“Banna Ba Ba Butali Ba Balalu” Ne Li Bomañi?

Mwa maswaniso a’ bonisa taba ya ku pepwa kwa Jesu, hañata ku boniswanga banna ba balalu ba ba apezi hande, inze ba taha ni likamele za bona, ba fita kwa mulaka k’o Jesu wa mbututu n’a lobalizwe mwa sicelo sa limunanu. Bapoti be ne ba apezi hande bao hañata ba bizwa kuli banna ba ba butali ba balalu. Bibele iliñi ka za bona?

Bibele i li, banna bao ba batwi ki ba ba butali ki “ba kwa Upa,” mi ki kwa Upa ko ne ba zibezi za ku pepwa kwa Jesu. (Mateu 2:1, 2, 9) Banna bao ba lukela ku ba be ne ba tandile nako ye telele kuli ba y’o fita kwa Judea. Ha ba y’o fumananga Jesu, ne ba si ka mu fumana a li mbututu y’e sa zo pepwa ye lobalizwe mwa mulaka. Kono banna bao ne ba il’o fumana Maria ni “mwana” y’o mwa ndu.—Mateu 2:11.

Mwa Bibele, banna bao ba bizwa kuli “banuhi ba linaleli” mi ha i bonisi kuli ne ba li ba bakai. (NW) Buka ye bizwa The Oxford Companion to the Bible i li: “Cisehelo yeo bapoti bao ne ba bile ni yona ka za naleli yeo ye n’e ba isize kwa Betelehema i bonisa swalisano ye mwahal’a mabibo ni bunuhi bwa ka linaleli.” Ka ku utwahala, Bibele i nyaza mabibo kamukana ni mukwa wa Mababilona wa ku lika ku ziba litaba ka linaleli.—Deuteronoma 18:10-12; Isaya 47:13.

Ze n’e zwile mwa taba ye ne ba filwe banna bao ne si ze nde. Ne li tahisize kuli Mulena Heroda ya lunya a halife kabakala muna. Mi seo sa tahisa kuli bo Josefa, Maria, ni Jesu ba balehele kwa Egepita ni kuli bana ba bashimani kaufela “ba myaha ye mibeli ni ba banyinyani ku bao” ba bulaiwe mwa Betelehema. Heroda n’a buzisize za nako ya n’a pepilwe Jesu ku zwelela ku za n’a bulelezwi ki banuhi bao ba linaleli. (Mateu 2:16, NW) Bakeñisa ze n’e zwile mwa ku pota kwa bona k’o, kwa utwahala ku bulela kuli naleli ye ne ba boni ni taba ye ne ba utwile ya “ya pepilwe, mulena wa Majuda” ne i zwelela ku sila sa Mulimu, Satani Diabulosi, ya n’a bata ku bulaya Jesu.—Mateu 2:1, 2.