ‘itinga’ ku Jehova ku talusañi?
14 Maisilaele ha ne ba tuha ba kena mwa Naha ya Sepiso, Mushe n’a ba elelize kuli: “Mu kumalele [Muñ’a] Bupilo Mulimu wa mina, mu mu sabe, mu tokomele milao ya hae, mi mu utwe linzwi la hae, mu mu sebeleze mi mu itinge ku Yena.” (Deuteronoma 13:4) Ne ba lukela ku kumalela Jehova, ku mu saba, ku mu utwa, ni ku itinga ku yena. Ka za linzwi le li tolokilwe kuli ‘ku itinga,’ caziba yo muñwi wa litaba za Bibele u li “pulelo yeo i bonisa silikani se situna hahulu.” Walisamu n’a ize: “Ba ba saba [Muñ’a] Bupilo ki ba likunutu za hae.” (Samu 25:14) Haiba Jehova a ba wa luli ku luna, mi haiba lu mu lata hahulu kuli mane lu saba ku mu filikanya ka nzila ifi kamba ifi, lu ka ba balikani ba hae ba batuna.—Samu 19:9-14.
Kana Mwa Ziba Kuli Jehova U Na ni Pabalelo?
15, 16. (a) Samu 34 i bonisa cwañi kuli Jehova wa lu babalela? (b) Haiba ku lu bela t’ata ku hupula likezo za Jehova za sishemo ku luna, lu swanela ku eza cwañi?
15 Kezo ye ñwi ye lunya ya Satani ki ya ku lika ku lu libalisa kuli Jehova, Mulimu wa luna, kamita u babalela batanga ba hae ba ba sepahala. Davida, mulena wa Isilaele n’a ziba kuli n’a silelezwa ki Jehova niha n’a li mwa butata bo butuna hahulu. Ha n’a ipumisa ku pulumuka fapil’a Mulena Akishi wa Gati, n’a pangile pina, ili samu ye munati hahulu, yeo ku yona ne ku na ni manzwi a, a’ bonisa tumelo: “Mu kopane ni na, ku lumbeka [Muñ’a] Bupilo, lu nuneke Libizo la hae hamoho. Ni batile [Muñ’a] Bupilo, mi u ni utwile; u ni lamulezi ku ze ne ni saba kaufela. Lingeloi la [Muñ’a] Bupilo li tibelezi, li beile ba ba mu saba mwahali; mi la ba lamulela. Mu lazwe, mi mu ka bona kuli [Muñ’a] Bupilo u na ni sishemo; u filwe mbuyoti mutu ya sabela ku Yena. [Muñ’a] Bupilo u fakaufi ni ba ba na ni pilu ye lobehile, mi u pilisa ba ba ikutwa ku swaba mwa moya wa bona. Manyando a ya lukile ki a mañata: kono [Muñ’a] Bupilo u mu lamulela ku ona kaufela.”—Samu 34:3, 4, 7, 8, 18, 19; 1 Samuele 21:10-15.
16 Kana mwa kolwa kuli Jehova wa kona ku lamulela? Kana mwa ziba kuli wa kona ku sileleza ka mangeloi a hae? Kana se mu likile ni ku bona kuli Jehova u sishemo? Se li lili fo se mu iponezi kuli Jehova u mi shemubile? Ha mu like ku hupula. Kana ne li fa ndu yani ya mafelelezo ye ne mu potezi mwa bukombwa, ha n’e se mu kalile ku ikutwa ku katala? Mwendi ka nako yeo ne mu bile ni puhisano ye nde ni muñ’a ndu. Kana ne mu hupuzi ku itumela ku Jehova kwa ku mi ekeleza kwa m’ata e ne mu tokwa ni kwa ku mi fuyaula? (2 Makorinte 4:7) Kono ku kana kwa mi bela t’ata ku hupula kezo ye ñwi luli yeo Jehova n’a mi shemubile ka yona. Mwendi mu tokwa ku iheta viki, kweli, silimo, kamba mane ku fitelela. Haiba ku cwalo, mwendi mu ikataze ku sutelela hahulu ku Jehova ni ku lika ku bona m’o a mi etelelela. Muapositola Pitrosi n’a elelize Bakreste kuli: “Mu ikokobeze mwatas’a lizoho la Mulimu le li na ni mata. . . . Mu nepele lipilaelo za mina kaufela fahalimw’a hae, kakuli wa mi tokomela.” (1 Pitrosi 5:6, 7) Luli, mu ka komoka ku ziba ka m’o a mi babalelela!—Samu 73:28.
