Bayemeli ba—Bulapeli bwa Niti Ba Kale ni Ba Miteñi Ye

KANA mwa hupula libizo la munna ya n’a kile a lila muleneñi wa kale wa Jerusalema? Mwendi mu ka alaba kuli: ‘Ki Jesu,’—mi, kaniti, Jesu n’a u lilile. (Luka 19:28, 41) Kono, lilimo ze mianda-nda Jesu a si ka taha kale fa lifasi, mutanga yo muñwi ya sepahala wa Mulimu ni yena n’a lilile Jerusalema. Libizo la hae ki Nehemia.—Nehemia 1:3, 4.

Kiñi se ne si tahisize kuli Nehemia a swabe hahulu cwalo kuli mane a lile Jerusalema? N’a ezizeñi kuli a tuse muleneñi w’o ni be ne ba pila ku ona? Mi lu kona ku itutañi kwa mutala wa hae? Kuli lu alabe lipuzo zeo, ha lu nyakisiseñi ze ñwi ze n’e ezahezi mwa miteñi ya hae.

Munna wa Mukekecima ili wa Misebezi

Nehemia n’a ketilwe ku ba mubusisi wa Jerusalema, kono pili a si ka ketiwa, n’a li likwambuyu wa situlo se situna mwa kuta ya Siperesia mwa muleneñi wa Shushani. Kono ni kwa n’a ipilela hande cwalo, n’a si ka tuhela ku iyakatwa za buiketo bwa banabahabo ba Majuda be ne ba li kwahule-hule mwa Jerusalema. Mane, nto ya pili ya n’a ezize lindumeleti za Majuda ha ne li tile ku zwa kwa Jerusalema ku t’o potela Shushani n’e li ku ‘ba buza litaba za bomasialeti ba Majuda ba ba bandukile kwa butanga; ni ku ba buza za Jerusalema.’  (Nehemia 1:2) Bapoti bao ha ne ba alabile kuli batu ba mwa Jerusalema “bupilo bwa bona ki bwa manyando a matuna” ni kuli mamota a muleneñi n’a sa “bundami fafasi,” Nehemia a ‘ina fafasi, a lila, a li mwa maswabi mazazi a mañatanyana.’ Ku zwa f’o, a bonisa kuli n’a swabile ha n’a lapezi ku Jehova ku zwelela kwa pilu. (Nehemia 1:3-11) Ki kabakalañi Nehemia ha n’a swabile cwalo? N’e li kabakala kuli Jerusalema n’o li muleneñi mo ne ku lapelelwa Jehova fa lifasi, mi n’o keshebisizwe. (1 Malena 11:36) Hape, ku sinyeha kwa muleneñi w’o ne ku bonisa kuli be ne ba pila ku ona ne ba fokozi kwa moya.—Nehemia 1:6, 7.

Kabakala ku iyakatwa za Jerusalema ni ku shwela makeke Majuda be ne ba pila teñi, Nehemia n’a susuelizwe ku itombola ku ba sebeleza. Mulena wa Peresia ha n’a mu lumelelize ku ya fa pumulo, Nehemia a kalisa ku lela za ku tama musipili o mutelele wa ku ya kwa Jerusalema. (Nehemia 2:5, 6) N’a bata ku itusisa m’ata a hae, nako, ni zibo kwa ku eza musebezi o n’o tokwa ku eziwa wa ku lukisa limota. Mwa mazazinyana fela a ku fita, n’a se a lelile kale za ku lukisa limota mutumbi la Jerusalema.—Nehemia 2:11-18.

Nehemia n’a abezi mabasi a mañata musebezituna wa ku lukisa limota leo, mi kaufel’a bona ne ba nze ba sebelisana. * Likwata ze fitelela 40 ne li filwe ku lukisa “neku le liñwi” kaufel’a zona. Ne ku zwileñi mwateñi? Babeleki ba bañata-ñata cwalo—hamoho ni bashemi be ne ba tusiwa ki bana ba bona—ha ne ba sweli ku itusisa cwalo nako ni m’ata a bona, musebezi o n’o bonahala ku ba o mutuna-tuna wa t’o bonahala ku ba o konwa ku petiwa. (Nehemia 3:11, 12, 19, 20) Mwa likweli fela ze peli za ku sebeza ka t’ata, limota mutumbi la lukiswa! Nehemia n’a ñozi kuli niheba be ne ba lwanisa za musebezi wa ku lukisa limota ne ba hapelelizwe ku lumela kuli “musebezi wo, u ezizwe ki Mulimu wa luna.”—Nehemia 6:15, 16.

