“Mu Libelele!”
“Mu Libelele!”
“Se ni mi bulelela, ni si bulelela batu kaufela, ni li: Mu libelele!”—MAREKA 13:37.
1, 2. (a) Munna yo muñwi n’a itutile tuto mañi ka za ku bukeleza tutu ya hae? (b) Swanisezo ya Jesu ya za lisholi i lu lutañi ka za ku tona?
JUAN n’a bulukanga lika za hae za butokwa kwa ndu. N’a li shwatekile mwatas’a mumbeta wa hae, ka ku nahana kuli ha ku na ku sili kwa n’a kona ku li buluka hande mwa ndu m’o. Kono busihu bo buñwi, yena ni musal’a hae inze ba lobezi, lisholi la kena mwa musiyo. Lisholi leo ne li ziba luli kwa ku babatela. Ka ku kuza, la zwisa nto ya butokwa kaufela mwatas’a mumbeta ni ku pamula mali a n’a siile Juan mwa pakana ya katafule ka mumbeta. Habusa, Juan a lemuha kuli u uzwelizwe. H’a na ku libala tuto ye butuku ya n’a itutile, ya kuli mutu ya lobezi h’a koni ku bukeleza tutu ya hae.
2 Ni kwa moya ku cwalo. Ha lu koni ku bukeleza sepo ni tumelo ya luna haiba lu mwa buloko. Ki lona libaka Paulusi ha n’a elelize kuli: “Lu si ke lwa lobala sina ba bañwi; kono lu tone mi lu iswale.” (1 Matesalonika 5:6) Jesu n’a file swanisezo ya lisholi ka ku bonisa butokwa bwa ku tona. N’a talusize likezahalo ze n’e ka supa ku taha kwa hae ku t’o atula, mi kihona a lemusa kuli: “Mu libelele he, kakuli ha mu zibi lizazi l’a ka taha Mulen’a mina. Kono mu zibe kuli [muñ’a] ndu, kab’a ziba nako ya busihu ye li ka taha lisholi, kab’a libelela, mi a si ke a lumela kuli ndu ya hae i punyiwe. Kamukwaocwalo, ni mina mu itukise; kakuli Mwan’a mutu u ka taha nako ye mu sa zibi.” (Mateu 24:42-44) Lisholi ha li lemusangi batu kuli li taha nako mañi. Li sepa ku ba patisa. Sina mwa n’a bulelezi Jesu, mafelelezo a muinelo wo ni ona a ka taha ‘ka nako ye lu sa zibi.’
“Mu Tone, Mu Tiye mwa Tumelo”
3. Jesu n’a bonisize cwañi butokwa bwa ku libelela, ka swanisezo ya batanga ba ba libelela mulen’a bona ya ile kwa sinawenga?
3 Mwa litaba ze ñozwi mwa Buka ya Evangeli ya Luka, Jesu n’a bapanyize Bakreste kwa batanga ba ba libelela mulen’a bona ya ile kwa sinawenga. Ba tokwa ku libelela ilikuli h’a fita a ba fumane ba tona, inze ba libelezi ku mu amuhela. Ka ku swana ni seo, Jesu n’a ize: “Mwan’a mutu u ka taha ka nako ye mu sa hupuli.” (Luka 12:40) Ba bañwi ba ba sebelelize Jehova ka lilimo-limo ba kana ba libala kuli lu pila mwa linako za kaulakañi. Mane ba kana ba kala ku nahana kuli mafelelezo mwendi a sa li kwahule hahulu. Kono mihupulo ye cwalo ya kona ku lu libaza za kwa moya ni ku tahisa kuli lu pihelele sifumu, mi ku hakanyeha k’o ku kona ku lu lobaza kwa moya.—Luka 8:14; 21:34, 35.
4. Ki tumelo mañi ye ka lu susumeza ku libelela, mi Jesu n’a bonisize cwañi seo?
4 Swanisezo ya Jesu i kona ku lu luta tuto ye ñwi. Nihaike batanga ne ba sa zibi nako ya n’a ka taha mulen’a bona, ku bonahala kuli ne ba ziba busihu bwa teñi. Ne ku kabe ku ba bezi t’ata ku tona busihu kaufela kambe kuli ne ba nahana kuli mulen’a bona u ka taha busihu bu sili. Kono ne ba ziba busihu bwa n’a ka kuta, mi kacwalo ba tona hahulu. Ka mukwa o bat’o swana, bupolofita bwa Bibele bu sinula hande-nde kuli lu pila mwa nako ya maungulo; kono ha bu lu buleleli lizazi kamba nako tenyene ya mafelelezo. (Mateu 24:36) Tumelo ya luna ya kuli mafelelezo a tuha a taha i lu tusa ku tona, kono haiba lw’a lumela luli kuli lizazi la Jehova li fakaufi, lu ka libelela hahulu.—Zefania 1:14.
