“Mu Tahe ku Na . . . , Mi ni Ka Mi Imulula”

“Mu Lise Mutapi wa Mulimu”

“Mwa lu teelezanga kamita ni ku lu taluseza manzwi a susueza a mwa Bibele.”—Pamela.

“Lwa itumela ku ze mu lu ezeza kaufel’a luna. Mwa lu susueza luli.”—Robert.

BO PAMELA ni Robert ne ba ikutwile kuli ne ba swanela ku ñolela maeluda ba Sikreste ba mwa liputeho za habo bona manzwi ao a buitebuho. Ba bañwi hape mwahal’a batanga ba Mulimu mwa lifasi kaufela ba itumela kwa tuso ni pabalelo ye ba zwelapili ku fiwa ki ‘ba ba lisa mutapi wa Mulimu.’ (1 Pitrosi 5:2) Kaniti, batu ba Jehova ba itumela kwa lika ze ñata ze ba ezezwa ki maeluda ni nzila ye ba li eza ka yona.

‘Ku Tiisa Kamita Musebezi’

Maeluda ba Sikreste ba filwe misebezi ye miñata ya ku eza. (Luka 12:48) Ba itukiseza lingambolo za kwa mikopano ya puteho ni ku kutaza taba ye nde ya Mubuso wa Mulimu kwa batu. Misebezi ya bona i kopanyeleza misipili ya bulisana kwa balumeli ba bañwi. Maeluda ba tokomelanga ba ba na ni butokwi bo butuna, inge cwalo basupali ni ba bañwi cwalo, mi hape ba nze ba babalela mabasi a bona kwa moya ni kwa mubili. (Jobo 29:12-15; 1 Timotea 3:4, 5; 5:8) Maeluda ba bañwi ba tusa kwa ku yaha Mandu a Mubuso. Ba bañwi ba mwa Tutengo twa Kutwano ni ba Sipatela ni mwa Likwata za ku Potela Bakuli. Mi ba bañwi ba bañata ba ezanga misebezi ya ku itatela kwa mikopano ye mituna. Kaniti maeluda ba ‘tiisa kamita musebezi wa Mulena.’ (1 Makorinte 15:58) Ki lona libaka maeluda ba ba sebeza ka t’ata cwalo ha ba itebuhiwa hahulu ki ba ba li mwatas’a bona!—1 Matesalonika 5:12, 13.

Maeluda ba ba potelanga kamita Bakreste ba bañwi fa mandu a bona kamba ko kuñwi cwalo ilikuli ba ba tiise kwa moya ba susueza luli. Thomas, ya n’a hulile a si na bondat’ahe fa lapa, n’a ize: “Kambesi tuso ni susuezo ya maeluda, ha ni sepi kuli ne ni ka sebeleza Jehova sina sikombwa sa ka nako ye tezi kacenu.” Mikulwani ba bañata ba ba utilwe ki mushemi a li muñwi ba bulelanga kuli se ne si ba tusize ku itama silikani ni Mulimu ki susuezo ye ne ba filwe ki maeluda.

Basupali mwa puteho ni bona ba itebuha hahulu misipili ya bulisana. Bosinyalana ba bañwi ba ba li balumiwa ba ba mwa lilimo za ma-85 ha se ba potezwi ki maeluda ba babeli, ne ba ñozi  kuli: “Lwa itumela kwa ku lu potela ko ne ku lu tabisize hahulu. Ha se mu fundukile, se lu bala mañolo ani e ne mu lu balezi. Ha lu na ku libala ni hanyinyani manzwi a mina a’ susueza.” Mbelwa yo muñwi wa lilimo ze 70 n’a ñolezi maeluda kuli: “Ne ni sweli ku lapela ku Jehova kuli a ni tuse, mi sa luma mina mizwale ba babeli kwa lapa la ka. Ku taha kwa mina ne li mbuyoti ye zwa ku Jehova!” Kana cwanoñu fa mu tusizwe ki maeluda ba mwa puteho ya mina be ne ba tilo mi potela? Kaniti, kaufel’a luna lwa itebuha musebezi wa bona wa ku lisa mutapi wa Mulimu o mwatas’a bona!