Mutala Wa ku Hupula

Nehemia n’a si ka itusisa fela nako ni zibo ya hae ya ku onga-onga lika. Hape n’a itusisize ni sifumu sa hae kuli a tuse bulapeli bwa niti. N’a itusisize mali a hae kuli a liulule banabahabo ba Majuda kwa butanga. N’a kolotisanga masheleñi a hae a sa bati ku fiwa a fahalimu. N’a sa ‘cangi’ za sicaba ka ku bata kuli a fiwe tuelo ya bubusisi, ili nto ya n’a lukela ku fiwa. Kono n’a fepanga ‘banna ba ba eza 150, ku beya ba bañwi be ne ba tile ku luna.’ Zazi ni zazi, n’a fanga baeñi ba hae ‘komu i li ñwi, lingu ze 6 ze nde-nde, ni linyunywani.’ Hape, hañwi mwa mazazi a lishumi, n’a ba fanga “veine ye ñata ya mifuta kaufela”—mi zeo kaufela ki yena ya n’a li lifelanga.—Nehemia 5:8, 10, 14-18.

Nehemia n’a tomezi batanga kaufela ba Mulimu ba kale ni ba miteñi ye mutala o munde luli wa bufani! Mutang’a Mulimu ya bundume y’o n’a itusisize sifumu sa hae ku si na tifo ni ka ku itatela kuli a tuse babeleki ilikuli a zwisezepili bulapeli bwa niti. Ka swanelo, n’a kona ku kupa Jehova kuli: “Wena Mulimu wa ka, u hupule ku ni eza hande, kabakala ze ni ezelize sicaba se kaufela.” (Nehemia 5:19) Jehova kaniti u ka eza honacwalo.—Maheberu 6:10.

Mutala wa Nehemia Wa Latelelwa Kacenu

Kwa susueza ku bona kuli batu ba Jehova kacenu ni bona ba bonisa moya o munde, ku sebeza ka ku itatela, ni ku ba ni moya wa buitomboli wa ku seheza bulapeli bwa niti. Ha lu utwa kuli balumeli ba bañwi ba mwa manyando, lu iyakatwa hahulu za buiketo bwa bona. (Maroma 12:15) Sina Nehemia, lu kupa Jehova ka tapelo kuli a tuse mizwale ba luna mwa tumelo ba ba nyanda, ili ku mu kupa kuli: ‘Lwa ku lapela, zebe ya hao i teeleze tapelo ya mutang’a hao, ni tapelo ya batanga ba hao ba ba tabela ku saba Libizo la hao.’—Nehemia 1:11; Makolose 4:2.

Niteñi, ku iyakatwa za buiketo bwa kwa moya ni bwa kwa mubili bwa mizwale ba luna ba  Sikreste ni ku zwisezapili bulapeli bwa niti ha ku lu ami fela kwa maikuto. Hape ku lu susueza ku eza se siñwi. Ba ba kona ba susuezwa ki lilato ku siya mandu a bona mo ne ba pila hande mi, sina Nehemia luli, ba ya kwa libaka ze ñwi ilikuli ba y’o tusa ba ba mwa butokwi. Ka ku sa paleliswa ki miinelo ya bupilo ye siyo hande hahulu yeo baitateli bao ba kana ba fumana mwa libaka ze ñwi za lifasi, ba seheza ku zwelapili kwa bulapeli bwa niti, ili ku sebeza hamoho ni mizwale ba bona ba Sikreste. Moya wa bona wa buitomboli o ba bonisa kaniti ki o munde.

Ku Sebeza Bukaufi ni K’o Lu Pila

Kwa utwahala kuli buñata bwa luna ha lu koni ku tutela kwa sibaka se siñwi. Lu seheza bulapeli bwa niti mabapa ni ko lu pila. Taba yeo ni yona i bonisizwe mwa buka ya Nehemia. Mu lemuhe ze ñwi z’a ekeza Nehemia ka za mabasi a mañwi a sepahala a n’a ezize musebezi wa ku lukisa limota. N’a ñozi kuli: ‘Jedaya mwan’a Harumafi, a lukisa ku libana ni ndu ya hae. . . . Benjamine, ni Hashubu, a lukisa ku bapana ni ndu ya bona. Kwapil’a bona, kwa lukisa Azaria mwan’a Maaseya, mwan’a Anania, ku bapana ni ndu ya hae.’ (Nehemia 3:10, 23, 28-30) Banna bao ni mabasi a bona ne ba tusize hahulu mwa ku zwisezapili bulapeli bwa niti ka ku eza kalulo ya bona ya musebezi wa ku lukisa limota mabapa ni ko ne ba pila.

