Kana Mw’a Hupula?

Kana mu ikozi ku bala limagazini za cwanoñu fa za Tora ya ku Libelela? Mu bone haiba mwa kona ku alaba lipuzo ze latelela:

• Lu kona ku tuseha cwañi ka ku ituta za lubasi lwa Shafani?

Shafani ne li muñoli wa Mulena Josiasi wa Juda. Shafani ne li munna ya n’a na ni m’ata hahulu mwa mubuso, mi n’a tusize mulena mwa muhato wa ku kutisa bulapeli bwa niti. Ba babeli kwa bana ba Shafani ne ba sepahalile ku mupolofita Jeremia. Mi mwan’a hae yo muñwi ni baikulu ba hae ba babeli hape ne ba itusisize litulo za bona kwa ku yemela bulapeli bwa niti. Ni luna, lu swanela ku itusisa maluwo a luna ni litulo kwa ku yemela bulapeli bwa niti.—12/15, makepe 19-22.

• Irene Hochstenbach u konile cwañi ku tiyela bususu bwa hae ni ku kona ku sebeleza Jehova?

N’a bile susu inz’a na ni lilimo ze supile za buhulu. Ku si na taba ni ku ba susu, u itutile ku ambola ni ba bañwi mi cwale u yanga mwa maeto ni munn’a hae (muokameli wa maeto) ha nz’a sebeleza liputeho mwa Netherlands.—1/1, makepe 23-6.

• Ki lifi lihatiso ze peli ze nca ze n’e zwile kwa Mukopano wa Sikiliti wa “Bashaeli ba Mubuso Ba Ba Na ni Tukufalelo”?

Bakreste mwa lifasi kamukana ne ba tabile ku amuhela buka ya Mu Lapele Mulimu A Nosi wa Niti, ye lukiselizwe ku itutiwa ni ba banca ha ba feza ku ituta mwa buka ya Zibo Ye Isa kwa Bupilo bo Bu Sa Feli; buka ye ñwi ye nca ki Mu Sutelele ku Jehova, ye kanatela fa tulemeno twa Jehova ni likezo za hae. Hape i bonisa mo lu kona ku mu likanyiseza mwa ku bonisa tulemeno twa hae.—1/15, makepe 23-4.

• Ki sifi sisupo se si mwa Liproverbia 12:5, ye li: “Mihupulo ya mutu ya na ni niti, ki ya niti”?

Mihupulo ya batu ba ba lukile ki ye minde mi i tahisa ze swanela ni ze lukile. Bakeñisa kuli ba ba lukile ba susumezwa ki lilato la ku lata Mulimu ni batu ba bañwi, milelo ya bona ki ye minde.—1/15, likepe 30.

• Mutu u kona ku tusiwa kiñi kuli a’ nge hande mubeleko?

Kw’a tusa mutu ha twaezwa ku nga musebezi ka butuna isali kwa bwanana. Bibele i lu susueza ku nga musebezi hande, ku sa ba ni buzwa. (Liproverbia 20:4) Hape i susueza Bakreste ku sa iyakatwa hahulu za musebezi. Lu lukela ku lemuha kuli sebelezo ya luna ku Mulimu i lukela ku ba ya butokwa ni ku fita mwa bupilo bwa luna. (1 Makorinte 7:29-31) Hape, Bakreste ba niti ba sepile kuli Mulimu ha na ku ba fulalela.—2/1, makepe 4-6.

• Ki kakai ko aletare i bulezwi pili mwa Bibele?

Ki kwa Genese 8:20, ko i bulela za aletare ye n’e yahilwe ki Nuwe ha n’a zwile mwa areka hamulaho wa Munda. Kono ku bonahala kuli bo Kaine ni Abele ne ba itusisize lialetare mwa ku fa matabelo a bona. (Genese 4:3, 4)—2/15, likepe 28.

• Bakreste ba bañwi ba kona ku itusisa hande cwañi miinelo ya bona ye minca?

Ba bañwi ba amuhezi—kamba ku ikezeza—licinceho kwa mibekeko ya bona z’e ba konisize ku ba ni nako ye ñata mwa bukombwa. Ba bañwi se ba ekelize nako ya bona ni matohonolo a bona mwa sebelezo ya Mulimu ha ba ba ni buikalabelo bo bunyinyani mwa lubasi lwa bona, inge cwalo bana ba bona ha se ba hulile kamba ku kena mwa manyalo.—3/1, makepe 19-22.

• Mitala ya bo Jonasi ni muapositola Pitrosi i lu tusa cwañi ku nga batu ba bañwi ka mw’a b’a ngela Jehova?

Jonasi ni Pitrosi ne ba na ni bufokoli bo bu zibahala hande mwa minahano ya bona ni mihato ye ne b’a ngile ha ne ba likilwe mwa tumelo ni mwa ku ipeya ku utwa. Niteñi, Jehova n’a boni tulemeno to tunde to ne ba na ni tona mi a zwelapili ku itusisa bona mwa sebelezo ya hae. Ba bañwi ha ba lu foseza kamba ku lu filikanya, lwa kona hupula tulemeno twa bona to tunde t’o mwendi ne tu lu tabisize kwamulaho ni bunde b’o Jehova a bona ku bona.—3/15, makepe 16-19.

• Ki kabakalañi linombolo za buka ya Lisamu ha li fapahana mwa Libibele?

Ku na ni shutano ya linombolo mwahal’a buka yeo mwa Siheberu sa kwa makalelo ni toloko ya yona mwa Sigerike se si mwa Septuagint. Litoloko za cwanoñu fa li kana za shutana, ku itingile ka haiba ne li tolokilwe ku zwelela kwa litaba za Siheberu kamba za Septuagint.—4/1, likepe 31.