Fa Tafule ya Muzamaisi
Fa Tafule ya Muzamaisi
BATU ba bande, lico ze tabusa, ni makande a mande li tahisa kuli lico ze celwa fa tafule ya muzamaisi wa sisepe li be ze tabusa. Kono puhisano ye n’e bile fa tafule ya Muzamaisi Robert G. Smith, wa mwa kampani ya lisepe ye bizwa White Star Line, n’e li ya za mukiti wa za kwa moya.—Isaya 25:6.
Ka 1894, Robert ha n’a li wa lilimo ze 24, n’a zamaisize sisepe se si bizwa Kinclune of Dundee, ili ku tama cwalo musipili wa hae wa pili wa ku potoloha lifasi. Hamulaho, a ba muzamaisi wa lisepe za kampani ya White Star, ili lisepe ze cwale ka Cedric, Cevic, ni Runic. * Ha n’a nze a sila liwate la Atlantic ku zwa kwa New York ku ya kwa Liverpool, ye mwa England, ka ku itusisa se siñwi sa lisepe zeo, Robert n’a inzi ni Charles Taze Russell fa tafule ya hae ya buzamaisi. Puhisano ya hae ni Russell ne i tahisize kuli Robert a tabele lushango lwa Bibele, mi kuli a mu tuse ku ituta ze ñata, Russell a mu fa libuka za Studies in the Scriptures.
Russell a zwelapili ku ñolelanga Robert mañolo, mi kacwalo, Robert a tabela hahulu lushango lwa Bibele. Robert a taluseza musal’a hae zibo ya n’a sa zo ituta. Hamulahonyana, sibeli sa bona ba fita fa ku ba Baituti ba Bibele ba batuna, ka mo ne ba bizezwa Lipaki za Jehova miteñi yeo. Hamulaho, Robert a ba ni tohonolo ya ku fa lingambolo za Bibele. Ka mutala, kwa Brisbane, mwa Australia, n’a file ngambolo ye li “The Balm of Gilead” (Mafula a Milyani ya Giliadi) ni ku bonisa lushango lo lu mwa Linzwi la Mulimu lo lu li “kalafo ya matata kamukana a mwa lifasi.” Mwa England, n’a tusizwe ki musal’a hae ni bana ba hae ku bonisa filimu ya “Photo-Drama of Creation.” Ne ba mu tusize ku liza matapa fo ne ku beilwe manzwi a Russell a n’a zamaelela ni maswaniso ao a n’a boniswa.
Robert n’a siyezi bana ba hae sanda sa niti ya za Mubuso ya n’a amuhezi. Kacenu le, ha se ku fitile masika a’ ketalizoho, b’a 18 ba mwa lubasi l’o ba patehile ku kutaza taba ye nde ku ba bañwi, ili ku itumela ze n’e sulilwe fa tafule ya muzamaisi wa sisepe yani.
Ka lihatiso za bona ni ka musebezi wa bona wa ku luta za Bibele, Lipaki za Jehova ba sweli ku tusa batu mwa lifasi kamukana ku ituta lushango lwa Bibele, ili lo ne lu tabisize hahulu Muzamaisi Smith. Ni mina mwa kona ku batisisa ze n’e tabisize cwalo fa tafule ya muzamaisi y’o.
[Litaluso za kwatasi]
^ para. 3 Sisepe se si swana ni seo, sona sa Titanic, se ne si zamaiswa ki Muzamaisi E. J. Smith (haki mutu ni wahabo) ni sona ne si li mwa musipili wa sona wani o n’o tisize kozi.
[Siswaniso se si fa likepe 8]
Robert G. Smith
[Siswaniso se si fa likepe 8]
Charles T. Russell