5. Lu kona ku mamela cwañi kelezo ya Paulusi ya kuli lu “tone”?
5 Paulusi n’a ñolezi Makorinte ku ba susueza kuli: “Mu tone, mu tiye mwa tumelo.” (1 Makorinte 16:13) Ee, kuli lu tone, lu tokwa ku tiya mwa tumelo ya Sikreste. Lu kona ku zwelapili cwañi ku tona? Ka ku tibisa zibo ya luna ya Linzwi la Mulimu. (2 Timotea 3:14, 15)Tomahanyo ye nde ya ku ituta ka butu ni ku kopana i kona ku tiisa tumelo ya luna mi ku hupula kamita lizazi la Jehova ku tiisa hahulu tumelo ya luna. Kacwalo, ku lundululanga bupaki bwa mwa Mañolo bwa kuli muinelo wo u ka tuha u fela, ku ka lu tusa ku sa libala litaba za butokwa ze ama mafelelezo ao a’ taha. * Hape kwa tusa ha lu tekelela lika ze ezahala mwa lifasi ili ze taleleza bupolofita bwa Bibele. Muzwale yo muñwi mwa Germany n’a ñozi kuli: “Fo ni buhela makande kaufela—a lindwa, lizikinyeho za lifasi, mifilifili, ni ku silafazwa kwa lifasi-mubu—ka na, mafelelezo a fakaufi.”
6. Jesu n’a swaniselize cwañi mukwa wa ku kala ku ngumoka kwa moya nako ha i nze i ya?
6 Kwa Mareka kauhanyo 13, lu fumana taba ye ñwi k’o Jesu n’a elelize balutiwa ba hae ku zwelapili ku tona. Mwa kauhanyo yeo, Jesu u ba bapanya ku mulibeleli wa munyako y’a litela ku kuta kwa mulen’a hae ya tamile musipili o mutelele. Mulibeleli wa munyako n’a sa zibi nako ya ku kuta kwa mulen’a hae. Sa n’a na ni ku eza fela ki ku libelela. Jesu n’a bulezi ka za linako z’e ne za mitonelo fa n’a kona ku fitela mulena. Mutonelo wa bune n’o kala ibat’o ba ka 3 kiloko ya kakusasana ku isa lizazi ha li pazula. Mwa mutonelo wa mafelelezo w’o, mulibeleli wa munyako w’a kona ku kala ku ngumoka. Kutwi, hanyinyani fela kuli masa a patalale, ki yona nako ye nde hahulu ya ku kwacisa sila. Ka ku swana, ha u bona nako i ile, mi batu mwa lifasi ba lobezi singomba kwa moya, ku zwelapili ku tona ku kana kwa lu bela hahulu t’ata ni ku fita. (Maroma 13:11, 12) Kacwalo, mwa swanisezo ya hae, Jesu u kuta-kutela ku eleza kuli: “Mu libelele, mu tone . . . Mu libelele kihona . . . Se ni mi bulelela, ni si bulelela batu kaufela, ni li: Mu libelele!”—Mareka 13:32-37.
7. Ku bunolo ku ezañi, mi kabakaleo, ki ifi susuezo ye lu fumana hañata-ñata mwa Bibele?
7 Hañata mwa bukombwa bwa hae ni ha s’a zuhile kwa bafu, Jesu n’a elelize za ku tona. Mane, hañata-ñata Mañolo h’a bulela za mafelelezo a muinelo wo wa linto, lu fumana teñi ni temuso ya kuli lu tone kamba ku libelela. * (Luka 12:38, 40; Sinulo 3:2; 16:14-16) Seo si bonisa kuli luli ku bunolo ku ngumoka kwa moya. Kaufel’a luna lu tokwa litemuso zeo!—1 Makorinte 10:12; 1 Matesalonika 5:2, 6.
