Nako Ye Nde Hahulu Ya Ku Pila

KANA mu lakazanga mazazi a mande a kale ha mu li mwa butata? Fohe mu nyakisise manzwi a mulena Salumoni, a li: “U si ke wa li: Kiñi mazazi a kale ha n’a li a mande ku a kacenu? Ha u buleli ka butali, ha u buza taba yeo.”—Muekelesia 7:10.

Ki kabakalañi Salumoni ha n’a file kelezo yeo? Ki kabakala kuli n’a ziba kuli ku ba ni mubonelo o lukile ka za ze ne ezahezi kwamulaho ku kona ku lu tusa hahulu ku tiyela miinelo ye maswe kacenu. Ba ba nyolelwa mazazi a mande a kale ba kana ba libala kuli mazazi ao ni ona n’a tezi matata mi bupilo ne bu sa tabisi luli sina ka mo ne bu lukela ku bela. Lika ze ñwi kwamulaho ne li kana li bile ze nde, kono mwendi ze ñwi ne li siyo hande. Sina mw’a bulelela Salumoni, ha ku na butali mwa ku ikumbuta mazazi a kale, kakuli ki nto ye zibahala hande-nde kuli ha lu koni ku kutisa linako za kwamulaho.

Kana ku ikumbuta mazazi a kale ku kona ku tisa kozi ye ñwi? Kwa kona, haiba ku lu bisa t’ata ku cinca ni ku twaela miinelo ya cwale kamba haiba ku lu tibela ku itebuha linako ze lu pila ku zona ni sepo ye lu kona ku ba ni yona.

Niti kikuli, se li nako ya kuli lu tone, ni haike kuli matata a sweli a ekezeha mwa lifasi. Kabakalañi? Kakuli mulelo wa Mulimu ka za lifasi le u ka tuha u talelezwa mi ze nde ze ka tahiswa ki Mubuso wa hae wa kozo li fakaufi. Bibele i sepisa kuli: “U ka takula miyoko kaufela kwa meto a bona; mi lifu ha li sa na ku ba teñi; nihaiba ku tahelwa ki maswabi ni ku lila, ni ku utwa butuku; kakuli za pili li felile.” (Sinulo 21:4) Ka nako yeo, miinelo ha i ka ba ye minde cwalo, ha ku na ya ka ikumbuta mazazi a kale a mande.