Ku Lumela ku Mulimu Ye Lu Kana Lu Sa Zibi

MWA Germany, batu ba babeli ku ba balalu ni ba balalu ba lumela ku Mulimu. Niteñi, batu ba ba fitelela sikiti ha ne ba kupilwe kuli ba taluse Mulimu ye ba lumela ku yena, ibata iba kaufela bona ne ba file likalabo ze fapahana-fapahana. Magazine ya makande ye bizwa FOCUS, ne i bihile kuli: “Batu ba mwa Germany ba utwisisa Mulimu ka ku fapahana-fapahana ka ku ya ka mo ba fapahanela.” Nihaike tumelo ku Mulimu ya itebuhiwa, kana haki nto ye swabisa ku lumela ku yena ku si na ku ziba mwa inezi?

Haki mwa Germany fela m’o butu bwa Mulimu bu sa zibahali hande, kono ni mwa linaha li sili za mwa Yurope ku cwalo. Patisiso ye ne ezizwe mwa Austria, Britain, ni Netherlands n’e patuluzi taba ye yambile hahulu ya kuli Mulimu ki “nto ye m’ata ye pahami kamba kunutu ye sa talusehi.” Mulimu sihulu h’a utwisisehi ku ba banca, nihaiba ku ba ba lumela ku yena.

Kana Mulimu Mwa Mu Ziba ka Sibili?

Ku na ni shutano ye tuna ye mwahal’a ku ziba mutu ni ku mu ziba ka sibili. Ku ziba mutu, ya cwale ka mubusi y’a pahami, mubapali yo mutuna, kamba caziba wa mafilimu, ki ku lemuha fela kuli u teñi. Kono ku ziba mutu ka sibili, ku talusa ze ñata. Ku ama ku tekelela butu, muzamao, ni maikuto a mutu y’o, hamoho ni z’a lata, z’a sa lati, ni z’a lelile kwapili. Ku ziba mutu ka sibili ku kona ku tisa kuli yena ni luna lu utwane hahulu.

Likiti-kiti za batu ba ikatulezi kuli ku ba fela ni zibonyana ya za Mulimu ha ku si ka likana. Se ba zibile ze ñata ka za Mulimu ka sibili. Kana muhato wo ba u boni kuli wa swanela? Munna ya bizwa Paul, ya pila kwa mutulo wa Germany yo sapili n’a ziba fela kuli Mulimu u teñi, n’a ikatulezi kuli a mu zibe hande ka sibili. Paul u talusa kuli: “Ku fita fa ku ziba hande Mulimu ku tokwa nako ni buikatazo luli, kono ku na ni mipuzo ye miñata. Ku ba ni silikani se situna ni Mubupi ku tahisa kuli bupilo bu tabise.”

Kana kwa swanela ku ikataza ni ku tanda nako kwa ku ziba Mulimu hahulu? A mu bale taba ye tatama.

[Manzwi a fa likepe 3]

Ku na ni shutano ye tuna ye mwahal’a ku ziba mutu ni ku mu ziba ka sibili