Ki Kabakalañi Batu Ha Ba Nyandisezwa Bulapeli bwa Bona?

KANA mwa lumela kuli batu ba swanela ku nyandiswa kabakala bulapeli bwa bona? Mwendi ha mu lumeli cwalo—sihulu haiba batu bao ha ba filikanyi litukelo za ba bañwi. Kono batu se ba nyandiselizwe bulapeli bwa bona ka nako ye telele mi ba sa nyandiswa. Ka mutala, Lipaki za Jehova ba bañata mwa Yurope ni mwa libaka ze ñwi za lifasi hañata ne ba amuhilwe tukuluho ya bona ya bulapeli ni ku nyandiswa maswe mwahal’a lilimo kaufela ze mwanda ze felile.

Ka nako yeo, Lipaki za Jehova ne ba nyandisizwe hahulu-hulu ka nako ye telele ili nyandiso ye n’e lelilwe hande mwa bubeli bwa lipuso ze tuna za buhateleli za Yurope. Ze ne ezahezi ku bona li lu lutañi ka za ku nyandisa batu kabakala bulapeli bwa bona? Mi mo ne ba ngezi nyandiso yeo ku lu luta tuto mañi?

“Hasi Ba Lifasi”

Lipaki za Jehova ba ikataza ku latelela mulao, ku pila ka kozo, ni ku ikuteka. Ha ba lwanisangi milonga mi hape ha ba shangumunangi nyandiso ka ku bata ku bulaelwa tumelo ya bona. Bakreste bao ba ikambusize ku za lipolitiki. Ba eza cwalo ka ku utwa manzwi a Jesu a li: “[Balateleli ba ka] hasi ba lifasi, sina na ha ni si wa lifasi.” (Joani 17:16) Milonga ye miñata i lumeleza Lipaki ku ikambusa ku za lipuso za naha. Kono babusi ba  bahateleli ha ba kuteki taelo ya mwa Bibele ya kuli Bakreste ha ba swaneli ku ba ba lifasi.

Libaka ha ba eza cwalo ne li talusizwe kwa mukopano o n’o ezelizwe kwa Yunivesiti ya Heidelberg, kwa Germany, mwa November 2000. Mukopano wo ne u na ni toho ya taba ye li “Ku Hatelelwa ni ku Ikemela: Lipaki za Jehova mwa Lipuso za Buhateleli za Nazi ni Komyunizimu.” Dokota Clemens Vollnhals wa kwa Hannah-Arendt-Institute for Research Into Totalitarianism n’a ize: “Babusi ba bahateleli ha ba ikenyi fela ku za bupolitiki. Ba bata ni ku busa mutu mutumbi.”

Bakreste ba niti ha ba koni ku tuhelela milonga ya batu ku “busa” ze ba eza kaufela, kakuli ba itamile ku sebeleza Jehova Mulimu a nosi. Lipaki ba mwa linaha ze busiwa ki bahateleli ba fumani kuli fokuñwi ze u tokwa Muuso li lwanisana ni tumelo ya bona. Ba ezizeñi mwa miinelo ye cwalo? Lipaki za Jehova ba zibahala ku ba ba ba latelezi sikuka se ne ba bulezi balutiwa ba Jesu Kreste, sa kuli: “Ki swanelo kuli lu utwe Mulimu ku fita batu.”—Likezo 5:29.

Lipaki b’a likiti-kiti ne ba kumalezi tumelo ya bona mi ne ba ikambusize ku za lipuso za naha, niha ne ba nyandisizwe hahulu-hulu. Ne ba konile cwañi ku itiisa? Ne ba fumani kai m’ata a ku itiisa? Ha lu utweñi ba ikalabele. Mi ha lu boneñi seo mañi ni mañi, Paki kamba ya si Paki, a kona ku ituta ku ze ne ezahezi ku bona.

[Manzwi a fa likepe 4]

Lipaki za Jehova mwa Germany ne ba nyandisizwe maswe-maswe ka nako ye telele mwa bubeli bwa lipuso ze tuna za buhateleli za mwa ma-1900

[Manzwi a fa likepe 4]

“Babusi ba bahateleli ha ba ikenyi fela ku za bupolitiki. Ba bata ni ku busa mutu mutumbi.” Dokota Clemens Vollnhals

[Siswaniso se si fa likepe 4]

Lubasi lwa bo Kusserow ne lu amuhilwe tukuluho ya lona kakuli ne lu hanile ku latula tumelo ya lona

[Siswaniso se si fa likepe 4]

Johannes Harms n’a bulaezwi mwa tolongo ya ba Nazi kabakala litumelo za hae