Za N’a Pepezwi Jesu ni Mo Ne ku Ezahalezi

“KI BUHATA!” Ba bañata ba ba si Bakreste ne ba ka bulela cwalo ha se ba utwile likande la ku pepwa kwa Jesu. Ba li ku lumela kuli mwalyanjo ya si ka ziba munna wa kona ku itwala ni ku pepa mwana ha ku lumelelani ni sayansi. Mina mu bona cwañi?

Ka 1984, hatiso ya kwa London ye bizwa The Times ne i hatisize liñolo le li bulela ka za taba yeo kuli: “Ku kanana ka za limakazo ka ku itusisa sayansi ha ku si ka luka. Ku lumela kuli limakazo ha li koni ku ezahala kwa swana ni ku lumela kuli za kona ku ezahala. Kaufela ku tokwa tumelo.” Liñolo leo ne li sainilwe ki bocaziba ba sayansi b’a 14 ba mwa liyunivesiti za kwa Britain. Ne ba ize: “Lu lumela kuli ku pepa kwa mwalyanjo, limakazo za mwa Libuka za Evangeli, ni zuho ya Kreste kwa bafu ki lika ze n’e ezahezi luli kwakale.”

Niteñi, haiba mutu a komoka h’a utwa lwa pili likande la ku pepwa kwa Jesu ki mwalyanjo, kwa utwahala. Mwalyanjo, yena mahe Jesu ka sibili n’a komokile lingeloi la Mulimu ha ne li ize ku yena: “Bona, u ka ba fa mezi a manca, u pepe mwan’a mushimani, mi u ka mu beya libizo la Jesu.” Maria a buza ka ku makala kuli: “Seo si ka ezahala cwañi, kanti ha ni zibi munna?” Lingeloi la talusa kuli Mulimu n’a ka eza makazo yeo ka moya wa Hae o kenile, mi la ekeza kuli: “Ku Mulimu ha ku na linzwi le li pala ku ezahala.” (Luka 1:31, 34-37) Kaniti, Yena ya tahisize lupepo kwa batu ili nto ye makaza, n’a ka kona hape ku tahisa kuli Jesu a pepiwe ki mwalyanjo ya si ka silafala. Mulimu, yena ya bupile pupo kamukana ni milao ya teñi ye namile, n’a ka kona hape ku tahisa kuli Mwana ya petehile, a pepiwe ka ku itusisa lii la mwa mba ya Maria.

Ze Ne ku Tokwahalela Cwalo

Maria ka nako y’a itwala, n’a beelelizwe ki Josefa, munna ya n’a saba Mulimu. Mwa tolo, lingeloi la Mulimu la taluseza Josefa libaka le li makaza mwalyanjo ya n’a beelelize ha n’a itwezi. Lingeloi ne li ize: “U si ke wa saba ku ikungela Maria musal’a hao, kakuli se si mu beile fa mezi a manca ki sa Moya o Kenile. Maria u ka pepa mwan’a mushimani, mi u ka mu beya libizo la JESU; kakuli ki yena ya ka pilisa sicaba sa hae kwa libi za sona.” (Mateu 1:20, 21) Mwa Siheberu, libizo la Jesu li talusa kuli “Jehova Ki Yena Puluso.” Li lu hupulisa kuli lu tokwa ku puluswa kwa sibi ni lifu. Hape li lu  hupulisa za tukiso y’a ezize Jehova Mulimu ya yona puluso yeo ka Jesu.

Kabakala kuli mutu wa pili, yena Adama n’a ezize sibi, bana ba hae kaufela ne ba pepilwe ba si ka petahala, ba ba na ni tengamo ya ku loba milao ya Mulimu. (Maroma 5:12) Batu ba ba simuluhile ku Adama ne ba ka liululwa cwañi kwa sibi kuli ba petahale? Bupilo bwa mutu yo muñwi bo bu petehile, bo bu swana ni bwa Adama, ne bu na ni ku lifiwa kuli ku be ni ku likanelela hande kwa lika. Ki lona libaka Mulimu ha n’a tahisize ku pepwa kwa ka makazo kwa mutu ya petehile, yena Jesu, mi hape ki lona libaka Jesu ha n’a tuhelezi lila za hae ku mu bulaya. (Joani 10:17, 18; 1 Timotea 2:5, 6) Jesu ha s’a zuhile kwa bafu ni ku ya kwa lihalimu, n’a kona ku bulela ka ku tiya kuli: “Ne ni shwile, mi bona, ni pila mwa linako ni linako; mi ni na ni linotolo za lifu, ni za sibaka fo ku inzi ba ba shwile.”—Sinulo 1:18.

