“Ne Ni Sa Zibi Ze Ñata ka za Mulimu”

MUNNA yo muñwi ya pila mwa Kerala, kwa India n’a ñozi kuli, “Se ku fitile silimo inge ni potelwanga ki Lipaki za Jehova ba ba to ni talusezanga litaba ze nde ka za Mubuso wa Mulimu. Ka lilimo ze 8 ne ni li Mukatolika, kono ne ni sa zibi ze ñata ka za Mulimu. Kono mwa silimo si li siñwi fela se, ni itutile ze ñata.” A zwelapili kuli: “Ni tabile hahulu ku ziba kuli Tora ya ku Libelela i hatiswa mwa lipuo ze 139 [ze 146 cwale]. Kwa komokisa kuli batu ba lipuo kaufela se ba fita fa ku ziba litaba za Mulimu.”

Nihaike baituti ba bañata ba za mihupulo ya batu ba li ku ziba Mulimu ha ku konahali, muapositola Paulusi n’a bonisize hande-nde kuli kw’a konahala. Ha n’a bulela kwa sikwata sa batu ba kwa Atene, bao ku bona ba bañwi ne ba lapela kwa aletare ye neezwi “Mulimu Ya Sa Zibwi,” Paulusi n’a ize: “Mulimu yo, ye mu lapela mu sa mu zibi, ki Yena ye ni mi bulelela. Mulimu ya ezize lifasi ni linto kamukana ze ku lona . . . ki Yena ya fa ze pila kamukana bupilo, ni ku buyela, ni lika kaufela. Ki Yena ya ezize ka mali a li mañwi macaba kamukan’a batu, kuli ba yahe mwa sibaka kaufela sa lifasi.”—Likezo 17:23-26.

Paulusi n’a susuelize bateelezi ba hae ku bata ku ziba Mubupi, kakuli h’a “ini kwahule ni mutu ni mutu wa luna.” (Likezo 17:27) Lipaki za Jehova ba ka tabela ku mi tusa ku fita fa ku ziba Mulimu wa niti ni mikwa ya hae ye kateleha.