Mu Zwelepili ku Bata Jehova
17. Ku tokwahalañi kuli lu zwelepili ku bata Jehova?
17 Lu lukela ku zwelapili ku tiiseza silikani sa luna ni Jehova. Jesu n’a lapezi ku Ndat’ahe kuli: “Bupilo bo bu sa feli, kikuli ba ku zibe, Wena, Mulimu a nosi wa niti, ni y’o lumile, yena Jesu Kreste.” (Joani 17:3) Kuli lu be ni zibo ya Jehova ni ya Mwan’a hae, lu tokwa ku zwelapili ku lika. Kuli lu utwisise “ze tungile za Mulimu,” lu tokwa tuso ya moya o kenile ni tapelo. (1 Makorinte 2:10; Luka 11:13) Hape kuli lu fepe minahano ya luna ka lico za kwa moya ze fiwa “ka nako ye lukela,” lu tokwa ketelelo ya “mutanga ya sepahala, ya na ni kutwisiso.” (Mateu 24:45) Ka yona nzila yeo, Jehova u lu elelize ku bala Linzwi la hae ka zazi, ku fumaneha kamita kwa mikopano ya luna ya Sikreste, ni ku abana ka pilu kaufela mwa ku kutaza ‘evangeli ya mubuso.’ (Mateu 24:14) Ha lu ka eza cwalo, lu ka zwelapili ku bata Jehova, Mulimu wa luna ya na ni pabalelo.
18, 19. (a) Lu swanela ku tiya mwa ku ezañi? (b) Haiba lu hanela Diabulosi ka ku tiya ni ku zwelapili ku bata Jehova, lu ka fuyaulwa cwañi?
18 Satani u eza mw’a konela kaufela ku tahisa kuli batu ba Jehova ba nyandiswe, ku lwaniswa, ni ku kataziwa ku zwelela kafa ni kafa. U lika ku filikanya kozo ya luna ni ku sinya swalisano ya luna ye nde ni Mulimu wa luna. H’a bati kuli lu zwelepili mwa musebezi wa luna wa ku fumana batu ba ba sepahala ni ku ba tusa ku taha kwa lineku la Jehova mwa taba ya bubusi. Kono lu lukela ku tiya mwa ku zwelapili ku sepahala ku Jehova, ili ku sepa kuli u ka lu lamulela ku ya maswe. Ka ku latelela Linzwi la Mulimu ni ka ku sebelisana hahulu ni kopano ya hae ye bonahala, lwa kona ku kolwa kuli kamita u ka lu tusa.—Isaya 41:8-13.
19 Kacwalo, haike kaufel’a luna lu hanele hahulu Diabulosi ni likezo za hae za lunya, inze lu bata kamita Jehova, yena Mulimu wa luna ye lu lata hahulu, ya si ke a palelwa ‘ku lu tiisa, ni ku lu fa m’ata.’ (1 Pitrosi 5:8-11) Kacwalo, lu ka ‘tiiseza mwa lilato la Mulimu, inze lu libelezi sishemo sa Mulen’a luna Jesu Kreste, kuli lu bone bupilo bo bu sa feli.’—Juda 21.
Ne Mu Ka Alaba Cwañi?
• Linzwi la “Diabulosi” li talusañi, mi Diabulosi u ezañi ze bonisa kuli libizo leo la mu swanela?
• Ka m’o Jehova a bonela batu ba ba pila fa lifasi, u shutana cwañi ni Diabulosi?
• Mutu h’a atumela Jehova, ki kabakalañi h’a lukela ku amuhela tiululo?
• Ku ‘itinga’ ku Jehova ku talusañi, mi lu kona cwañi ku zwelapili ku mu bata?
[Lipuzo za Tuto]
[Siswaniso se si fa likepe 15]
Jobo niha n’a likilwe, n’a fitile fa ku utwisisa kuli Jehova n’a mu babalela
[Maswaniso a fa likepe 16, 17]
Ku bala Bibele ka zazi, ku fumaneha kwa mikopano ya Sikreste kamita, ni ku abana hahulu mwa musebezi wa ku kutaza ku lu hupulisa kuli Jehova wa lu babalela