Ze Li Luta Litaba za ku Pepwa kwa Jesu

BA BAÑATA ba tabiswanga hahulu ki litaba za ku pepwa kwa Jesu. Nto yeo i boniswa kikuli ka nako ya Ngilisimusi, ku eziwanga liponiso ze ñata ni lipapali ze ñata ka za ku pepwa kwa Jesu mwa lifasi kaufela. Niha li tabisa cwalo, lika ze n’e ezahezi ka nako ya ku pepwa kwa Jesu ne li si ka ñolelwa fela mwa Bibele ku tabisa batu. Kono ki kalulo ya Mañolo kaufela a n’a tahisize Mulimu kuli a ñolwe ilikuli a lute ni ku kolisa.—2 Timotea 3:16.

Kambe Mulimu n’a bata kuli batu ba ezange mukiti wa lizazi la ku pepwa kwa Jesu, kambe lona lizazi leo luli li bulezwi mwa Bibele. Kana li teñi mwa Bibele? Ha s’a bulezi kuli Jesu n’a pepilwe ka nako yeo balisana ne ba li kwa milaka busihu, ba nze ba lisa mitapi ya bona, caziba wa za Bibele, Albert Barnes, ya n’a pilile mwa lilimo za ma-1800 n’a ize: “Taba yeo i bonisa hande kuli Mupulusi wa luna n’a pepilwe lizazi la December 25 li si ka fita kale . . . Ka nako yeo kwa bata, mi sihulu libaka za malundu ze li bukaufi ni Betelehema li bata hahulu. Mulimu h’a si ka zibahaza nako ya n’a pepilwe [Jesu]. . . . Mi ku ziba nako yeo haki kwa butokwa; kambe ku butokwa, kambe Mulimu n’a i zibahalize.”

Kono bañoli ba Libuka z’e ne za Evangeli ba lu zibisa hande lizazi la n’a shwile Jesu. N’a shwile fa Paseka, ye n’e eziwanga maliha, fa lizazi la bu 14 la kweli ya Sijuda  ya Nisani. Hape Jesu n’a laezi balateleli ba hae ku n’o ezanga kupuzo fa lizazi leo, ili ku mu hupula. (Luka 22:19) Mwa Bibele ha ku na taelo ye cwalo ya ku eza mukiti wa lizazi la ku pepwa kwa Jesu, kamba mane wa lizazi la ku pepwa kwa mutu ufi kamba ufi. Kono likañi ka za lizazi la ku pepwa kwa Jesu li kana la lu palelwisa ku lemuha lika ze ñwi za butokwa ze n’e ezahezi ka nako yeo.

Bashemi Be Ne Ba Ketilwe ki Mulimu

Kwa mabasi a’ likiti-kiti a mwa Isilaele, Mulimu n’a ketile bashemi ba ba cwañi kuli ba ute Mwan’a hae? Kana N’a ngile lika ze cwale ka libubo ni bufumu ku ba za butokwa? Batili. Jehova n’a bata bashemi be ne ba mu saba. Mu tatube pina ya Maria ya tumbo, ye ñozwi kwa Luka 1:46-55, ya n’a opezi ha s’a bulelezwi kuli n’a ka ba ni tohonolo ya ku ba mahe Mesiya. Ze ñwi za n’a bulezi ne li kuli: “Moya wa ka u lumba Mulena . . . kakuli u talimile bubotana bwa mutang’a hae.” N’a ipona kuli n’a li “mubotana,” mutang’a Jehova. Sa butokwa ni ku fita, manzwi a mande a tumbo a’ mwa pina ya Maria a bonisa kuli n’a iyakatwa za kwa moya mi n’a ziba hande Mañolo. Niha n’a li muezalibi ya n’a simuluhile ku Adama, n’a li yena luli ya n’a swanela ku ba mahe Mwan’a Mulimu fa lifasi.

Munn’a Maria bo, yena ya n’a til’o añula Jesu? Josefa n’a ziba hande ku beta. Kabakala kuli n’a lata ku sebeza ka t’ata ka mazoho a hae, n’a kona ku uta lubasi l’o kwa mafelelezo ne lu til’o ba ni bana ba bashimani baketa-lizoho ni ba basizana ba babeli. (Mateu 13:55, 56) Josefa n’a si ka fuma. Nako ha ne i fitile ya kuli Maria a ise mwan’a hae wa mweli kwa tempele ya Mulimu, Josefa u lukela ku ba ya n’a swabile kuli n’a sa koni ku fa sitabelo sa ngu. Ne ba na ni ku eza mo ne ba ezezanga babotana. Mulao wa Mulimu ne u bulela ka za mahe mwana wa mweli kuli: “H’a ka tokwa ngunyana, a nge tunkwilimba to tubeli kamba maiba a mabeli; le liñwi ki la sitabelo sa ku cisa, le liñwi ki la sitabelo bakeñisa sibi. Muprisita u ka mu ezeza sebelezo ya tifo, kuli a kene.”—Livitike 12:8; Luka 2:22-24.