Baapositola Ba Balalu Be Ne Ba Palezwi ku Tona
8. Mwa simu ya Getsemani, baapositola ba balalu ba Jesu ne ba ezize cwañi ha n’a ba kupile kuli ba tone?
8 Haki milelo fela ye minde ye tokwahala mwa ku tundamena ku tona, sina mo u lu boniseza mutala wa bo Pitrosi, Jakobo, ni Joani. Banna bao ne ba tiile mwa tumelo mi ne ba latelezi Jesu ka busepahali ni ku iponela mwa n’a ba oliseza. Kono busihu bwa la Nisani 14, 33 C.E., ba palelwa ku tona. Ha ba zwile mwa muzuzu wa kwahalimu mo ne ba cezi Paseka, baapositola ba balalu bao ba sindeketa Jesu kwa simu ya Getsemani. Kwateñi Jesu a ba bulelela kuli: “Moya wa ka u fakaufi ni ku shwa kabakala maswabi. Mu siyale mo, mu tone ni na.” (Mateu 26:38) Halalu Jesu a lapela ka t’ata ku Ndat’ahe wa kwa lihalimu, mi halalu a kuta kwa balikani ba hae, konji ku y’o ba fumana ba tunya buloko.—Mateu 26:40, 43, 45.
9. Mwendi kiñi baapositola ha ne ba ngumokile?
9 Kiñi basepahali bao ha ne ba palezwi ku eza za n’a bulezi Jesu busihu bwani? Libaka kikuli mibili ya bona ne i katezi. N’e se li busihu hahulu, mwendi ili ku fitelela fahal’a busihu, mi “meto a bona n’a li bukiti” kabakala buloko. (Mateu 26:43) Niteñi, Jesu a li: “Mu tone, mi mu lapele, kuli mu si ke mwa kena mwa muliko; moya ona wa lata, kono nama ya fokola.”—Mateu 26:41.
10, 11. (a) Niha n’a topwezi, Jesu n’a konile cwañi ku tona mwa simu ya Getsemani? (b) Lu kona ku itutañi ku ze n’e wezi baapositola ba balalu Jesu ha n’a ba kupile kuli ba ine ba tona?
10 Ku si na kakanyo, Jesu ni yena n’a katezi busihu bo bu ipitezi b’o. Kono ku fita ku bebuka ni buloko, a lapela ka t’ata mwa nakonyana yeo ya n’a sa lukuluhile. Mazazinyana kwamulaho, n’a elelize balutiwa ba hae ku lapela, a li: “Kifohe, mu tone mi mu lapele kamita, kuli mu kone ku banduka ku zeo kaufela ze ka bonahala, ni ku yema fapil’a Mwan’a mutu.” (Luka 21:36; Maefese 6:18) Ha lu ka mamela kelezo ya Jesu ni ku latelela mutala wa hae o munde mwa taba ya ku lapela, likupo za luna ku Jehova ze buniti li ka lu tusa ku tona kwa moya.
11 Jesu luli n’a utwisisa nto ye ne ba sa utwisisi balutiwa ba hae ka nako yeo, ya kuli n’a ka tuha a tamiwa ni ku atulelwa lifu. Miliko ya hae ne i ka fita fa kaungu-ungu ka ka butuku fa kota ya linyando. Jesu n’a lemusize kale baapositola ba hae ka za lika zeo, kono ne ba si ka mu utwisisa. Kacwalo, ba tunya buloko yena inz’a tona ni ku lapela. (Mareka 14:27-31; Luka 22:15-18) Sina mo ne ku ezahalezi kwa baapositola, mibili ya luna ni yona ya fokola mi ku na ni lika ze ñwi ze lu si ka ziba kale. Kono haiba lu libala kuli lu pila mwa linako za kaulakañi, lu ka swana lwa ñanyuka kwa moya. Lu ka kona fela ku tona haiba lu tokomela.
Tulemeno To Tulalu Twa Butokwa
12. Ki tufi tulemeno to tulalu twa bulela Paulusi to tu kona ku lu tonisa?
12 Lu kona ku zwelapili cwañi ku tukufalelwa? Ki kale lu bona butokwa bwa tapelo ni bwa ku hupulanga lizazi la Jehova. Kwand’a zeo, Paulusi u bulela tulemeno to tulalu to lu swanela ku ba ni tona. U li: “Kono luna, kakuli lu ba musihali, lu iswale, lu nze lu apezi sisilelezo sa fa sifuba, ili tumelo ni lilato; mi lu apale kuwani ya sisole, ili sepo ya ku piliswa.” (1 Matesalonika 5:8) Ha lu boneñi ka bukuswani m’o tumelo, sepo, ni lilato li lu tuseza ku tundamena ku tona kwa moya.
13. Tumelo i lu tusa cwañi ku tona kwa moya?
13 Lu swanela ku ba ni tumelo ye sa zikinyehi ya kuli Jehova u teñi ni kuli “ki Yena ya fa ba ba mu bata mupuzo.” (Maheberu 11:6) Talelezo ya kwa makalelo ya bupolofita bwa Jesu bwa za mafelelezo i tiisa tumelo ya luna ya kuli ni mwa linako za luna bu ka ba ni talelezo ye tuna. Mi tumelo ya luna i lu tusa ku libelela lizazi la Jehova ka tibelelo ye tuna, ili ku kolwa kuli “[pono ya bupolofita] i ka bonahala; mi ha i na ku liyeha.”—Habakuki 2:3.
