Mulalelo wa Mulena Ki Wa Butokwa Mañi ku Mina?

“Mutu ni mutu ya ca kwa buhobe bo, mi a nwela mwa sinwiso sa Mulena ka mukwa o sa swaneli, u ka ba ni mulatu wa mubili ni wa mali a Mulena.” —1 MAKORINTE 11:27.

1. Kezahalo ya butokwa ka ku fitisisa ye lukiselize ku eziwa mwa 2003 ki ifi, mi i simuluha kai?

KEZAHALO ya butokwa ka ku fitisisa ye lukisizwe mwa silimo sa 2003 i ka ba la April 16 manzibwana. Ka nako yeo, Lipaki za Jehova ba ka kopana ni ku eza Kupuzo ya lifu la Jesu Kreste. Sina mo ku boniselizwe mwa taba ye felile, Jesu ni baapositola ba hae ha se ba ezize Paseka la Nisani 14, 33 C.E., n’a tomile kezahalo yeo, ye bizwa hape kuli ki Mulalelo wa Mulena. Liswanisezo za Kupuzo, ili buhobe bo bu si ka ya mumela ni veine ye fubelu li yemela mubili wa Kreste o sina sibi ni mali a hae a n’a suluzwi. Seo ki sona sitabelo si nosi se si kona ku liulula batu kwa sibi ni lifu ze ba hozize.—Maroma 5:12; 6:23.

2. Kwa 1 Makorinte 11:27 ku ñozwi temuso mañi?

² Ba ba ca kwa liswanisezo za Kupuzo ba lukela ku eza cwalo ka mukwa o swanela. Muapositola Paulusi n’a bonisize hande seo ha n’a ñolezi Bakreste ba kwa Korinte wa kwakale, k’o Mulalelo wa Mulena ne u sa eziwi ka nzila ye lukile. (1 Makorinte 11:20-22) Paulusi n’a ñozi kuli: “Mutu ni mutu ya ca kwa buhobe bo, mi a nwela mwa sinwiso sa Mulena ka mukwa o sa swaneli, u ka ba ni mulatu wa mubili ni wa mali a Mulena.” (1 Makorinte 11:27) Manzwi ao a talusañi?

Ba Bañwi Ne Ba I Eza ka Mukwa O Sa Swaneli

3. Bakreste ba kwa Korinte ba bañata ne ba eza cwañi ha ne ku eziwa Mulalelo wa Mulena?

³ Bakreste ba bañata ba kwa Korinte ne ba eza Kupuzo ka mukwa o sa swaneli. Mwahal’a bona ne ku na ni likauhano, mi ka nakonyana, ba bañwi ne ba tisanga milalelo ya bona mi ne ba to i canga pili mukopano u si ka kala kamba  ha u nze u eziwa, mi hañata ne ba nwanga ni ku ca ku fiteleza. Ne ba sa toni mwa munahano ni kwa moya. Seo ne si tahisize kuli ba be ni “mulatu wa mubili ni wa mali a Mulena.” Be ne ba sa laleli ne ba lapa mi minahano ya bona ne i yembuluka. Luli, ba bañata ne ba ca ni ku nwa ka kashwau ni ka ku sa lemuha ka ku tala butokwa bwa kezahalo. Ki lona libaka ha ne ba itahiseza katulo!—1 Makorinte 11:27-34.

4, 5. Ki kabakalañi ha ku li kwa butokwa ku ba ba canga kwa liswanisezo za Kupuzo ku itekulanga?

⁴ Silimo ni silimo Kupuzo ha i sutelela, ki ko kunde kuli ba ba canga kwa liswanisezo ba itekulange. Kuli ba abane ka mukwa o swanela mwa silyela seo, ba lukela ku ba ba ba tiile kwa moya. Mutu kaufela ya sa bonisi likute, kamba mane ya shwaula sitabelo sa Jesu u kona ku “zwiswa mwa sicaba sa habo,” sina mo ne ku ezezwanga ku Muisilaele ya n’a abana mwa silyela inge a si ka kena.—Livitike 7:20; Maheberu 10:28-31.