Ka ku itusisa linotolo za swanisezo za lifu ni mabita, Jesu u kwalula nzila ya kuli batu ba ba li baezalibi ba fumane za n’a latehezwi ki zona Adama. Jesu n’a talusize kuli: “Ki na zuho ni bupilo; ya lumela ku na, nih’a shwile u ka pila. Mi mutu kaufela ya pila mi a lumela ku na, h’a na ku shwa ni kamuta.” (Joani 11:25, 26) Ki sepiso kwa bunde! Mi niteñi, ku na ni libaka le lituna ni ku fita la n’a pepezwi Jesu.

Libaka Le Lituna ka ku Fitisisa

Bupilo bwa Jesu ne bu si ka kalela mwa mba ya Maria. N’a bulezi ka ku utwahala hande kuli: “Ni zwile kwa lihalimu.” (Joani 6:38) Ku zwelela kwa makalelo a pupo, Jesu n’a pilile mwa lihalimu ni Ndat’ahe. Mane Bibele i mu talusa ku ba “toho ya libupiwa za Mulimu.” (Sinulo 3:14) Ha n’a li mwa lihalimu, Jesu n’a iponezi ku ipangula kwa lingeloi le li maswe, lona le ne li tahisize kuli batu ba kwenuhele puso ya Mulimu. Seo ne si tahisize libaka la butokwa ka ku fitisisa la kuli Jesu a bate ku pepwa sina mutu ya petehile, Mwan’a Mulimu. Ne li libaka mañi lona leo?

Ne li la ku bonisa kuli Ndat’ahe wa kwa lihalimu u na ni tukelo ya ku busa pupo kaufela. Ka ku sepahala ku zwa h’a pepwa ku isa lifu fa lifasi, Jesu n’a bonisize kuli n’a lata ku latelela nzila yeo Jehova a busa libupiwa za Hae ka yona. A si ka bulaiwa kale ki lila za Mulimu, Jesu n’a talusize hande libaka ha n’a tabela ku shwa lifu la buitomboli. N’a ize ne li kuli lifasi li zibe kuli n’a lata Ndat’ahe. (Joani 14:31) Kambe batu ba babeli ba pili, bo Adama ni Eva, ne ba bile ni lilato le li cwalo, kambe ne ba sepahalile mwa tiko ya bona ye n’e li ye bunolo ku fita ya Jesu.—Genese 2:15-17.

Busepahali bwa Jesu hape ne bu bonisize kuli Satani, lingeloi le li maswe, n’a li lihata.  Satani n’a tantile Mulimu ni batu ka ku bulela fapil’a mangeloi mwa lihalimu kuli: “Mutu s’a sweli kaufela wa si fana, kuli a pilise bupilo bwa hae!” (Jobo 2:1, 4) Satani n’a bulezi buhata bwa kuli batu ha ne ba ka tahelwa ki kozi, kaufel’a bona ne ba ka tuhela ku utwa Mulimu kuli ba ipilise.

Litaba ze bulezwi ne li tahisize kuli ku luka kwa puso ya Mulimu ku hononwe. Kuli li tatululwe, Jesu n’a itatezi ku to pepwa sina mutu ni ku sepahala ku isa lifu.

Kacwalo ka ku ya ka mwa n’a bulelezi, libaka le lituna la n’a til’o pepelwa Jesu fa lifasi ne li kuli a t’o “paka niti.” (Joani 18:37) N’a pakile niti ka ku bonisa ka likezo ni lipulelo kuli puso ya Mulimu ki ye lukile ni kuli ku ipeya ku yona ku tahisa tabo ya kamita. Jesu hape n’a talusize kuli n’a tile fa lifasi ku to fana bupilo bwa hae “ku liulula ba bañata,” ili ku tahisa kuli batu ba ba li baezalibi ba petahale ni ku ba ni bupilo bo bu sa feli. (Mareka 10:45) Kuli batu ba utwisise litaba za butokwa zeo, litaba ka za ku pepwa kwa Jesu ne li na ni ku ñolwa. Hape, ze n’e ezahezi ka nako ya ku pepwa kwa Jesu ni zona li na ni lituto ze ñwi za butokwa, ka mo lu ka bonela mwa taba ye tatama.

[Maswaniso a fa likepe 4]

Batu ba ba simuluhile ku Adama ne ba kona ku puluswa cwañi kwa sibi?