Ku Fa Zeo Mutu A Sa Koni

“HA NI na taba ni ko mu ka ni biza kuli ni mukupi. Ze ni kupa ki za Jesu.” Manzwi a’ tongola buniti ao a n’a bulezwi ki sikombwa sa Protestanti a bonisa kañi ye kolota ye ama taba ya ku lifela bulapeli mali. Bulapeli bo bu tomile ka ku tiya, ka mo ku bonahalela bu kona fela ku yema ha bu lifelwa mali a mañata. Lituwelo li tokwa ku lifiwa, litempele li tokwa ku yahiwa ni ku lukiswanga, mingendenge ya evangeli i tokwa ku lifelwa. Mali a’ tokwahala a swanela ku fumanwa cwañi?

Kwa likeleke ze ñata, a fumanwa ka ku lifanga nto i liñwi ku ze lishumi. * Mukutazi ya bizwa Norman Robertson u li: “Ku lifisa nto i liñwi ku ze lishumi ki mukwa wa Mulimu wa ku lifela ka ona mubuso wa Hae fa lifasi. Ki yona koleko ya Hae ye konahalisa Evangeli ku kutaziwa.” Ka ku sa swaba ku hupulisa balutiwa ba hae tamo ya bona ya ku fana, u koñomeka kuli: ‘Haki kuli mutu konji h’a kona kihona a ka zwisa nto i liñwi ku ze lishumi. Bufani b’o ki kezo ya ku ipeya ku utwa. Ku sa zwisa nto i liñwi ku ze lishumi ki ku tula litaelo za Mulimu. Ki ku mu cela mali.’—Ka mo i bulelela hatiso ye bizwa Tithing—God’s Financial Plan.

Mwendi mwa lumela kuli bufani bw’a tokwahala mwa bulapeli bwa Sikreste. Kono kana mw’a filikanywanga, kamba mane mwendi ku nyemiswa, ki mukwa wa ku zungubaza batu ku lifa mali? Caziba ku za bulapeli wa kwa Brazil ya bizwa Inácio Strieder u tama ba likeleke mulatu wa ku matela ku nga nto i liñwi ku ze lishumi kuli “ba tatulule matata a likopano za bona” mi u bulela kuli mikwa yeo “ha i si ka luka, ki buputeleli, mi ki ku yauluka mwa tuto ya bulapeli.” U bulela kuli zeo li tisa kuli “malofa, limbelwa, ba ba pila mwa libaka za linjebwe, ni ba ba sa nahanisisi ba nge kuli Mulimu u ba yubekile ni kuli ba tamehile ku lifa ‘mukutazi’ pene ya kuli-kuli, ku siya mabasi a bona inz’a lapa.”

Mu kana mwa li: ‘Kana likeleke ze lifisanga nto i liñwi ku ze lishumi li latelela luli Mañolo mwa taba yeo? Kamba kana likeleke ze ñwi li sabisanga batu ka koto ya Mulimu kuli li ba hamule? Kana luli Mulimu u bata kuli lu fe ze lu sa koni?’

[Litaluso za kwatasi]