⁵ Paulusi n’a bapanyize Kupuzo kwa silyela sa mwa Isilaele wa kwakale. N’a bulezi ka za be ne ba ca kuli ne ba li mwa kopano ni Kreste, mi n’a ize: “Ha mu koni ku nwela mwa sinwiso sa Mulena ni mwa sinwiso sa badimona; ha mu koni ku ca ku  za tafule ya Mulena ni ku za tafule ya badimona.” (1 Makorinte 10:16-21) Haiba mutu ya canga kwa liswanisezo za Kupuzo a eza sibi se situna, u lukela ku ipulela sibi sa hae ku Jehova ni ku kupa tuso ya kwa moya kwa banna-bahulu ba mwa puteho. (Liproverbia 28:13; Jakobo 5:13-16) Haiba a baka luli ni ku tahisa miselo ye bonisa ku baka, h’a ca kwa liswanisezo, ki ka mukwa o swanela.—Luka 3:8.

Ku Fumaneha Fela Teñi ka Likute

6. Mulimu u file tohonolo ku bomañi fela ya ku abana kwa Mulalelo wa Mulena?

⁶ Kana ba ba sebelisana hande ni bomasiyaleti kwa banyani ba Kreste b’a 144,000 ba swanela ku ca kwa Mulalelo wa Mulena? (Mateu 25:31-40; Sinulo 14:1) Batili. Mulimu u file fela tohonolo yeo ku b’a tozize ka moya o kenile kuli ba to ‘ca sanda ni Kreste.’ (Maroma 8:14-18; 1 Joani 2:20) Kacwalo he, ki sifi se ba eza ba ba na ni sepo ya ku to pila ku ya ku ile mwa paradaisi ya mwa lifasi kaufela ye ka ba mwatas’a Mubuso? (Luka 23:43; Sinulo 21:3, 4) Kabakala kuli ha ba na sepo ya ku yo ca sanda ni Jesu kwa lihalimu, ba yanga kwa Kupuzo ku yo bona fela ka likute ze ezahala.—Maroma 6:3-5.

7. Ki kabakalañi Bakreste ba kwa makalelo ha ne ba ziba kuli ne ba swanela ku ca kwa liswanisezo za Kupuzo?

⁷ Bakreste ba niti ba kwa makalelo ne ba tozizwe ka moya o kenile. Buñata bwa bona ne ba kona ku itusisa mpo ya moya i liñwi kamba li sikai za ku eza limakazo, ze cwale ka ku bulela mwa malimi. Kacwalo, ne ku li bunolo kwa batu bao ku ziba kuli ne ba tozizwe ka moya ni ku ca kwa liswanisezo za Kupuzo. Kono mwa linako za luna, nto yeo i kona ku zibwa ka ku itinga fa manzwi a’ tahile ka moya wa Mulimu a cwale ka a: “Kaufela ba ba zamaiswa ki Moya wa Mulimu, bona ki bana ba Mulimu. Kakuli ha mu si ka amuhela moya wa butanga kuli sabo i be teñi hape; kono mu amuhezi Moya wa ba ba añulwa, o ka ona lu biza, lu li, Abba, Ndate!”—Maroma 8:14, 15.

8. “Buloto” ni “mufuka” ze bulezwi mwa Mateu kauhanyo 13 li yemela bomañi?

⁸ Mwa lilimo ze fitile, batoziwa ba luli ne ba nze ba hula sina “buloto” mwa simu mo ku na ni “mufuka,” ona Bakreste ba buhata. (Mateu 13:24-30, 36-43) Ku kala mwa ma-1870, “buloto” bwa kala ku iponahalela hande, mi lilimo-limo hasamulaho, Bakreste ba ba li baokameli ba ba tozizwe ne ba bulelezwi kuli: “Maeluda . . . ba swanela ku taluseza ba ba putehani [fa Kupuzo] lisupo ze,—(1) tumelo mwa mali [a Kreste]; ni (2) ku ineela ku Mulena ni kwa sebelezo ya hae, mane ku isa lifu. Ku tuha f’o ba meme bote ba ba lata ku eza cwalo ni ba ba ineezi cwalo ku abana mwa ku eza mukiti wa lifu la Mulena.”—Studies in the Scriptures, Buka ya bu 6, The New Creation, likepe 473. *

Ku Bata “Lingu Ze Ñwi”

9. Ba “buñata bo butuna” ne ba zibahalizwe cwañi hande ka 1935, mi ba bañwi be ne ba canga kwa liswanisezo za Kupuzo ne ba ezize cwañi?