Kacenu, ka linzila ze ñata, buñata bwa luna lu seheza bulapeli bwa niti mwa libaka mo lu  pila. Lu tusa mwa misebezi ya ku yaha Mandu a Mubuso, mwa ku tusa ba ba tahezwi ki likozi mi, sa butokwa hahulu ni ku fita, ni mwa musebezi wa ku shaela za Mubuso. Hape, ne lu kana lwa kona ku eza ka butu misebezi ya ku yaha kamba ku tusa ba ba tahezwi ki likozi, kamba ne lu kana lu sa koni ku i eza. Kono kaufel’a luna lu lakaza ha buniti ku seheza bulapeli bwa niti ka tutu ya luna, sina Nehemia ha n’a ezize cwalo ka bufani mwa miteñi ya hae.—Mu bone sikwenda se si li “Mifuta ya ku Fana kwa ka ku Itatela.”

Ku fumana masheleñi a tokwahala a ku lifela misebezi ya luna ya ku hatisa, ku tusa ba ba tahezwi ki likozi, ni misebezi ye miñwi ye miñata ye eziwa mwa lifasi kaufela fokuñwi ku kana kwa bonahala ku ba ko ku t’ata hahulu. Kono mu si libali kuli musebezi wa ku lukisa limota le lituna la Jerusalema ni ona n’o bonahezi ku ba o mutuna hahulu. (Nehemia 4:10) Kono bakeñisa kuli musebezi w’o n’o abezwi mabasi a mañata a n’a lata ku tusa, n’o petilwe. Ka ku swana kacenu, ku fumana mali a tokwahala a ku peta misebezi ya luna ya mwa lifasi kaufela ku ka zwelapili ku konahala ibile fela mañi ni mañi wa luna a zwelapili ku peta kalulo ya hae ya musebezi.

Sikwenda se si li “Linzila Zeo ka Zona Ba Bañwi Ba Iketela ku Fana” si bonisa linzila li sikai zeo ka zona musebezi wa Mubuso u kona ku sehezwa ku za mali. Mwa silimo se si felile, ba bañata kwa batu ba Mulimu se ba tusize ka nzila  yeo, mi Sitopa Se Si Etelela sa Lipaki za Jehova si bata ku itusisa kolo ye ku itebuha hahulu ku be ne ba susumelizwe ki lipilu za bona ku fana ka ku itatela. Sa butokwa ka ku fitisisa kikuli, lu itebuha ku Jehova kakuli u fuyozi hahulu buikatazo bwa ka pilu kaufela bwa batu ba hae bwa ku seheza bulapeli bwa niti mwa lifasi kaufela. Ee, ha lu yeya m’o Jehova a lu etelelezi mwa lilimo ze felile, lwa susuezwa ku kutela ku bulela manzwi a Nehemia, ya n’a bulezi ka buitebuho kuli: “Mo ne li inezi ku na, lizoho le li musa la [Muñ’a] Bupilo Mulimu wa ka.”—Nehemia 2:18.

[Litaluso za kwatasi]

[Mbokisi/Maswaniso a fa likepe 28, 29]

Linzila Zeo ka Zona Ba Bañwi Ba Iketela ku Fa

LINUBU ZA MUSEBEZI WA MWA LIFASI KAMUKANA

Ba bañata ba beyanga mali mwa mambokisi a linubu a ñozwi kuli “Linubu za Musebezi wa mwa Lifasi Kaufela—Mateu 24:14.”

Ka kweli, liputeho li lumelanga mali ao kwa sibaka se situna sa tamaiso sa Lipaki za Jehova kwa Brooklyn, ye mwa New York, kamba kwa ofisi ya mutai ya mwa naha. Linubu za ka ku itatela hape li kana za lumelwa kwa Ofisi ya Mubuluki wa Sikwama, Watch Tower Bible and Tract Society of Pennsylvania, Box 33459, Lusaka 10101, kamba kwa ofisi ya mutai ye mwa naha ya habo mina. Lika za bukabali kamba ze ñwi cwalo za butokwa ni zona za kona ku fiwa. Liñolo le li talusa ka bukuswani kuli zeo ki limpo za ka ku itatela li lukela ku tahelela ni linubu zeo.