Balisana Ba Ba Likanyisa Mulimu ni Kreste

Jehova ki Mulisana ya lilato. (Samu 23:1-4; Jeremia 31:10; 1 Pitrosi 2:25) Jesu Kreste ni yena ki Mulisana yo mutuna wa kwa moya. Mane u bizwa “mulisana yo munde,” ni “Mulisana yo mutuna.” (Joani 10:11; Maheberu 13:20; 1 Pitrosi 5:4) Jesu n’a ngile cwañi be ne ba bata ku ba balutiwa ba hae? N’a ba memile ka lilato kuli: “Mu tahe ku na mina kamukana ba ba katezi, ba ba imezwi, mi ni ka mi imulula.”—Mateu 11:28.

Maeluda ni bona kacenu ba ikataza ku imulula ni ku sileleza mutapi. Banna bao ba swana ‘sina mukunda ha ku fuka moya, ni sina sisabelo ha ku taha liñungwa; sina linuka ze isa mezi mwa naha ye omile, ni sina muluti wa licwe le lituna mwa naha ye shukezwi mezi.’ (Isaya 32:2) Basilelezi ba ba lilato bao ba imulula ni ku kutekiwa ki mutapi, ni ku latiwa ki Mulimu.—Mafilipi 2:29; 1 Timotea 5:17.

Tuso Ye Tuna ya Basali ba Bona

Batu ba Mulimu ba itebuha maeluda ba Sikreste ni tuso ye lilato ye ba fiwa banna bao ki basali ba bona. Kuli ba tuse banna ba bona, basali bao hañata ba na ni ku itombola lika ze ñwi. Fokuñwi, ba siyalanga fa lapa banna ba bona ha ba nze ba talima za puteho kamba ku eza misipili ya bulisana. Fokuñwi, za ka butu ze lelilwe ka tokomelo li beiwanga kwatuko kuli ku talimwe kapili-pili za butata bo bu zuhile mwa puteho. Michelle u li: “Nihakulicwalo, ha ni bona kuli bo munn’a ka ba patehile ku itukiseza mikopano kamba ku eza misipili ya bulisana, ni hupulanga kuli ba eza musebezi wa Jehova, mi na likanga luli ku ba tusa.”

Cheryl, hape ya nyezwi ku eluda, n’a ize: “Na ziba kuli mizwale ni likaizeli mwa puteho ba tokwa ku ambola ni maeluda, mi ni bata kuli ba ikutwe kuli ba kona ku ambola ni bo munn’a ka nako ifi kamba ifi ye ba bata.” Basali ba ba tusa, ba ba swana sina bo Michelle ni Cheryl, ba itatela ku itombola lika ze ñwi ilikuli banna ba bona ba babalele lingu za Mulimu. Basali ba maeluda ba itebuhiwa kwa tuso ya bona.

Kono eluda ya patehile ha lukeli ku kasheza kwatuko butokwi bwa kwa moya ni kwa mubili bwa musal’a hae ni bana ba hae. Eluda ya nyezi u lukela ku ba “munna ya sa nyazahali, ya nyezi musali a li muñwi, ya na ni bana ba ba lumela, ba ba sa nyazwi ka mifilifili kamba ka bungulunde.” (Tite 1:6) U lukela ku babalela lubasi lwa hae ka nzila ya silumeli ye tokwiwa ka Mañolo kwa baokameli ba Sikreste.—1 Timotea 3:1-7.

Ku eluda ya patehile, musali ya mu tusa ki wa butokwa hahulu! Maeluda ba ba nyezi ba ba nahanisisa lika ba ikutwa cwalo. Ku swana fela sina mo i bulelela Bibele kuli: “Ya fumani musali wa luli u fumani nto ye nde.” (Liproverbia 18:22) Ka manzwi ni ka likezo, maeluda ba ba cwalo ba itebuha basali ba bona ka pilu kaufela. Kwand’a ku lapelanga ni ku ezanga hamoho tuto ye tabisa, bosinyalana ba Sikreste bao ba tomanga nako ya ku ikola lika ze cwale ka ku zamaya-zamaya ni ku pota-pota hamoho. Ee, maeluda ba fumana tabo mwa ku babalela basali ba bona ka lilato.—1 Pitrosi 3:7.

Maeluda ba ba lisa mutapi wa Mulimu ka lilato ba imulula kwa moya batu ba Jehova. Kaniti ki “batu ba ba li limpo” ba ba tusa puteho!—Maefese 4:8, 11-13, NW.