⁹ Nako ha i nze i ya, Lipaki za Jehova ba kala ku isa mamelelo kwa batu ba bañwi kwand’a balateleli ba Kreste ba ba tozizwe. Nto ye tuna ye ama seo ne i ezahezi mwahal’a lilimo za ma-1930. Kwa makalelo, batu ba Mulimu ne b’a nga kuli “buñata bo butuna bwa batu” ba ba bulezwi kwa Sinulo 7:9 ne li sitopa sa bubeli sa kwa moya, ili se ne si li sina balikani ba munyaliwa wa Kreste, se ne si ka yo swalisana kwa lihalimu ni batoziwa b’a 144,000, ba ba zusizwe kwa bafu. (Samu 45:14, 15; Sinulo 7:4; 21:2, 9) Kono la May 31, 1935, mwa ngambolo ye n’e filwe kwa mukopano wa Lipaki za Jehova mwa Washington, D.C., mwa U.S.A., ne ku talusizwe ka ku ya ka Mañolo kuli “buñata bo butuna bwa batu” ba yemela “lingu ze ñwi” ba ba pila mwa nako ya maungulelo. (Joani 10:16) Hamulaho wa mukopano w’o, ba bañwi be ne ba canga kwa liswanisezo za Kupuzo ba tuhela ku ca kakuli ne ba boni kuli sepo ya bona ne li ya ku pila fa lifasi, isi kwa lihalimu.

10. Mu kona ku talusa cwañi sepo ni misebezi ya “lingu ze ñwi” za cwale?

 ¹⁰ Sihulu ku zwa ka 1935, ku bile ni musebezi wa ku bata ba ba ka ba “lingu ze ñwi,” ba ba lumela mwa sitabelo, ku ineela ku Mulimu, ni ku tusa “mutapinyana” wa batoziwa mwa musebezi wa ku kutaza Mubuso. (Luka 12:32) Lingu ze ñwi bao ba sepa ku pila ku ya ku ile fa lifasi, kono mwa lika ze ñwi kaufela, ba swana ni bomasiyaleti ba cwale ba ba li bacalifa ba Mubuso. Sina bazwahule ba mwa Isilaele wa kwakale be ne ba lapela Jehova ni ku latelela Mulao, lingu ze ñwi kacenu ba lata ku eza misebezi ya Sikreste, ye cwale ka ku kutaza taba ye nde ni lilama za Isilaele wa kwa moya. (Magalata 6:16) Kono sina mo ne ku bezi kuli ha ku na muzwahule ya n’a kona ku ba mulena kamba muprisita mwa Isilaele, ba lingu ze ñwi ni bona ha ba koni ku busa mwa Mubuso wa lihalimu, kamba ku ba baprisita.—Deuteronoma 17:15.

11. Lizazi l’a kolobelizwe mutu li kona ku ama cwañi sepo ya hae?

¹¹ Kacwalo, ha i to fitanga ku bo ma-1930, ne se ku bonahala hande kuli buñata bwa sitopa sa lihalimu ne se si ketilwe. Ka lilimo-limo cwale, musebezi u bile wa ku bata lingu ze ñwi, ba ba na ni sepo ya ku pila fa lifasi. Haiba mutoziwa a tuhela ku sepahala, mwendi yo muñwi wa lingu ze ñwi ya sebelelize Mulimu ka busepahali ka nako ye telele u kona ku fiwa ku yola sibaka ku b’a 144,000 sa ya si ka sepahala.