MILELO YA KU FANA

Kwand’a linubu za mali ze fiwa ku felelwa, ku na ni mifelo ye miñwi ye tusa sebelezo ya Mubuso mwa lifasi kamukana. Yeo i kopanyeleza:

Mali a Silelezo: Watch Tower Society ya kona ku fiwa ku amuhela mali a n’a bulukezwi ku itusiswa ka nako ya likozi kamba mali a fiwa mutu ya tuhela musebezi.

Mali A Bulukiwa mwa Panga: Mali a bulukiswa mwa panga, mapampili a mali a bulukisizwe, kamba mali a fiwa mutu ya tuhela musebezi a kona ku beiwa mwa pabalelo ya Watch Tower Society kamba ku fiwa Society fa lifu, ka ku ya ka ze i tokwa panga.

Ma-Stock ni Ma-Bond: Ma-stock ni ma-bond a kona ku fiwa kwa Watch Tower Society sina mpo ye felelwa.

Miyaho ya ka Butu: Miyaho ya ka butu ye kona ku lekiswa ya kona ku fiwa kwa Watch Tower Society ka ku i felela sina nubu kamba ka ku i bulukela mufani, ya kona ku zwelapili ku pila teñi ku fitela a shwa. Mu ñolele kwa ofisi ya mutai mwa naha ya habo mina pili mu si ka fanisa kale muyaho wa mina.

Ma-Will ni ma-Trust: Tutu kamba mali a kona ku fiwa kwa Watch Tower Society ka ku itusisa will (pampili ye bonisa mwa batela mutu kuli libyana za hae li abelwe ha s’a shwile) ye ñozwi ka mulao, kamba Watch Tower Society ya kona ku kalimiwa nto ye ñwi kuli i itusise yona, ili nto ye bizwa trust. Trust ye fiwa kwa kopano ya bulapeli i kona ku tahisa kuli mutu a si ke a telela lika ze ñwi.

Sina pulelo ya “milelo ya ku fana” ha i talusa, linubu ze cwalo li tokwa hahulu kuli mufani a nahanisise hande. Haiba mu itakaleza ku fana mwa tukiso ifi kamba ifi ya linubu za ka ku itatela, mu lizeze luwaile kamba ku ñolela kwa Ofisi ya Mubuluki wa Sikwama ka ku itusisa keyala ye bonisizwe kwatasi kamba kwa ofisi ya Lipaki za Jehova ye mwa naha ya mina.

Treasurer’s Office

Watch Tower Bible and Tract Society of Pennsylvania

Box 33459, Lusaka 10101

Telephone: (01) 272062

[Mbokisi fa likepe 30]

Mifuta ya ku Fana kwa ka ku Itatela

Mwa liñolo la n’a ñolezi Makorinte, muapositola Paulusi n’a bulezi za mifuta ye milalu ya butokwa ya za ku fana kwa ka ku itatela. (1) Ha n’a ñola ka za likoleko, Paulusi n’a laezi kuli: “Ka lizazi la pili la sunda, mutu ni mutu ku mina a beye kwatuko ku yena, s’a kopanyize.” (1 Makorinte 16:2a) Kacwalo, ku fana ku tokwa ku eziwa cimo, mi ku tokwa ku eziwa ka mukwa o lukisizwe hande. (2) Paulusi hape n’a ñozi kuli mutu ni mutu u lukela ku fana “ka tikanyo ya s’a filwe.” (1 Makorinte 16:2b) F’o ki ku talusa kuli mutu ya bata ku fana kwa ka ku itatela wa kona ku eza cwalo ka mw’a fumanela. Ku si na taba kuli Mukreste u fumana mali a manyinyani, mali a manyinyani a n’a ka fana kwa mali a hae a itebuhiwa hahulu ki Jehova. (Luka 21:1-4) (3) Paulusi hape n’a ñozi kuli: “Mutu ni mutu a zwise mw’a hupulezi mwa pilu ya hae, isi ka ku bilaela, kamba ka ku hapelezwa; kakuli Mulimu u lata ya fana a tabile.” (2 Makorinte 9:7) Bakreste ba niti ba fana ku zwelela kwa pilu—ka tabo.

[Maswaniso a fa likepe 26]

Nehemia n’a li munna wa mukekecima ili wa misebezi

[Maswaniso a fa likepe 30]

Linubu za ka ku itatela li itusiswa kwa misebezi ya ku hatisa, ku tusa ba ba tahezwi ki likozi, ku yaha Mandu a Mubuso, ni kwa misebezi ye miñwi ye tusa ye eziwa mwa lifasi kaufela