Piho ya Bashaeli ba Mubuso

Ba “Utwa” Taba ya Mubuso mwa Brazil

KULI ba kone ku shaela taba ye nde ya Mubuso ku bosusu, Lipaki za Jehova ba bañata mwa Brazil ba itakalelize ku ituta Puo ya Liswanisezo za ka Mazoho ya kwa Brazil. Buikatazo bwa bona bu tahisa ze nde luli, sina mo li boniseza litaba ze latelela.

Eva, * musali yo muñwi wa susu mwa São Paulo, ha s’a tutile ni bana ba hae ba balalu ku yo pila mwa bunyazi ni munna yo muñwi wa susu, Eva a kala ku ituta puo ya bosusu. Nako ye ñwi kwa masintolo, Eva ni nyazi ya hae ba katana sikwata sa Lipaki ba ba li bosusu, mi ba ba memela kwa mukopano kwa Ndu ya Mubuso. Ba amuhela memo yeo, ka ku hupula kuli ne ba memelwa kwa mukiti.

Kabakala ku sa ziba hande puo ya liswanisezo za ka mazoho, Eva n’a utwile fela ze nyinyani ku ze n’e bulelwa kwa mukopano w’o. Hamulaho, Lipaki ba bañwi ba mu mema ku yo ca ni bona lico kwa ndu ya bona. Ka ku itusisa maswaniso a mwa broshuwa ya Ikole Bupilo fa Lifasi-mubu Ku Ya Ku Ile!, ba mu taluseza sepiso ya Mulimu ka za paradaisi ya lifasi ye taha. Eva n’a tabezi za n’a itutile mi a kala ku yanga kwa mikopano kamita.

Hamulahonyana, kuli Eva a pile ka ku ya ka lipimo za Bibele, a siya nyazi ya hae. Niha n’a lwanisizwe hahulu ki lubasi lwa habo, a zwelapili ku hula kwa moya mi a kolobezwa ka 1995. Likweli ze silezi ku zwa fo, Eva a kala ku eza bupaina, kamba ku itusisa buñata bwa nako ya hae kwa ku shaela Mubuso. Ku zwa nako yeo s’a tusize bosusu ba bane ku fita fa buineelo ni kolobezo.

Carlos n’a pepilwe a li susu. Ku zwelela kwa bwanana n’a ikenyize ku za ku itusisa milyani ye kola, buhule, ni busholi. Kakuli n’a nz’a fumbelwa ki ba likwata ze ñwi za bubangoki, a balehela kwa São Paulo mi a yo pila nakonyana ni João. Sina Carlos, João n’a li susu mi ni yena n’a li sibangoki.

Lilimonyana hasamulaho, Carlos a ituta litaba za Mubuso, mi nto yeo ya tahisa kuli a tuhele mikwa ye maswe ni ku ñolisa linyalo la hae. Ha s’a ezize lika ze tokwahala ka ku ya ka Mañolo, Carlos a kolobezwa ili ku bonisa buineelo bwa hae ku Jehova. Ka nako ye swana, Carlos n’a sa zibi kuli João ni yena n’a s’a amuhezi taba ye nde mi ni yena n’a s’a ezize licinceho ze tuna mwa bupilo bwa hae. Ha s’a itutile kuli Jehova h’a lumelezi ku lapela maswaniso, João a yumba maswaniso a n’a na ni ona a bulapeli. Ha s’a cincize mupilelo wa hae, João ni yena a kolobezwa.

Carlos ni João ne ba tabile luli ha ne ba kopani kwa Ndu ya Mubuso ni ku bona licinceho zeo sibeli sa bona ne ba ezize! Sibeli sa bona cwale se ba li litoho za mabasi ba bande mi ki bashaeli ba Mubuso ba ba na ni cisehelo.

Nako ye mwa Brazil ku na ni liputeho ze 30 za puo ya bosusu ni likwata ze 154, mi ku na ni bahasanyi ba ba fitelela 2,500, mi b’a 1,500 ku bona ki bosusu. Kwa Mikopano ya bosusu ya Sikiliti ya mwa 2001 ya “Baluti ba Linzwi la Mulimu” mwa Brazil, ne ku bile ni batu b’a 3,000, mi b’a 36 ne ba kolobelizwe. Ka tuso ya Jehova, mwendi bosusu ba bañwi hape ba bañata ba ka amuhela lushango lwa Mubuso.

[Litaluso za kwatasi]