Libaka Ha ku Banga ni ku Hakanyeha

12. Ki miinelo mañi ye lukela ku ezisa mutu ku tuhela ku ca kwa liswanisezo za Kupuzo, mi ki kabakalañi?

¹² Bakreste ba ba tozizwe ha ba kakanyi kuli ba bizelizwe kwa lihalimu. Kono ku cwañi haiba batu ba bañwi ba ba si ka bizwa cwalo ba canga kwa liswanisezo za Kupuzo? Ka ku ba kuli cwale ba ziba kuli ha ba na sepo ya ku ya kwa lihalimu, lizwalo la bona luli li swanela ku ba hapeleza ku tuhela ku ca. Mulimu h’a koni ku tabela mutu ya iponahalisa kuli u bizizwe ku yo ba mulena ni muprisita mwa lihalimu, inge a ziba kuli luli h’a si ka bizwa. (Maroma 9:16; Sinulo 20:6) Jehova n’a bulaile Kora wa Mulivi kakuli n’a tundamezi ku lika ku amuha Aruni buprisita. (Exoda 28:1; Numere 16:4-11, 31-35) Haiba ku na ni Mukreste ya fumana kuli n’a nz’a ca kwa liswanisezo za Kupuzo ka mafosisa, u lukela ku tuhela ni ku kupa swalelo ku Jehova ka buikokobezo.—Samu 19:13.

13, 14. Ba bañwi ba kona ku nahaniswa kiñi ka mafosisa kuli ba na ni pizo ya lihalimu?

¹³ Ba bañwi ba kona ku nahaniswa kiñi ka mafosisa kuli ba bizelizwe kwa lihalimu? Ku siyamenwa kamba ku tahelwa ki kozi ye ñwi ku kona ku tahisa kuli ba si ke ba tabela bupilo fa lifasi. Kamba ba kana ba bata ku swana ni mulikani yo mutuna ya li ki Mukreste ya tozizwe. Kono luli, Mulimu h’a si ka fa mutu ufi kamba ufi ku fa ba bañwi tohonolo yeo. Mi hape h’a tozangi bacalifa ba Mubuso ka ku ba tahiseza ku utwa manzwi a’ ba taluseza kuli ba tozizwe.

¹⁴ Muhupulo wa bulapeli bwa buhata wa kuli batu ba bande kaufela ba ya kwa lihalimu u kona ku tahiseza ba bañwi ku nahana kuli ba bizelizwe kwa lihalimu. Kacwalo, lu tokwa ku tokomela kuli lu si ke lwa zamaiswa ki mihupulo ya kale ye fosahezi kamba lika ze ñwi. Ka mutala, ba bañwi ba kana ba ipuza kuli: ‘Kana na nwanga milyani ye lyanganisanga maikuto a ka? Kana maikuto a ka kwa lika ki a matuna hahulu kuli a kona ku ni hakanyisa?’

15, 16. Ki kabakalañi ba bañwi ha ba kana ba nahana ka mafosisa kuli ba tozizwe?

¹⁵ Ba bañwi ba kana ba ipuza kuli: ‘Kana ni bata libubo? Kana ni lakaza ku ba ni m’ata nako ye kamba kwapili ka ku ba mucalifa ni Kreste?’ Bacalifa ba Mubuso ha ne ba bizizwe kwa makalelo, ne si kaufel’a bona be ne ba na ni buikalabelo mwa puteho. Hape ba ba bizelizwe kwa lihalimu ha ba batangi libubo kamba ku itumba ka za ku toziwa kwa bona. Ba bonisa buikokobezo bo bu libelelwa ku boniswa ki ba ba na ni “muhupulo wa Kreste.”—1 Makorinte 2:16.

¹⁶ Ba bañwi mwendi ba fitile fa ku nahana  kuli ba bizelizwe kwa lihalimu kakuli se ba bile ni zibo ye ñata ya Bibele. Kono ku toziwa ka moya ha ku tahisi kuli mutu a be ni zibo ye ipitezi, kakuli Paulusi n’a na ni ku luta ni ku laya batoziwa ba bañwi. (1 Makorinte 3:1-3; Maheberu 5:11-14) Mulimu u na ni tukiso ya ku fa lico za kwa moya kwa batu ba hae kaufela. (Mateu 24:45-47) Kacwalo ha ku na ya swanela ku nahana kuli ku ba Mukreste ya tozizwe ku mu fa butali bo bu fita bwa ba ba na ni sepo ya ku pila fa lifasi. Ku kona hande ku alaba lipuzo za mwa Mañolo, ku fa bupaki, kamba ku fa lingambolo za Bibele ha ku paki kuli mutu u tozizwe ka moya. Bakreste ba ba na ni sepo ya ku pila fa lifasi ni bona ba ezanga hande mwa likalulo zeo.

