Mikulwani Ba Ba Tabisa Pilu ya Jehova

Litaba za tuto ze, ne li lukiselizwe sihulu mikulwani ba ba li Lipaki za Jehova. Kacwalo, lu susueza mikulwani ku ituta litaba ze ka tokomelo, ni ku to abana ka cisehelo ha li ka buhisanwa kwa Tuto ya puteho ya Tora ya ku Libelela.

“Mwan’aka u talife, mi u tabise pilu ya ka, mi ni ka kona ku alaba ya ni nyaza.”—Liproverbia 27:11.

1, 2. (a) U taluse haiba ku lakaza lika za lifasi ku bonisa kuli ha u swaneli ku ba Mukreste. (Maroma 7:21) (b) Mutala wa Asafi u ku lutañi? (U bone sikwenda, likepe 13.)

UNGE kuli u bata ku leka liapalo. Ha u nz’o talima-talima, u bona siapalo se u tabela luli. Mubala wa sona, ni mo si lukezwi za ku katelwisa luli, mi teko ya sona i bonisa kuli si cipile. Kono cwale wa si tatubisisa. Ka bumai, u fumana kuli lisila li cancaukile kwa mingundo, mi si lukilwe ka busafa. Siapalo seo niha si kateleha, ha si si ka tiya. Kana ne u ka si leka luli?

² U bapanye taba yeo kwa muinelo o u kana wa talimana ni ona ka ku ba mukulwani wa Sikreste. Sina siapalo sani, lika za lifasi le, fahalimu fela, li kana za bonahala ku kateleha luli. Ka mutala, be u kena ni bona sikolo ba kana ba ya kwa tukiti to tu tabisa, ku itusisa milyani ye kola, ku nwa macwala, ku eza bunyazi, ni ku eza tobali ba si yo mwa manyalo. Kana fokuñwi wa lakazanga mupilelo o cwalo? Kana wa lakazanga kuli kambe ne u ka utwa fela mo ku utwahalela ku ba ni tukuluho ye cwalo? Haiba ku cwalo, u si tuleleli ku nga kuli u mutu ya maswe, ya sa swaneli ku ba Mukreste. Mane Bibele i talusa kuli lifasi l’a kona ku hoha luli—ku hoha nihaiba mutu ya bata ku tabisa Mulimu.—2 Timotea 4:10.

3. (a) Ki kabakalañi ku bata lika za lifasi ha ku si na tuso? (b) Mukreste yo muñwi u talusa cwañi kuli lika za lifasi ha li tusi?

³ Cwale u tatubisise lika, sina mo ne u ka tatubisiseza siapalo se ne u ka bata ku leka. U ipuze kuli, ‘Lifasi le, li cwañi?’ Bibele i li “lifasi la fela.” (1 Joani 2:17) Munyaka kaufela o fumanwa ku lona ha u ineleli. Hape, muzamao wa sihedeni u tahisa ze maswe luli. Kaniti haki wa ku ikenya ku ona. Mukreste yo muñwi, ya wezwi ki nto y’a li ki “masitapilu a tahiswa ki muzamao o maswe kwa bunca,” u li: “Lifasi li kana la bonahala ku ba le li kateleha, le li hoha. Mi li bata kuli u kolwe kuli wa kona ku ikola za lona ku si na butata. Kono luli ha ku konahali cwalo. Lifasi li ka itusisa wena, mi ha se li felize, li ka ku  yubeka.” * Ne u ka sinya-sinyezañi bunca bwa hao ka bupilo bo bu sa tusi cwalo?

Ku Silelezwa ku “Ya Maswe”

4, 5. (a) Ha n’a tuha a shwa, Jesu n’a kupileñi ku Jehova? (b) Ki kabakalañi kupo yeo ha ne i swanela?

⁴ Ka ku lemuha kuli lifasi la cwale ha li na ze nde, mikulwani ba ba li Lipaki za Jehova ba lika ka t’ata ku sa eza bulikani ni lona. (Jakobo 4:4) Kana u yo muñwi wa mikulwani ba ba sepahala bao? Haiba ku cwalo, u eza hande. Ki niti kuli ku t’ata ku tiyela kukuezo ya balikani ni ku sa eza ze ba eza, kono wa kona ku fumana tuso.

⁵ Nakonyana a si ka shwa kale, Jesu n’a lapezi kuli Jehova a “sileleze” balutiwa ba hae “ku ya maswe.” (Joani 17:15, NW) Jesu n’a na ni libaka le linde la ku kupa cwalo. N’a ziba kuli ku si na taba ni kuli ne ba li banana kamba ba bahulu, balateleli ba hae ne ba ka fumana t’ata ku pila ka busepahali. Kabakalañi? Libaka le liñwi ki la kuli, sina mwa n’a bulelezi Jesu, balutiwa ba hae ne ba ka talimana ni sila se si m’ata, se si sa bonwi, ili Satani Diabulosi, yena “ya maswe.” Bibele i li sona sibupiwa sa moya se si maswe seo si “zamaya sina tau ye lila ye bata ye i ka ca.”—1 Pitrosi 5:8.

