Lilato Le Li Musa Ki La Butokwa Cwañi?

BIBELE i bulela kuli: “Batu se ba lakaza ku mutu ki lilato la hae le li musa.” (Liproverbia 19:22, NW) Kaniti, likezo ze musa ili ze tahiswa ki lilato za lakazeha luli. Kono mwa Bibele pulelo ya “lilato le li musa” i talusa musa o kana u tomile fa silikani sa kale, mwendi cwalo se ne si kalezi fa nto ye ñwi ye musa ya n’a ezelizwe mutu. Kona kuli, pulelo yeo i kopanyeleza ni busepahali.

Mulena Joasi wa Juda n’a palezwi ku ba ni kalemeno kao ka ka lakazeha. N’a swanela ku bonisa buitebuho ku bondat’ahe ba basali ni bo Jehoyada bomalum’ahe. Joasi a si ka kwanisa kale silimo, bokukw’a hae ba ba maswe ba ikeza Mulena mi ba bulaya bahulwani ba hae kaufela, be ne ba na ni ku yola bulena. Kono ne ba palezwi ku bulaya Joasi wa mwanana kakuli bondat’ahe ba basali ni bomalum’ahe ne ba mu patile luli. Hape ne ba mu lutile Mulao wa Mulimu. Joasi ha n’a to kwanisa lilimo ze 7, bomalum’ahe ka ku ba muprisita yo muhulu ba itusisa m’ata a bona ku bulaya mulena wa musali ya maswe y’o ni ku yolisa Joasi fa bulena.—2 Makolonika 22:10–23:15.

Joasi wa mwanana a busa hande ku fitela bomalum’ahe ba shwa, mi a kalisa ku lapela maswaniso. Mulimu a luma Zakaria mwan’a Jehoyada, ku yo eleza Joasi ka za bukwenuheli bwa hae. Joasi a pobaulisa Zakaria. Ki kezo kwa ku komokisa—ku fetuhela lubasi lo ne lu mu tusize cwalo!—2 Makolonika 24:17-21.

Bibele i bulela kuli: “Mulena Joasi h’a si ka hupula [lilato le li musa la, NW] n’a mu [bonisize] Jehoyada, ndat’ahe Zakaria, kono a bulaya mwan’a hae.” Ha n’a shwa, Zakaria n’a ize: “[Muñ’a] Bupilo a bone, mi a atule!” Sina mwa n’a bulelezi Zakaria, Joasi a kenelwa ki mapongo mi a bulaiwa ki batanga ba hae ka sibili.—2 Makolonika 24:17-25.

Ka ku fapahana ni mo ne ku bezi ku Mulena Joasi, kaufela ba ba latelela kelezo ye tatama, ba ka pila hande kwapili: “Sishemo ni niti li si ke za kauhana ni wena. . . . Ka zeo u ka kutekiwa . . . fapil’a Mulimu ni batu.”—Liproverbia 3:3, 4.