Piho ya Bashaeli ba Mubuso

Mandu a Mubuso Ki Libaka za Nyangela

JESU KRESTE ha n’a luta balutiwa ba hae ka za mwa ku ezeza bukombwa bwa fa nyangela, n’a ba susuelize kuli: “Mu . . . shaele mu yemi fa lituwa za mandu.” (Mateu 10:27) Ee, bukombwa bwa bona bwa Sikreste ne bu na ni ku ezezwa fa nalela, fapil’a nyangela. Ku likana ni taluso ya kelezo yeo, musebezi wa Lipaki za Jehova ni ona u ezezwa fa nalela. Musebelezo wa fa nyangela w’o, u konisize Lipaki kuli ba tule likanyezo ni kuli ba fite fa ku ngiwa hande.

Nihaike kuli mañi ni mañi u lukuluhile ku ya kwa mikopano ya puteho ya Lipaki za Jehova, saluluti si zina-zinisize ba bañwi ku kena mwa Ndu ya Mubuso. Mi yeo ki taba ye sweli ku ezahala ni mwa naha ya Finland. Ba bañwi ba na ni fela ni boi bwa ku kena mwa libaka ze ba sa zibi hande. Hañata ha ku yahiwa Ndu ya Mubuso ye nca kamba ha ku lukiswa sinca muyaho wa kale, kwa eziwanga tukiso ya kuli nyangela i pota-pote kwa sibaka seo. Ne ku kana kwa ezwa buikatazo bo butuna bwa ku mema batu ba bañwi kuli ba to pota kwa Ndu ya Mubuso ni kuli ba zibe misebezi ya Lipaki za Jehova.

Mwa silalanda se siñwi, Lipaki ne ba lukisize mungendenge wa ku abela limagazini fa lizazi le ne li tomilwe kuli nyangela i pote kwa Ndu ya Mubuso ye nca. Lipaki ba bañwi ba babeli ne ba katani munna-muhulu ya n’a ize wa ikolanga ku bala limagazini za Tora ya ku Libelela ni Awake! Mizwale bao ba mu taluseza za tukiso yeo ye ezelizwe nyangela ili ya ku pota kwa Ndu ya Mubuso ye nca, mi ba ifana ku mu isa kwateñi. Munna y’o a bulela kuli n’a ka tabela ku ya ni bona. Musal’a hae a man’o teeleza kwa puhisano yeo, a kalumuka kuli, “Mu si ni siyi!”

Ha se ba keni mwa Ndu ya Mubuso, wa munna a talima-talima mi a li: “Haki ye nsu. Mane ya buheha mi liseli ki le. Ne ni bulelezwi kuli Ndu ya Mubuso ne i ka ba ye nsu!” Bo mutu ni musal’a hae bao ba ina nakonyana mi ba kupa kwa libuka ze n’e li fo ku beiwa libuka ze abelwanga.

Puteho ye ñwi ne i bata ku zibahaza mwa mutende wa mwa silalanda sa yona kuli ne ku ka ba ni tukiso ye ezelizwe nyangela ya ku potela Ndu ya Mubuso fa lizazi la kakulo. Kono yo muhulu wa mutende w’o ha n’a utwile za kezahalo yeo, a akaleza kuli ku ñolwe taba ya kezahalo yeo, ye n’e ka hatiswa mwa mutende. Mizwale ba lumela, mi nakonyana fela kwa hatiswa taba ye tabisa mwa mutende ili ye n’e kwanile licika la likepe. Taba yeo ne i bulela za kezahalo yeo ni ku talusa mo i sebeleza puteho yeo ya Lipaki za Jehova.

Taba yeo ha se i hasanyizwe, Paki yo muñwi wa musupali n’a katani mutu ya yahile mwa sibaka se si swana ya n’a mu bulelezi kuli: “Kacenu mwa mutende ne ku na ni taba ye tabisa ye n’e bulela za Lipaki za Jehova!” Kaizeli y’o n’a kutalize mutu y’o mi hamulaho a mu siyela broshuwa ya Lipaki za Jehova mwa Lilimo za Mwanda wa Mashumi a Mabeli.

Kwand’a ku felisa mihupulo ye fosahezi ka za Lipaki za Jehova, litukiso zeo za kuli nyangela i pote kwa Mandu a Mubuso ili ze ama ni ku kakulwa kwa Mandu a Mubuso, li zusulusize cisehelo ya bahasanyi ka ku ba susueza ku memela batu ba bañata kwa mikopano. Ee, mwa linaha ze ñata hamohocwalo ni mwa Finland, batu se ba lemuhile kuli Mandu a Mubuso a Lipaki za Jehova ki libaka za nyangela.