6. Lu ziba cwañi kuli Satani h’a na muhau kwa banana?

⁶ Ku zwelela kwa makalelo, Satani u bile ya tabela h’a situhu ku tahiseza batu manyando a matuna ka ku fitisisa. U hupule likozituna zeo Satani n’a tahiselize Jobo ni lubasi lwa hae. (Jobo 1:13-19; 2:7) Mwendi ku zwa fo u pepezwi, wa kona ku hupula lika ze kile za ezahala ze bonisa moya wa Satani wa mifilifili. Diabulosi u sweli wa bena-bena, mi ha nz’a bata cwalo ba ku miza, h’a na makeke kwa mikulwani. Ka mutala, ka nako ya n’a pepilwe Jesu, Heroda a lela ku bulaya tushimani kaufela mwa Betelehema twa lilimo ze peli ku ya kwatasi. (Mateu 2:16) Mwendi ya n’a susumelize Heroda ku eza cwalo ne li Satani, ka mulelo wa ku bulaya mwana y’o kwapili n’a ka ba yena Mesiya ya sepisizwe wa Mulimu, ya n’a ka atula Satani ka mw’a batela Mulimu! (Genese 3:15) Kaniti, Satani h’a na muhau kwa banana. Mulelo fela wa hae ki ku miza batu ba bañata ka mw’a konela. Mi ku cwalo sihulu kacenu, kakuli Satani u lundulezwi fa lifasi ku zwa kwa lihalimu, “a  halifile maswe, ka ku ziba kuli nako ya hae ki ye nyinyani.”—Sinulo 12:9, 12.

7. (a) Jehova u shutana hahulu cwañi ni Satani? (b) Jehova u ikutwa cwañi ka za ku ikola bupilo kwa hao?

⁷ Ka ku shutana hahulu ni Satani ya “halifile maswe,” Jehova yena u “mukekecima.” (Luka 1:78) Ki yena mutala o munde ka ku fitisisa wa lilato. Lilato ki kalemeno ka katuna hahulu ka Mubupi wa luna kuli mane Bibele i li: “Mulimu ki lilato.” (1 Joani 4:8, NW) Ki shutano kwa butuna ye mwahal’a mulimu wa lifasi le, ni Mulimu ye u na ni tohonolo ya ku lapela! Hailif’o Satani u bata ku miza batu, Jehova yena “h’a lati ba bañwi ha ba ka timela.” (2 Pitrosi 3:9) Ku yena, bupilo bwa mutu kaufela, ku kopanyeleza ni bwa hao, ki bwa butokwa. Jehova mwa Linzwi la hae h’a ku eleza kuli u si ke wa ba wa lifasi, h’a liki ku ku palelwisa ku ikola bupilo kamba ku ku tibela ku ba ni tukuluho. (Joani 15:19) S’a eza luli ki ku ku sileleza ku ya maswe. Ndat’aho wa kwa lihalimu u bata kuli u be ni ze nde ze fita minyaka ye sa ineleli ya lifasi le. S’a lakaza kikuli u be ni “bupilo bo bu sa feli” mwa paradaisi fa lifasi. (1 Timotea 6:17-19) Jehova u bata kuli u bu fumane, mi wa ku susueza ku eza cwalo. (1 Timotea 2:4) Hape Jehova u fitisa ku wena memo ye ipitezi. Memo mañi?

“U Tabise Pilu ya Ka”

8, 9. (a) U kona ku fa Jehova mpo mañi? (b) Ka mo i boniseza taba ya Jobo, Satani u nyaza cwañi Jehova?

⁸ Kana u kile wa lekela mulikan’a hao yo mutuna mpo, mi ha u yo mu fa yona u mu bona h’a menya ka ku komoka ni ku itebuha? Mwendi ne u tandile nako ye telele inge u nahana kuli ki ifi mpo ye n’e ka swanela mutu y’o. Cwale u nahane puzo ye: Ki mpo mañi ye u kona ku fa Jehova Mulimu, yena Mubupi wa hao? Mwendi muhupulo w’o u kana wa utwahala ku sa swanela pili. Ya M’ata Ote u tokwañi ku mutu-tu fela? Ne u ka mu fañi s’a si na? Kwa Liproverbia 27:11, Bibele i alaba kuli: “Mwan’aka u talife, mi u tabise pilu ya ka, mi ni ka kona ku alaba ya ni nyaza.”