14. Sepo i lu tusa hahulu cwañi ku tona?
14 Sepo ya luna ye tiile i swana sina “ankora ya moya” y’e lu tusa ku tiyela butata nihaike lu na ni ku litela talelezo ye si ke ya pala ya lisepiso za Mulimu. (Maheberu 6:18, 19) Kaizeli Margaret ya tozizwe s’a matela mwa lilimo za ma-90 za buhulu mi n’a kolobelizwe lilimo ze fitelela 70 kwamulaho. U itumelela kuli: “Butuku bwa kansa ha ne bu omba bomunn’a ka moyo ka 1963, ne ni ikutwile kuli neikaba hande mafelelezo ha n’a ka taha kapili. Kono cwale ni lemuha kuli ze ne ni nahanile zeo ne li za buitati. Ka nako yeo, ne lu si ka libelela kuli musebezi wa ku kutaza n’o ka yanduluka cwana mwa lifasi kaufela. Nihaiba cwale, ku sa na ni libaka ze ñata ze sa z’o kala-kala ku kutazwa. Kacwalo ni itebuhile kuli Jehova u bile ni pilu-telele.” Muapositola Paulusi u lu sepisa kuli: “Ku tiiseza ku tahisa ku sepahala; mi ku sepahala ku tahisa sepo. Mi sepo ha i tahisi maswabi.”—Maroma 5:3-5.
15. Lilato li ka lu susumeza cwañi niha ku ka bonahala kuli lu libelezi nako ye telele?
15 Lilato la Sikreste li zwile mubano kakuli ki lona mutomo wa zote ze lu eza. Lu sebeleza Jehova kakuli lwa mu lata, ku si na taba ni nako y’a tomile ya ku eza lika. Lilato kwa batu ba bañwi li lu susumeza ku kutaza taba ye nde ya Mubuso ku bona, ku si na taba ni kuli Mulimu u lata kuli lu eze cwalo ka nako ye kuma kai ni kuli lu ka kuta hakai kwa mandu a’ swana. Ka mwa n’a ñolezi Paulusi, “ze ina; ki tumelo, ni sepo, ni lilato, ze talu zeo. Kono ye tuna ku zona ki lilato.” (1 Makorinte 13:13) Ki lilato le li lu fa tundamo ni ku lu tusa ku zwelapili ku tona. “[Lilato] li na ni sepo mwa linto kaufela; li itiisa mwa linto kaufela. Lilato ha li na ku fela, ku ya ku ile.”—1 Makorinte 13:7, 8.
“Swala Ka Tata S’o Na ni Sona”
16. Ku fita ku tepelela, lu swanela ku ba ni moya ufi?
16 Lu pila mwa linako za kaulakañi ili mo lika ze ezahala mwa lifasi li lu hupulisa kamita kuli se lu li kwa mafelelezo a mazazi a maungulelo. (2 Timotea 3:1-5) Ye, haki nako ya ku tepelela; ki nako ya ku ‘swala ka tata se lu na ni sona.’ (Sinulo 3:11) Ka “ku tona, kuli [lu] kone ku lapela” ni ka ku ba ni tumelo, sepo, ni lilato, lu ka kwanisa mwa nako ya muliko. (1 Pitrosi 4:7) Lu na ni ze ñata za ku eza mwa musebezi wa Mulena. Ku tukufalelwa mwa likezo za bulapeli ku ka lu tusa ku tona ngweluu!—2 Pitrosi 3:11.
17. (a) Ki kabakalañi ha lu sa swaneli ku zwafa muta lika fokuñwi li sa ezahali mo ne lu nahanela? (Mu bone sikwenda fa likepe 21.) (b) Lu kona ku likanyisa cwañi Jehova, mi ba ba mu likanyisa ba ka fiwa mbuyoti mañi?
