Buikatazo Bo Bu Zwisezapili Muzamao O Munde

Kwa mafelelezo a 2001, be ne ba teelelize kwa Wayalesi ya kwa Mozambique ne ba utwile zibiso ye:

“Mueteleli wa naha n’a potezi ofisi ya mutai ya Lipaki za Jehova kwa Maputo. N’a susuelize balapeli bao kuli ba tiiseze buikatazo bwa bona bwa ku hulisa muzamao o munde mwa mabasi ni bwa ku luta ba bahulu ku bala ni ku ñola. Batu ba ba bat’o eza 10,000 se ba tusizwe kale ki tukiso yeo. Mueteleli Chissano n’a ize, litukiso ze cwalo li lukelwa ku babazwa bakeñisa kuli li tusa hahulu batu ka ku tatulula matata a ku sa ituta a s’a li teñi mwa naha.”

Zibiso yeo ne i zwezipili ka manzwi a mueteleli wa naha y’o, a n’a beilwe fa tepu, a’ li: “Kwa susueza luli ku bona batu ba bañata ba ba tabela ku ituta ku bala ni ku ñola. Seo si lu bonisa kuli batu ba mwa naha ye ba ka lu tusa ku luta ba bañata ku bala ni ku ñola. Kacwalo, ni bata fela ku susueza Lipaki za Jehova kuli ba tiiseze tukiso ya bona ya ku luta batu, mwa puo ifi kamba ifi. Sa butokwa luli kikuli batu ba zibe ku bala ni ku ñola kuli ku ba bele bunolo ku eza cwalo mi kwapili ba kone ku zwisezapili tuto.”

Mwa Mozambique, Lipaki za Jehova ba zamaisa likolo za ku ituta ku bala ni ku ñola mwa libaka ze 850 ilikuli ba tuse batu ku ipalela Linzwi la Mulimu. Hape, ba zamaisa lituto za Bibele ze si na tifo ze bat’o ba ze 50,000 ka viki. Zeo kaufela ki kalulo ya tukiso ya ku luta Bibele mwa lifasi kamukana ye eziwa cwale mwa linaha ze 235. (Mateu 24:14) Ni mina mwa kona ku fumana tuso kwa tukiso ye. Mu lukuluhe ku zibisa Lipaki za Jehova ba ko mu pila.