Bibele i li Josefa “neli ya lukile.” (Mateu 1:19) Ka mutala, n’a si ka lobala ni musal’a hae ku fitela fa n’a puluhezi Jesu. Ku eza cwalo ne ku tahisize kuli ku si ke kwa kakanyiwa kuli Ndat’ahe Jesu luli ne li mañi. Kwa batu be ne ba sa z’o nyalana, kaniti ne ku bile t’ata ku sa lobala hamoho niha ne ba pila mwa ndu i liñwi. Kono ku eza cwalo ne ku bonisize kuli sibeli sa bona ne ba itebuhile tohonolo ya ku uta Mwan’a Mulimu.—Mateu 1:24, 25.

Sina Maria, Josefa n’a iyakatwa lika za kwa moya. Ka silimo, n’a tuhelanga ku sebeza mi n’a yanga ni lubasi lwa hae kwa Jerusalema ku zwa kwa Nazareta, ili musipili wa mazazi a malalu. Ne ba yanga kwa mukiti wa Paseka wa silimo ni silimo. (Luka 2:41) Hape, Josefa u lukela ku ba ya n’a lutile Jesu mukwa wa ku yo lapelanga kwa sinagoge, k’o Linzwi la Mulimu ne li baliwanga ni ku taluswa. (Luka 2:51; 4:16) Kacwalo, ha ku na kakanyo ya kuli Mulimu n’a ketezi Mwan’a hae bashemi ba bande ba ku mu añula fa lifasi.

Mbuyoti Ye Tuna kwa Balisana Ba Ba Si Na Mo Ba Inezi

Niha ne ku li t’ata ku musal’a hae, ya n’a s’a li mwa kweli ya mafelelezo ya mulwalo wa hae, Josefa a ya kwa munzi kwa n’a simuluha kuli a yo ñoliswa, ka ku ya ka taelo ya Sesare.  Bo Josefa ni Maria ha ne ba fitile mwa Betelehema, ne ba palezwi ku fumana malobalo mwa munzi mo ne ku tezi batu. Kacwalo, miinelo ya tahisa kuli ba yo lobala mwa sitebule, m’o Jesu n’a pepezwi, ni ku lobazwa mwa sicelo. Jehova a tiisa tumelo ya bona ka ku bonisa bashemi ba ba ishuwa bao kuli luli ku pepwa k’o ne li ka tato ya Mulimu. Kana n’a lumile sikwata sa banna bahulu ba kwa Betelehema kuli ba yo ba tiisa? Kutokwa. Jehova Mulimu n’a punyize taba yeo kwa balisana be ne ba sebeza ka t’ata, be ne ba lobala kwa milaka ba nze ba lisa mitapi ya bona.

Lingeloi la Mulimu la taha ku bona ni ku to ba taluseza kuli ba ye kwa Betelehema, ko ne ba ka yo fumana Mesiya ya n’a sa z’o pepwa “a lobalizwe mwa sicelo.” Kana banna ba ba sina mo ba inezi bao ne ba komokile kamba ku swaba ha ba utwa kuli mbututu Mesiya n’a li mwa sitebule? Batili! Honaf’o fela, ba siya mitapi ya bona ni ku liba kwa Betelehema. Ha ba yo fumana Jesu, ba taluseza bo Josefa ni Maria ze ne li bulezi lingeloi la Mulimu. Kaniti nto yeo ne i tiisize tumelo ya bo Josefa ni Maria ya kuli lika kaufela ne li ezahala ka mwa n’a batela Mulimu. “Balisana, bona, ba kuta inze ba lumba Mulimu; ba mu lumbeka ka ze ba utwile kaufela, ni ze ba boni.” (Luka 2:8-20) Ee, Jehova n’a ezize keto ye nde ka ku punya taba kwa balisana be ne ba mu saba.

Litaba ze bulezwi li lu bonisa kuli lu tokwa ku ba batu ba ba cwañi kuli Jehova a lu tabele. Ha lu tokwi ku bata libubo kamba bufumu. Kono sina bo Josefa, Maria, ni balisana, lu tokwa ku utwa Mulimu ni ku bonisa kuli lwa mu lata ka ku nga lika za kwa moya ku ba za butokwa ku fita bufumu. Kaniti, ka ku yeya lika ze n’e ezahezi ka nako ya n’a pepilwe Jesu, lu kona ku fumana lituto ze nde.

[Siswaniso se si fa likepe 7]

Ku fa sitabelo sa maiba a mabeli kwa Maria ku bonisañi?

[Siswaniso se si fa likepe 7]

Mulimu n’a ketile ku punya taba ya ku pepwa kwa Jesu kwa balisana b’a sikai ba ba si na mo ba inezi