Lipuzo Ze Zwa kwa Babali

Kana ku leka muyaho kwa bulapeli bo buñwi ni ku u fetula Ndu ya Mubuso ne ku ka bulelwa kuli ki tumelo ya mazwake?

Lipaki za Jehova hañata ba ambuka swalisano ye cwalo ni bulapeli bu sili. Niteñi, tekiso ye cwalo ya kona ku sa ba kezo ya tumelo ya mazwake. I kana y’a ngiwa fela sina tekiso ye eziwa hañwi. Puteho ya Lipaki za Jehova ha i swalisani ni bulapeli bo buñwi mwa ku yaha muyaho wa ku kopanela ni bulapeli b’o.

Ka ku ya ka mw’a ngela Jehova, tumelo ya mazwake ki nto mañi? Ha mu nyakisise ketelelo ya muapositola Paulusi: “Mu si ke mwa lwala coko i liñwi ni ba ba sa lumeli. Kakuli twaelano ki ifi ya se si lukile ni bukopo? Ni liseli li na ni kopano mañi ni lififi? Kreste u na ni kutwano mañi ni Beliale? Ni mulumeli s’a ka ikabela ki sifi ni ya si ka lumela? Tempele ya Mulimu i na ni tumelelano ifi ni maswaniso a’ lapelwa? . . . Hakubacwalo, mu zwe ku bona, mi mu kauhane, ku bulela Mulena; mu si ke mwa swala se si masila, mi ni ka mi amuhela. (2 Makorinte 6:14-17) Paulusi n’a talusañi ha n’a itusisize linzwi la “twaelano” ni la “kopano”?

Twaelano ya n’a talusa Paulusi f’o kaniti ki ku swalisana mwa bulapeli ni kwa moya ni ba ba lapela milimu mi ni ba ba sa lumeli. N’a elelize ba kwa Korinte kuli ba si ke ba “ca . . . ku za tafule ya badimona.” (1 Makorinte 10:20, 21) Kacwalo tumelo ya mazwake ki ku zwakanya bulapeli kamba ku eza twaelano ya kwa moya ni bulapeli bu sili. (Exoda 20:5; 23:13; 34:12) Haiba muyaho o n’o itusiswa ki bulapeli bu sili u lekiwa, ki ka mulelo fela wa ku bata ku fumana muyaho o tokwahala kwa ku eza Ndu ya Mubuso. Pili muyaho wo u si ka itusiswa kale sina Ndu ya Mubuso, tungwalingwali kaufela to ne tu itusiswa kwa bulapeli bwa buhata twa zwiswa. Muyaho wo ha s’o bolosozwi cwalo, kihona u ka neelwa cwale ku Jehova ka mulelo wa kuli u itusiswange fela kwa litukiso za ku mu lapela. Ha ku na kopano kamba twaelano mwahal’a bulapeli bwa niti ni bwa buhata.

Muta ku ambolwa litaba za ku leka muyaho wo, mikopano ni ba bulapeli bu sili i si ke ya eziwa hahulu mi i swanela fela ku ama kwa muyaho w’o. Ba ba li mwa puteho ya Sikreste ha ba lukeli ku libala kelezo ya Paulusi ya ku sa “lwala coko i liñwi ni ba ba sa lumeli.” Nihaike ha lu ikutwi kuli lu fita ba litumelo li sili, lu ambuka ku eza sango ni bona kamba ku hohelwa kwa bulapeli bwa bona. *

Ku cwañi puteho ha ne i ka itusisa muyaho wa ku telela wa bulapeli bu sili? Ku telela hañata ku tahisa ku kopana-kopana ni ba bulapeli b’o, ili nto ye tokwa ku ambukiwa. Niha neikaba kuli muyaho u telelwa fela fa kezahalo i liñwi, sitopa sa maeluda si lukela ku nyakisisa lisupo ze: Kana ku ka ba ni lisupo lifi kamba lifi za maswaniso a milimu kamba za bulapeli, ibe mwahali kamba fande a muyaho? Batu ba ba pila mwa silalanda ba ka l’u nga cwañi ha lu ka itusisa muyaho w’o? Kana mwa puteho ku na ni y’a kona ku sitatala ha lu ka itusisa muyaho w’ o? (Mateu 18:6; 1 Makorinte 8:7-13) Maeluda ba kalanga ku tatubisisa lisupo zeo kihona ba ka fa katulo ye swanela. Hape ba na ni ku hupula mw’a ka amelwa mazwalo a bona ni a puteho kaufela ha ba atula ka za haiba kwa swanela ku leka muyaho w’o ni ku u fetula Ndu ya Mubuso.

[Litaluso za kwatasi]

[Siswaniso se si fa likepe 27]

Muyaho wo, o n’o li sinagoge sapili, n’o lekilwe ni ku lukiswa sinca kuli u be Ndu ya Mubuso