17. Ku toziwa ka moya ku itingile ku mañi mi hape ku itingile fañi?

¹⁷ Haiba mulumeli yo muñwi a buza ka za pizo ya lihalimu, eluda kamba Mukreste yo muñwi ya hulile kwa moya wa kona ku buhisana taba yeo ni yena. Kono ha ku na ya kona ku atulela yo muñwi ka za taba yeo. Mutu ya na ni pizo yeo luli ha tokwi ku buza ba bañwi ka za haiba u na ni sepo yeo. Batoziwa ba “pepilwe sinca, isi ka peu ye bola, kono ka ye sa boli, ka Linzwi la Mulimu le li pila, le li ina.” (1 Pitrosi 1:23) Ka moya ni ka Linzwi la hae, Mulimu u calanga “peu” ye tahisa kuli mutu a ‘pepiwe sinca,’ a na ni sepo ya ku pila kwa lihalimu. (2 Makorinte 5:17) Mi Jehova ki yena ya ketanga. Ku toziwa ha ku “yo mwa mata a ya lata, kamba a ya itahanela; kono [ku] mwa mata a Mulimu.” (Maroma 9:16) Kacwalo, mutu u kona ku ikolwisa cwañi kuli u na ni pizo ya lihalimu?

Libaka Ha Ba Kolwa

18. Moya wa Mulimu u pakelana cwañi ni moya wa batoziwa?

¹⁸ Bupaki bwa moya wa Mulimu bu kolwisa Bakreste ba ba tozizwe kuli ba na ni sepo ya ku ya kwa lihalimu. Paulusi n’a ñozi kuli: “Mu amuhezi Moya wa ba ba añulwa, o ka ona lu biza, lu li, Abba, Ndate! Ni ona Moya u pakelana ni moya wa luna kuli lu bana ba Mulimu. Mi ha lu li bana hape lu ka ca sanda; lu ce sanda sa Mulimu, lu si ce ni Kreste; haiba lu utwa butuku ni yena, kuli lu fumane kanya ni yena.” (Maroma 8:15-17) Ka ketelelo ya moya o kenile, moya wa batoziwa u ba hapeleza ku  nga kuli ze a bulela Mañolo ka za bana ba Jehova ba kwa moya za sebeza ku bona. (1 Joani 3:2) Moya wa Mulimu u ba tahiseza ku ikutwa kuli ki bana ba hae mi u ba fa sepo ye ipitezi. (Magalata 4:6, 7) Ku pila ku ya ku ile fa lifasi ka ku ba batu ba ba petehile, mwahal’a balikani ni bana ba mba ne ku ka ba hande, kono Mulimu h’a si ka ba fa sepo ye cwalo. Ka moya wa hae, Mulimu u beile ku bona sepo ye tiile ya lihalimu kuli mane ba itakaleza ku itombola lika kaufela za fa lifasi.—2 Makorinte 5:1-5, 8; 2 Pitrosi 1:13, 14.

19. Bulikani bo bunca bu peta kalulo mañi mwa bupilo bwa Bakreste ba ba tozizwe?

¹⁹ Bakreste ba ba tozizwe ba na ni buikolwiso ka za sepo ya bona ya lihalimu, ya kuli ba beilwe mwa bulikani bo bunca. Jesu n’a bulezi ka za teñi ha n’a tomile Kupuzo kuli: “Sinwiso se, ki bulikani bo bunca bwa mwa mali a ka, a’ sululelwa mina.” (Luka 22:20) Mulimu ni batoziwa ba mwa bulikani bo bunca b’o. (Jeremia 31:31-34; Maheberu 12:22-24) Jesu ki mutamanisi wa bona. Bulikani bo bunca bo bu tomilwe ka mali a Kreste a suluzwi b’o bu ngile batu mwahal’a Majuda hamoho ni mwahal’a macaba. Bao ba bizwa ka libizo la Jehova mi se ba li kalulo ya “peu” ya Abrahama. (Magalata 3:26-29; Likezo 15:14) “Bulikani bo bu sa feli” b’o bu konisa kuli Maisilaele ba kwa moya kaufela ba zuswe kwa bafu ni ku ba ni mibili ye sa shwi mwa lihalimu.—Maheberu 13:20.

