“Ne ni Fumani Ze Ne ni Tokwa Kaufela”

KA KU ya ka piho ya katengo ka World Health Organization, ku felelwa ki tabo kutwi ki nto ye kataza batu ba ba fitelela 120 milioni mwa lifasi kaufela. Ka silimo ni silimo, batu ba 1 milioni ba ipulayanga mi ba ba mwahal’a 10 ni 20 milioni ba likanga ku ipulaya. Ba ba katazwa ki ku felelwa ki tabo ba kona ku tusiwa cwañi? Likalafo za kona ku fukuza manyando, mi ku tobiwa pilu ku butokwa. Hape, ba ba ikutwa cwalo ba fumani tuso ye ñwi mwa lihatiso ze tusa ze tomile fa Bibele za Lipaki za Jehova, sina liñolo le li zwa kwa France le ha li bonisa cwalo.

“Cwanoñu fa, ne ni sa boni libaka le ne ni pilela. Na kupa Mulimu kuli a ni tuhelele ni shwe. Ne li inge kuli ne ni shwile mwahali. Ka ku bata tuso, na lapela ka t’ata ku Jehova. Hape na ikatulela ku bala buka ya 2002 Yearbook of Jehovah’s Witnesses mi na i feza mwa mazazi a malalu. Kaniti luli, ne i ni susuelize hahulu ni ku tiisa tumelo ya ka.

“Hape ne ni ezize patisiso mwa limagazini za Tora ya ku Libelela ni Awake!, mi ne ni komokile hahulu! Se ni balile limagazini zeo kamita ka lilimo ze fitelela 15, kono ne ni si ka lemuha kuli za susueza ni ku tabisa hahulu cwalo. Li tezi lilato—ili nto ye fumaneha ka siwela mazazi a. Ne ni fumani ze ne ni tokwa kaufela.”

Bibele i li: “[Muñ’a] Bupilo u fakaufi ni ba ba na ni pilu ye lobehile, mi u pilisa ba ba ikutwa ku swaba mwa moya wa bona.” (Samu 34:18) Kaniti, bote ba ba na ni “pilu ye lobehile” kamba ba ba “ikutwa ku swaba mwa moya” ba kona ku fumana susuezo ni sepo ya kwapili mwa Bibele. Lipaki za Jehova ba hasanya lihatiso ze bulela ka za Bibele ilikuli ba tuse ba ba mwa butokwi ku fumana tuso mwa buka yeo ye omba-omba ye tahile ka moya wa Mulimu.