“Mu Sutelele ku Mulimu Mi U Ka Sutelela ku Mina”

Pili ni Hamulaho Wa ku Cinca Bupilo bwa Hae

MATSEPANG n’a s’a ikutwa kuli bupilo bu busula mi ki bwa mbwashula. Musizana y’o n’a pila mwa naha ya Lesotho, ye fumaneha mwahal’a South Africa. N’a hulezi mwa bulapeli bwa Katolika. Niteñi, ku fita ku mu tusa ku sutelela ku Mulimu, masisita ba mu sinya ka lilimo-limo ka ku mu lifanga mali kuli a eze buhule.

Seo sa tahisa kuli Matsepang a tuhele ku sepa bulapeli mi na sa koni ku lumela kuli Mubupi u lilato mi wa babalela luli batu b’a bupile. Bakeñisa ku sa babalelwa ni ku sinyiwa cwalo, Matsepang a tunkeha hahulu kwa pilu mi a ikutwa kuli h’a na tuso ni hanyinyani. A hula cwalo inz’a li wa mifilifili ni lindwa. Kona libaka ha n’a fetuhile sikebenga.

Hañihañi Matsepang a itatela mwa sikwata se ne si bukulanga bazamai mwa sitima. N’a tamilwe ni ku lengiwa mwa tolongo mwa South Africa. Hasamulaho, n’a kutiselizwe habo yena kwa Lesotho, kwa n’a izo zwelapili ni bupilo bwa bubangoki, bucakolwa, mifilifili, ni buitamaeli.

Ha n’a ikutwile hahulu ku ziyeleha mwa bupilo, Matsepang n’a lapezi ku Mulimu kuli a mu tuse. N’a mu sepisize kuli: “Mulimu, haiba ni ka pila, ni ka eza mo ni konela kaufela kuli ni ku sebeleze.”

Kapili-pili, Matsepang n’a potezwi ki balumiwa ba ba li Lipaki za Jehova. Ne ba mu kupile ku ituta ni yena Bibele. Mwa ku ituta cwalo, a fita fa ku lemuha kuli Mulimu h’a si ka yumba batu simulamu kamba kuli h’a ba isi pilu. Mane, n’a lemuhile kuli Satani, yena “ndat’ahe lishano,” ka mano a hae u apesa ba bañwi kapai fa meto kuli ba ikutwe kuli haki ba butokwa ni ku ba kolwisa kuli Jehova h’a koni ku ba katelwa ni kamuta.—Joani 8:44; Maefese 6:11.

Kono, Matsepang n’a omba-ombilwe luli muta n’a itutile kuli lw’a kona ku ikutwa ku kutekeha luli haiba lu bakela libi za kwamulaho, ku kupa swalelo ku Mulimu, ni ku lika ka t’ata kuli lu mu tabise. N’a tusizwe ku utwisisa kuli “Mulimu ki yo muhulu kwa lipilu za luna,” mi u l’u ngela mu sili ku fita mo lu iponela luna beñi.—1 Joani 3:19, 20.

Matsepang n’a nyakalalile ha n’a balile manzwi a walisamu Davida a’ li: “[Muñ’a] Bupilo u fakaufi ni ba ba na ni pilu ye lobehile, mi u pilisa ba ba ikutwa ku swaba mwa moya wa bona.” (Samu 34:18) Ka ku ba yo muñwi wa ba ba ‘swabile mwa moya wa bona,’ n’a fitile fa ku lemuha kuli Jehova h’a yubeki batanga ba hae, mane nihaikaba kuli ba bañwi ba felezwi ki tabo kamba ba ikutwa ku sa ba ba butokwa. N’a tabile hahulu ku ituta kuli Mulimu u babalela  lingu za hae kaufela ni ku ba sileleza mwa nako ya matata. (Samu 55:22; 1 Pitrosi 5:6, 7) Sihulu n’a susumelizwe hahulu ki manzwi a’ li: “Mu sutelele ku Mulimu mi u ka sutelela ku mina.”—Jakobo 4:8.

M’ata a Linzwi la Mulimu, yona Bibele, kapili-pili a kala ku beleka mwa bupilo bwa Matsepang. A kala ku yanga kamita kwa mikopano ya Sikreste mi a tokolomoha mikwa ya hae ye si ya ka Mañolo. Ne ku zwileñi mwateñi? U tuhezi ku ikutwa kuli Mulimu ha koni ku mu lata ni ku mu tabela. Ku zwa f’a kolobelezwa ka ku ba yo muñwi wa Lipaki za Jehova, s’a tandile likiti-kiti za lihora mwa bukombwa bwa Sikreste sina mushaeli wa taba ye nde ya Mubuso. Ku si na taba ni bikelela bya kwamulaho, Matsepang s’a pila bupilo bwa tabo ili bo bu na ni mulelo. Yeo ki ponahazo ye tuna ya m’o Bibele i cinceza bupilo bwa batu.—Maheberu 4:12.

[Manzwi a fa likepe 9]

“Mulimu, haiba ni ka pila, ni ka eza mo ni konela kaufela kuli ni ku sebeleze”

[Mbokisi fa likepe 9]

Likuka za Bibele Z’e Beleka

Likuka ze tatama, ki ze ñwi za likuka za Bibele ze s’e omba-ombile batu be ne ba nyandiswa:

“Mwa buñata bwa minahano ya ka, likutazo za hao [Mulimu] ki zona ze ni tiisize pilu.” (Samu 94:19) “Likutazo” za Jehova ze fumaneha mwa Linzwi la hae li omba-omba hahulu. Ku li nahanisisa ha lu yeya ni ha lu lapela, ku fukuza kwa minahano mi ku hulisa sepo ku Mulimu ka ku ba yena Mulikani ya utwisisa.

“Ba ba lobehile lipilu, [Jehova] wa ba folisa, u tama litombo za bona.” (Samu 147:3) Haiba lwa itebuha sishemo sa Jehova ni tukiso ya hae ya ku lifela libi za luna ka sitabelo sa Jesu sa tiululo, lwa kona ku atumela Mulimu ka sepo lu sa ikutwi mulatu hape. Ku eza cwalo ku ka lu tahiseza mbombolelwa ni mwangalwa o mutuna.

“Ha ku na mutu ya ka ta ku na [Jesu Kreste], konji h’a ka hohiwa ki Ndate ya ni lumile; mi na, ni ka mu zusa ka lizazi la mafelelezo.” (Joani 6:44) Ka moya wa hae o kenile ni ka musebezi wa ku kutaza Mubuso, Jehova ka sibili u lu hohela ku Mwan’a hae ni ku lu fa sepo ya bupilo bo bu sa feli.