20. Batoziwa ba beilwe mwa bulikani mañi ni Kreste?

²⁰ Batoziwa ba na ni buikolwiso ka za sepo ya bona. Ba beilwe mwa bulikani bo buñwi hape, ili bulikani bwa Mubuso. Ka za ku abana kwa bona ni Kreste, Jesu n’a ize: “Mu tiiselize ni na mwa miliko ya ka; mihe ni ka mi fa mubuso, sina Ndate h’a ni file ona.” (Luka 22:28-30) Bulikani b’o bo bu mwahal’a Kreste ni ba ba ka busa ni yena ki bwa kamita.—Sinulo 22:5.

Nako ya Kupuzo Ki Nako Ye Nde

21. Lu kona ku fumana cwañi tuso ye tuna ka nako ya Kupuzo?

²¹ Nako ya Kupuzo i tahisa lika ze ñata ze nde. Ku latelela tomahanyo ya ka nako yeo ya ku bala Bibele ku ka lu tusa. Hape ki nako ye nde ya ku lapela, ku yeya ka za bupilo ni lifu la Jesu fa lifasi, ni ku abana mwa musebezi wa ku kutaza Mubuso. (Samu 77:12; Mafilipi 4:6, 7) Kupuzo yona ka sibili i lu hupuza lilato le li bonisizwe ki Mulimu ni Kreste ka sitabelo sa Jesu sa tiululo. (Mateu 20:28; Joani 3:16) Tukiso yeo i lu fa sepo ni ku lu omba-omba mi i swanela ku tiisa tukufalelo ya luna ya ku pila sina Kreste. (Exoda 34:6; Maheberu 12:3) Hape Kupuzo i swanela ku lu tiisa kuli lu pete za buineelo bwa luna ka ku ba batanga ba Mulimu ni ku ba balateleli ba ba sepahala ba Mwan’a hae ya lateha.

22. Mpo ya Mulimu ye tuna ka ku fitisisa kwa batu ki ifi, mi ki ifi nzila ye ñwi ya ku bonisa kuli lwa itebuha yona?

²² Jehova u lu fa limpo ze nde hakalo! (Jakobo 1:17) Lu etelelwa ki Linzwi la hae, lu tusiwa ki moya wa hae, mi lu na ni sepo ya bupilo bo bu sa feli. Mpo ye tuna ka ku fitisisa ya Mulimu ki sitabelo sa Jesu kabakala libi za batoziwa ni za ba bañwi kaufela ba ba na ni tumelo. (1 Joani 2:1, 2) Kacwalo, lifu la Jesu ki la butokwa mañi ku mina? Kana mu ka ba mwahal’a ba ba itebuha lona ka ku fumaneha kwa mukopano manzibwana a la April 16, 2003, kwa Mulalelo wa Mulena?

[Litaluso za kwatasi]

Likalabo za Mina Ki Lifi?

• Ki bomañi ba ba swanela ku ca kwa liswanisezo za Kupuzo?

• Ki kabakalañi ba “lingu ze ñwi” ha ba yo fumanehanga fela ka likute kwa Mulalelo wa Mulena?

• Bakreste ba ba tozizwe ba zibanga cwañi kuli ba swanela ku ca kwa buhobe ni veine fa Kupuzo ya lifu la Kreste?

• Nako ya Kupuzo ki nako ye nde ya ku ezañi?

[Lipuzo za Tuto]

[Grafu/Maswaniso a fa likepe 18]

(Kuli mu bone mo i hatiselizwe luli, mu bone hatiso)

Be Ne Ba Li kwa Kupuzo

KA MA-MILIONI

15,597,746

15

14

13,147,201

13

12

11

10

 9

 8

 7

 6

 5

4,925,643

 4

 3

 2

 1

878,303

63,146

1935 1955 1975 1995 2002

[Siswaniso se si fa likepe 18]

Kana mu ka fumaneha kwa Mulalelo wa Mulena unomwaha?

[Maswaniso a fa likepe 21]

Nako ya Kupuzo ki nako ye nde ya ku ekeza kwa ku bala Bibele ni ku abana mwa musebezi wa ku kutaza Mubuso