“Mu Sutelele ku Mulimu Mi U Ka Sutelela ku Mina”

Linzwi La Mulimu L’a Sebeza Pili ni Hamulaho

KAMBE ne mu katani Tony ha n’a na ni lilimo ze 13 ku isa ku ze 16, ne mu kabe mu fumani mushimani ya situhu ni buhali ya n’a yanga hahulu kwa libaka ze ñwi ze nyazahala mwa Sydney kwa Australia. Balikani ba hae ba bañwi ne ba li mwa likwata ze sa utwi. Hañata ne ba uzwa mwa mandu, ku lwanisa likwata ze ñwi, ni ku kunupana mwa mikwakwa.

Tony n’a kalile ku zuba ha n’a li wa lilimo ze 9. Ha kwanisa lilimo ze 14, na sa bile muzubi yo mutuna wa matokwani mi n’a na ni mizamao ye maswe. Ha y’o kwanisanga lilimo ze 16, n’a sa pili fela a sa itusisi mulyani o kola o bizwa heroin, mi seo sa tahisa kuli a kale ku itusisanga milyani ye kola ye bizwa cocaine, ni LSD—mi yena ka sibili u ipulela kuli “mane ne ni itusisa nto kaufela ye ne kona ku ni kola.” Kihona cwale a eza litumelelano za milyani ye kola ni likwata ze peli ze ile nkuwa za likebenga. Kapili-pili Tony a zibahala sina yo muñwi wa balekisi ba milyani ye kola ba ba itingwa hahulu kwa munanga wa kwa upa wa Australia.

Ka zazi Tony n’a itusisa mali a mwahal’a K700,000 ni K1,500,000 kwa heroin ni matokwani. Kono lubasi lwa hae ne lu nyanda hahulu ku fita f’o. Tony u bulela kuli: “Na ni musal’a ka lu kile lwa umiswa hañata litobolo ni litipa mwa pata ki likebenga ze ne bata milyani ye kola ni mali kwa ndu ya luna.” Hamulaho wa ku tamiwa halalu mwa tolongo, Tony a bona kuli u swanela ku tatubisisa ko bu libile bupilo bwa hae.

Ni ha na yanga kwa keleke, Tony n’a ikutwa kuli na kauhani ni Mulimu ya lumelwa kuli u otanga baezalibi ka ku ba cisa mwa lihele ku ya ku ile. Niteñi, Tony ha n’a potezwi ki Lipaki za Jehova ba babeli na makalile ku ziba kuli Mulimu h’a yo cwalo. Mi Tony n’a tabile ku ziba kuli luli n’a kona ku cinca mupilelo wa hae ni ku fuyolwa ki Mulimu. Tony n’a nyangumuzwi ki manzwi a Jesu Kreste a li: “Ku Mulimu linto kaufela za konahala.” (Mareka 10:27) Tony sihulu n’a susumelizwe ki manzwi a’ li: “Mu sutelele ku Mulimu mi u ka sutelela ku mina.”—Jakobo 4:8.

Tony cwale n’a talimani ni butata bwa ku cinca bupilo bwa hae ka ku ya ka lipimo ze mwa Bibele. U bulela cwana: “Ne ni kalile ka ku lisela ku zuba, imi kwamulaho ne ni likile hañata ku tuhela kono kwa pala. Ka m’ata a Jehova, ne ni konile ku tuhela heroin ni matokwani, ili lika ze n’e ni ngongwezi ka lilimo ze 15 kwamulaho. Ne ni sa zibi kuli ne ni ka kona ku tuhela lika zeo.”

Tony ni musal’a hae ha ba sa na sabo ya kuli Mulimu ki ya nyandisa batu mwa lihele ku ya ku ile—ili tuto ye siyo mwa Bibele—kono cwale se ba sepile ku pila ku ya ku ile fa lifasi-mubu le li li paradaisi. (Samu 37:10, 11; Liproverbia 2:21) Tony u itumelela kuli: “Ne ku ngile nako ni buikatazo luli kuli ni fite fa ku cinca bupilo bwa ka ku ya ka lipimo za Mulimu, kono ka tuso ya Jehova ni konile.”

 Ee, mutu yo ya n’a ngongwezwi ki milyani ye kola, n’a fetuhile Mukreste. Ka ku itombola nako ni maluo a bona, yena ni musal’a hae ba neezi likiti-kiti za lihora kwa musebezi wa ku luta Bibele. Hape ba patehile ku uta bana ba babeli ba ba utwa Mulimu. Cinceho ye tuna yeo i konahalile ka m’ata a’ sa palelwi se siñwi a Linzwi la Mulimu, yona Bibele. Mane ku swana fela sina mwa bulelela muapositola Paulusi kuli “Linzwi la Mulimu ki le li pila, mi li na ni mata.”—Maheberu 4:12.

Ni ha ku na ni mitala ye minde cwalo, ku na ni batu ba ba ipapata kuli musebezi wa Lipaki za Jehova wa ku luta Bibele u shandaula mabasi ni ku sinya lipimo ze nde za ba banca. Kono taba ya Tony i latela muhupulo wo kwahule.

Sina Tony, batu ba bañata ba itutile kuli mikwa ye sinya ye tomile mibisi ya kona ku tuliwa. Kamukwaufi? Ka ku lumela ku Mulimu ni ku itinga ku yena ni Linzwi la hae, hamohocwalo ni ka tuso ya balikani ba Sikreste ba ba iyakatwa ili ba ba lilato. Tony u feza cwana ka tabo: “Ni iponezi likuka za Bibele mo li silelelize bana ba ka. Lituto za Bibele li bukelelize linyalo la ka. Mi be ni yahile ni bona ba lobala ka kozo kakuli ha ni sa ba tahiseza sabo.”

[Manzwi a fa likepe 9]

‘Ka m’ata a Jehova, ne ni konile ku tuhela nto ye kola ye n’e ni ngongwezi ka lilimo ze 15’

[Mbokisi fa likepe 9]

Likuka za Bibele Za Sebeza

Likuka ze fitana-fitana za Bibele li konisize batu ba bañata be ne ba ngongwezwi ki milyani ye kola ku ikayutula kwa mikwa ye sinya yeo. Ze ñwi za likuka zeo ki ze:

“Lu ikenise kwa masila kaufela a nama ni a moya, lu nze lu peta ku ikenisa kwa luna ka ku saba Mulimu.” (2 Makorinte 7:1) Ku itusisa milyani ye kola ki ku loba mulao wa Mulimu.

“Simuluho ya butali ki ku saba [Muñ’a] Bupilo; ku ziba Ya-Kenile, ki ku talifa.” (Liproverbia 9:10) Ku fa Jehova likute le li tomile fa zibo ye nepahezi ya za hae ni linzila za hae ku konisize ba bañata ku ikayutula kwa milyani ye kola.

“U sepe [Muñ’a] Bupilo ka pilu ya hao kaufela, mi u si ke wa tiyela fa butali bwa hao; u beye [Muñ’a] Bupilo mwa milelo ya hao kaufela, mi Yena u ka lukisa linzila za hao.” (Liproverbia 3:5, 6) Mikwa ye sinya i kona ku tuliwa ka ku sepa Mulimu ka ku tala ni ku itinga luli ku yena.