Kana Bubotana Bu Ka Fela Muta O Muñwi?

“BONA mioko ya ba ba nyandiswa, ni kuli ha ba na ya ba yemela. Banyandisi bona, mata ki a bona; bale, ha ku na ya ba yemela,” ki mwa n’a bulelezi Mulena Salumoni ya butali wa Isilaele wa kwaikale. (Muekelesia 4:1) Kaniti, ba bañata be ne ba nyandiswa ba n’a talusa f’o hape ne ba li babotana.

Bubotana haki ku sa ba fela ni masheleñi. Ka ku ya ka litaba ze futuka kwa World Bank mwa June 2002, “se ku akalelizwe kuli mwa 1998, batu ba 1.2 bilioni mwa lifasi kaufela ne ba pilela fa mali a sa kwani dola i liñwi (K4,650) ka zazi . . . mi ba bañwi b’a 2.8 bilioni ne ba pilela fa masheleñi a sa kwani madola a mabeli (K9,300) ka zazi.” Ne ku lemuhilwe kuli nihaike lipalo zeo n’e li ze nyinyani ku fita mo ne li akalelizwe pili, “isali ze tuna kabakala kuli batu ba nyanda.”

Kana bubotana bu ka fela muta o muñwi? Jesu Kreste n’a bulelezi balutiwa ba hae kuli: “Babotana mu na ni bona kamita.” (Joani 12:8) Kono kana f’o ku talusa kuli bubotana ni ze maswe ze bu tisa li ka zwelapili ku ya ku ile? Kutokwa, kakuli nihaike Jesu n’a si ka sepisa balateleli ba hae kuli kaufel’a bona ne ba ka ba bafumi, ha lu koni ku bulela ku zwelela kwa manzwi ao kuli babotana ha ba na sepo.

Ku si na taba ni buikatazo bwa batu ni taba ya niti ya kuli lisepiso za ku felisa bubotana hañata ha li si ka petahala, Bibele, lona Linzwi la Mulimu, li lu kolwisa kuli honafa, ha ku sa na ku ba ni babotana. Mane, Jesu n’a shaezi ‘evangeli kwa babotana.’ (Luka 4:18) Evangeli yeo i kopanyeleza ni sepiso ya kuli bubotana bu ka feliswa. Bu ka feliswa Mubuso wa Mulimu ha u ka tahisa miinelo ye lukile fa lifasi.

Lifasi li ka ba hande hahulu ka nako yeo! Mulena wa kwa lihalimu, Jesu Kreste ‘u ka utwela butuku ya fokozi, ni ya shebile, a lamulele bupilo bwa ba ba nyandile.’ Kaniti, ‘u ka ba liulula ku ba ba limba, ba ba ba nyandisa.’—Samu 72:13, 14.

Ka za nako yeo, Mika 4:4 i li: “Ba ka ina, mutu ni mutu mwa kota ya hae ya veine ni mwa kota ya hae ya feiga, ku si na ya ba sabisa; kakuli ki s’o bulezi mulomo wa [Muñ’a] Bupilo wa limpi.” Mubuso wa Mulimu u ka felisa matata kaufela a kataza batu, mane ni ku felisa cwalo makulanu ni lifu. Mulimu ‘u ka miza lifu ku ya ku ile; Mulena Muñ’a Bupilo u ka takula mioko kwa lipata kamukana.’—Isaya 25:8.

Mwa kona ku sepa lisepiso zeo kakuli li sepisizwe ki yena Mulimu ka sibili. Kiñi ha mu sa tatubisisi bupaki bo bu bonisa kuli bupolofita bwa Bibele bwa kona ku sepiwa?

[Manzwi a bañi ba siswaniso fa likepe 32]

FAO photo/M. Marzot