Lipuzo Ze Zwa kwa Babali

Ki kabakalañi Isaya 30:21 ha i bulela kuli linzwi la Jehova li taha “mwamulaho a mina,” hailif’o timana 20 i beya Jehova kwapili ka ku bulela kuli, “U ka talima [Muluti wa mina ya Pahami, NW] ka meto”?

Isaya 30:20, 21 i li: ‘[Muluti wa mina ya Pahami, NW] h’a sa na ku ipata, kono u ka mi talima ka meto. Mi ha mu ka ya ku la bulyo kamba la nzohoto, lizebe za mina li ka utwa mwamulaho a mina linzwi le li li: Nzila ki yona ye, mu zamaye ku yona!’

Ka ku ya ka mo li ñolezwi liñolo leo, mubali u bona Jehova, yena Muluti ya Pahami, fapil’a hae kono u utwa linzwi la Hae mwamulaho. Kono manzwi ao ki a swanisezo mi a swanela ku utwisiswa cwalo.

Manzwi a swanisezo a mwa timana 20 a bonisa inge kuli mutanga u libelela ku mulen’a hae, y’o nako kaufela a itukiselize ku eza z’a laelwa ki mulena. Sina mutanga ya talimisisa lizoho la mulen’a hae kuli a lemuhe z’a bata, kacenu batu ba Jehova ba isa mamelelo ye tuna kwa litaelo ze zwelapili za mwa Bibele zeo Jehova a fa ka kopano ya hae ya fa lifasi. (Samu 123:1, 2) Ee, ba eza za ba laela, ku tokomela lika kaufela z’a ba bonisa Jehova ka “mutanga ya sepahala, ya na ni kutwisiso.”—Mateu 24:45-47.

Ku cwañi he ka za linzwi le ba utwa batanga ba hae mwamulaho? Kwa lukela ku kolwa kuli linzwi le li zwa mwamulaho ki linzwi la Mulimu le ne li bulezwi kwamulaho, lona Linzwi la hae le li ñozwi ka mo li talusezwa ki “sikombwa se si sepahala.” (Luka 12:42) Batanga ba Mulimu ba cwale ba utwa linzwi la hae ka ku tukufalelwa ku ituta Bibele ni ka ku sebelisa likuka za yona mwa bupilo bwa bona ka tuso ya lihatiso ze lukisizwe ki “mutanga ya sepahala, ya na ni kutwisiso,” sona “sikombwa se si sepahala.” Ka ku latelela ni ku ziba hande litaelo ze swanela ze fiwa ki Muluti ya Pahami ni ka ku ituta Linzwi la Mulimu, le li ñozwi kale-kale k’o, batanga ba hae ba mu bona ka swanisezo kwapil’a bona mi ba utwa linzwi la hae mwamulaho.—Maroma 15:4.