Ku Tundamena kwa Hae N’e Si Kwa Mbango

Batu ba ba sepahala ba bañata ba tabela kuli balatiwa ba bona ba itute milelo ya Mulimu ilikuli ba pile bupilo bwa tabo. Kuli mutu a fite fa ku eza keto ye nde ya ku ineela ku Mulimu, n’a kana a tusizwe ki muzamao o munde wa batu ba bañwi ibe banana kamba ba bahulu. Kona mo ne ku bezi ku Jearim, musizana ya pila kwa Mexico, ya n’a lumezi kañolo ka, fa lizazi la mukopano o ipitezi wa Lipaki za Jehova:

“Ni bata kuli mu tabe ni na. Kashe ni mi bulele libaka ha ni tabile. Lilimo ze 18 kwamulaho ni si ka pepwa kale, bashemi ba ka ne ba itutile niti. Boma ne ba ezize zwelopili, kihona ku taha na ni kaizel’a ka. Ne lu kopani hamoho ku lapela ku Jehova kuli bondate ni bona ite ba kalise ku zamaya mwa nzila ye isa kwa bupilo. Se ku fitile lilimo ze 18 ku zwa f’o, mi kacenu ki lizazi le li ipitezi hahulu ku luna. Bondate b’a kolobezwa. Ni itumela ku Jehova kuli h’a si ka tisa mafelelezo pili takazo ya luna ya kale-kale yeo i si ka talelezwa. Ni itumezi, Jehova!”

Mwahal’a lilimo zeo, ku si na ku kakanya lubasi lwa habo musizana y’o ne lu mamezi kelezo ye tahile ka moya ye kwa liñolo la 1 Pitrosi 3:1, 2, ye li: “Mina basali, mu ipeye kwatas’a banna ba mina, kuli ba bañwi ha ba ka ba teñi ba ba sa lumeli, ba koliswe ki mizamao ya basali ba bona, ku si na manzwi a’ bulelwa; ha ba nze ba lemuha mizamao ya mina ye kenile, ye na ni sabo.” Mi kaniti musizana y’o Jearim n’a mamezi liñolo la Deuteronoma 5:16 le li li: “Kuteka ndat’aho ni m’aho, sina mw’a ku laelezi [Mun’a] Bupilo Mulimu wa hao.” Kaniti ku pila ka likuka ze cwalo ni ku libelela ku Jehova ka pilutelele ne ku tahiselize Jearim ni lubasi lwa habo limbuyoti.