Lipuzo Ze Zwa kwa Babali

Kana buitamo bo bu itamiwa ku Mulimu kamita bu na ni ku petiwa?

Ka ku ya ka Mañolo, buitamo ki sepiso ye tiile ku Mulimu ya ku eza nto ye ñwi, ku fana nto ye ñwi, ku eza musebezi kamba ku kena mwa muinelo o muñwi, kamba ku ambuka lika ze ñwi ze si ka fosahala. Mwa Bibele ku ñozwi za buitamo b’o batu ne ba itamile ka luci kuli Mulimu ha n’a ka eza nto ye ñwi pili, ni bona ne ba ka peta buitamo b’o. Ka mutala, Anna, m’ahe mupolofita Samuele, ‘n’a itamile ka luci, a li: Mawe Muñ’a Bupilo wa limpi, kabe u sa libali mutang’a hao, mi wa fa mutang’a hao mwan’a mushimani; fo ni ka mu fa Muñ’a Bupilo mazazi kaufela a bupilo bwa hae, mi mbeli ha i na ku mu beula kwa toho.’ (1 Samuele 1:11) Bibele hape i bonisa kuli buitamo bu ezwa ka ku itatela. Kana buitamo ku Mulimu bu na ni ku petiwa kamita?

Mulena Salumoni wa Isilaele ya kwaikale n’a ize: “Ha u itama ku Mulimu ka buitamo, u si ke wa lieha ku bu eza.” Hape a li: “Eza ka buitamo b’o itamile ka bona. Se sinde kikuli u si ke wa itama, isi kuli u itame mi u palelwe ku lifa.” (Muekelesia 5:4, 5) Mulao o n’o filwe ku Isilaele ka Mushe n’o ize: “Ha u itamile ka luci ku [Muñ’a] Bupilo Mulimu wa hao, u si ke wa liyeha ku eza za buitamo bwa hao; kakuli [Muñ’a] Bupilo Mulimu wa hao u ka li buza ku wena; mi sibi si ka ba teñi ku wena ha u ka liyeha.” (Deuteronoma 23:21) Kacwalo, ku eza buitamo ku Mulimu ki nto ye tuna. Bu swanela ku eziwa ka libaka le linde, mi ya bu eza u swanela ku ikolwisa kuli wa kona luli ku eza za sepisize mwa buitamo bwa hae. Hakusicwalo, se sinde ki ku sa eza buitamo. Kono kana buitamo kaufela ha se bu ezizwe bu na ni ku petiwa?

Ku cwañi ha ne ku ka fumaneha hasamulaho kuli buitamo bo bu ezizwe ki bwa ku eza nto ye sa lumelelani ni tato ya Mulimu? Ku cwañi haiba ki buitamo bo bu swalisanisa muzamao o maswe ni bulapeli bwa niti? (Deuteronoma 23:18) Kaniti, buitamo bo bu cwalo ha bu si ka tameha ku petiwa. Mane mwa Mulao wa Mushe, buitamo bo ne bu ezwa ki musali ne bu kona ku feliswa ki ndat’ahe kamba munn’a hae.—Numere 30:3-15.

Hape mu nahane mutu ya ezize buitamo ku Mulimu bwa ku ba likwasha kono cwale u ipumana mwa silikwalikwani. U ikutwa kuli mwa ku peta buitamo bwa hae, u mwa kozi ya ku loba milao ya Mulimu ya muzamao. Kana u swanela ku tundamena ku peta buitamo bwa hae? Kana ne ku si ke kwa ba hande ha n’a ka ikupela ku Mulimu kuli a mu shwele makeke ni ku mu swalela kwa ku sa eza za buitamo bwa hae, kuli a pime mulatu wa ku eza buhule? Ki ku yena muñi ku ziba za ku eza. Ha ku na mutu ya kona ku mu ezeza katulo yeo.

Ku cwañi mutu ha n’a ka fumana kuli n’a ezize buitamo ka ku sa nahanisisa? Kana u sa tokwa ku peta buitamo b’o? Jefita ne ku mu bezi t’ata ku peta buitamo bwa n’a itamile ku Mulimu, kono kabakala lizwalo la hae, n’a bu ezize. (Baatuli 11:30-40) Mutu ha palelwa ku peta buitamo bwa hae, Mulimu  wa kona ku mu “halifela” ni ku sinya misebezi y’a ezize mutu y’o. (Muekelesia 5:6) Ku nga ka likesha taba ya ku peta buitamo ku kona ku tisa kuli Mulimu a zwise muhau wa hae.

Jesu Kreste n’a ize: “Kono mulomo wa mina u be e, e; awa, awa; se si ekezwa, si zwa ku ya maswe.” (Mateu 5:37) Mukreste u lukela ku iyakatwa ku eza buitamo bwa hae ku Mulimu ni ku sepahala ku z’a bulela kaufela—ku Mulimu ni kwa batu. Ku cwañi ha n’a ka fumana kuli tumelelano ya n’a ezize ni mutu yo muñwi, ye n’e bonahala ku ba ye nde pili, hamulaho wa ku i tatubisisa ha i sa li cwalo? H’a swaneli ku keshebisa litaba ze cwalo. Kono ka ku buhisana hande lika, mutu yo muñwi y’o a kana a mu lukulula kwa buitamo bwa hae.—Samu 15:4; Liproverbia 6:2, 3.

Ka za buitamo ni lika ze ñwi kaufela, ki nto mañi ye lu swanela ku tokomela? Ha lu bateñi kamita ku ba ni silikani se sinde ni Jehova Mulimu.

[Maswaniso a fa likepe 30, 31]

Anna n’a si ka zina-zina ku peta buitamo bwa hae

[Maswaniso a fa likepe 30, 31]

Nihaike kuli ne ku li t’ata, Jefita n’a petile buitamo bwa hae