17 Jeremia n’a ñozi kuli: “[Muñ’a] Bupilo ki buswa bwa ka, ki m’o bulelela moya wa ka; kabakaleo ni ka mu sepa. [Muñ’a] Bupilo u na ni musa ku ba ba mu sepa, kwa moya wa ya mu bata. Se sinde ki kuli mutu a sepe mi a libelele ku pilisa kwa [Muñ’a] Bupilo, inz’a kuzize.” (Malilo 3:24-26) Ba bañwi ku luna lu se lu libelezi nakonyana. Ba bañwi se ba libelezi lilimo-limo ku bona ku pilisa kwa Jehova. Kono ku libelela k’o ki ko ku kuswani ha ku bapanywa ni nako ya kamita-ni-mita ye taha! (2 Makorinte 4:16-18) Mi ha lu nze lu libelela nako y’a tomile Jehova, lwa kona ku hulisa tulemeno twa butokwa twa Sikreste ni ku konisa ba bañwi ku tuseha ka pilu-telele ya Jehova ni ku amuhela niti. Kacwalo, kaufel’a luna lu libelele. Lu likanyise Jehova mi lu be ni pilu-telele, ili ku itumela sepo y’a lu file. Mi inze lu tona ka busepahali, lu swale ka t’ata sepo ya bupilo bo bu sa feli. F’o, lisepiso ze polofitilwe ze, luli li ka talelelezwa luna, z’e li: “U ka kambamiswa [ki Jehova], ku y’o luwa naha; u ka bona ba ba maswe ha ba yundiswa.”—Samu 37:34.
[Litaluso za kwatasi]
^ para. 5 Ku ka tusa ku lundulula litaba ze silezi ze paka kuli lu pila mwa “mazazi a maungulelo” ili ze n’e kolohanyizwe fa makepe 6 ni 7 a Tora ya ku Libelela ya February 1, 2000.—2 Timotea 3:1.
^ para. 7 Ka za pulelo ya Sigerike ye tolokilwe kuli “mu tone,” caziba wa manzwi ya bizwa W. E. Vine u talusa kuli ze i talusa luli pulelo yeo kikuli ‘ku lundula buloko,’ mi “ha i talusi ku tona fela, kono ku libelela za ngana.”
Ne Mu Ka Alaba Cwañi?
• Lu kona ku tiisa cwañi tumelo ya luna ya kuli mafelelezo a muinelo wo wa linto a fakaufi?
• Lu kona ku itutañi kwa mitala ya bo Pitrosi, Jakobo, ni Joani?
• Ki tufi tulemeno to tulalu to tu ka lu tusa ku libelela kwa moya?
• Ki kabakalañi ye, ha i li yona nako ya ku ‘swala ka tata se lu na ni sona’?
[Lipuzo za Tuto]
[Mbokisi/Siswaniso se si fa likepe 21]
“Mbuyoti Ki ya Mutu Ya Libelela.”—Daniele 12:12
Mu nahane kuli mulibeleli u lemuha kuli lisholi li lela ku punya sibaka s’a libelela. Ha ku ba busihu, mulibeleli u sikeka hahulu lizebe ku teeleza ku sholokota kaufela ko ku kana kwa bonisa kuli lisholi li fitile. Hora ni hora lizebe za hae li pakukile mi meto ni ona a lutukile. Ku bunolo ku bona mw’a kona ku tilimukisezwa ki lilata le li si lona, inge cwalo moya ha u kala ku fuka ka sipundumukela mwahal’a likota kamba kaze ha i wisa nto ye ñwi.—Luka 12:39, 40.
Nto ye swana i kona ku ezahala ku ba ba “libelezi ku bonahala kwa Mulen’a luna Jesu Kreste.” (1 Makorinte 1:7) Baapositola ne ba nahana kuli Jesu n’a ka “zusa mubuso wa Isilaele” ha s’a zuhile fela kwa bafu. (Likezo 1:6) Lilimo-limo hasamulaho, Bakreste mwa Tesalonika ne ba na ni ku hupuliswa kuli ku ba teñi kwa Jesu ne ku sa li kwapili. (2 Matesalonika 2:3, 8) Niteñi, litibelelo ze n’e si ka ezahala ze ama lizazi la Jehova ne li si ka yembulula balutiwa ba Jesu ba kwa makalelo mwa nzila ye isa kwa bupilo.—Mateu 7:13.
Miteñi ye, ha lu swaneli ku kala ku ngumoka kabakala kuli mafelelezo a muinelo wo wa linto a bonahala ku liyeha. Mulibeleli ya tona a kana a kwashekiwa ki musholokoto o si ona, kono se sinde kikuli a libelele a sa lobali! W’o ki ona musebezi wa hae. Ni kwa Bakreste ku cwalo.
[Siswaniso se si fa likepe 18]
Kana mu kozwi kuli lizazi la Jehova li fakaufi?
[Maswaniso a fa likepe 19]
Mikopano, tapelo, ni tomahanyo ye nde ya ku ituta li lu tusa ku libelela
[Siswaniso se si fa likepe 22]
Sina Margaret, haike lu libelele ka pilu-telele ni ka ku zwelapili ku tukufalelwa