⁹ Mwendi se u itutile mwa Bibele kuli Satani Diabulosi ki yena ya nyaza Jehova. U pihelela kuli ba ba sebeleza Mulimu kaufela ba eza cwalo ka buitati, isi kabakala kuli ba mu lata. Satani u li, kuli ba tahelwe ki butata, ba ka pakisa ku fulalela bulapeli bwa niti. Ka mutala, mu nahane za n’a bulezi Satani ku Jehova ka za Jobo, munna ya n’a sepahala: “Ha ni li, u mu babalezi, yena ni ba ndu ya hae, ni z’a sweli kamukana, kwa maneku kaufela? U fuyozi musebezi wa mazoho a hae, likomu za hae li tezi mwa naha. Kono u like fela ku otolola lizoho la hao, ni ku swala fa tutu y’a luwile kaufela, fohe lu ka bona kana a si ke a ku nyefula inz’a li fapil’a hao.”—Jobo 1:10, 11.

10. (a) Lu ziba cwañi kuli kañi ya Satani ka za busepahali ne i sa ami fela Jobo? (b) Taba ya bubusi i ku ama cwañi?

¹⁰ Ka mo i boniseza taba ya mwa Bibele, Satani n’a pihile ka za busepahali bwa Jobo, ni bwa ba bañwi kaufela ba ba sebeleza Mulimu—ku kopanyeleza ni wena. Mane ha n’a bulela ka za batu kaufela, Satani n’a bulelezi Jehova kuli: “Mutu [isi Jobo fela kono mañi ni mañi] s’a sweli kaufela wa si fana, kuli a pilise bupilo bwa hae!” (Jobo 2:4) Kana wa bona mo i ku amela taba ye tuna ye? Ka mo ku boniselizwe kwa Liproverbia 27:11, Jehova u bulela kuli ku na ni se u kona ku mu fa—ili kalabo y’a kona ku itusisa kwa ku alaba Satani, yena ya mu nyaza. U nahane taba yeo! Muambakani-ya-Pahami u ku mema kuli u abane mwa ku tatulula taba ye tuna ka ku fitisisa. U na ni buikalabelo ni tohonolo ye tuna hakalo! Kana wa kona ku peta z’a ku kupa Jehova? Jobo n’a li petile. (Jobo 2:9, 10) Jesu, ni ba bañwi ba bañata ku zwelela kwa makalelo, mane ku kopanyeleza ni mikulwani ba bañata, ni bona ne ba li petile. (Mafilipi 2:8; Sinulo  6:9) Ni wena wa kona ku li peta. Kono u zibe kuli mwa taba ye, u na ni ku ba ni ko u wela. Likezo za hao li ka bonisa haiba u yemela nyazo ya Satani kamba kuli u yemela kalabo ya Jehova. U ka wela kai?

Jehova Wa Ku Tokomela!

11, 12. Kana keto ya hao ya ku sebeleza Jehova kamba ku sa mu sebeleza ki ya butokwa ku yena? U taluse.

¹¹ Kana Jehova u na ni taba ni keto y’o eza? Kana haki kuli batu ba bañata se ba sepahalile mi w’a kona ku fa Satani kalabo ye tiile? Diabulosi n’a pihelezi kuli ha ku na ya sebeleza Jehova kabakala kuli wa mu lata, mi kañi yeo se i bonisizwe ku ba ye fosahezi. Niteñi, mwa taba ya bubusi, Jehova u bata kuli wena luli u be kwa lineku la hae kakuli wa ku tokomela. Jesu n’a ize: “Hasi tato ya Ndat’a mina ya kwa lihalimu, kuli ku latehe a li muñwi ku ba banyinyani bao.”—Mateu 18:14.

¹² Kaniti, keto ya hao ki ya butokwa ku Jehova. Sa butokwa ni ku fita kikuli ya mu ama. Bibele i bonisa hande-nde kuli Jehova u na ni maikuto a matuna a amiwa ki likezo ze nde kamba ze maswe za batu. Ka mutala, Maisilaele ha ne ba kuta-kutezi ku mu fetuhela, Jehova n’a “utwile butuku.” (Samu 78:40, 41, NW) Munda wa mwa lizazi la Nuwe u si ka taha kale, ‘bumaswe bwa batu ha ne bu li bo butuna,’ “pilu ya [Jehova] ya swaba.” (Genese 6:5, 6) U nahane ze i talusa taba yeo. Ha ne u ka eza nto ye fosahezi, ne u ka utwisa Mubupi wa hao butuku. Seo ha si talusi kuli Mulimu wa fokola kamba kuli u zamaiswa ki maikuto. Kono ku talusa kuli wa ku lata mi wa iyakatwa buiketo bwa hao. Ha u eza ze lukile, pilu ya Jehova ya taba. U tabiswa kikuli u ba ni kalabo ye ñwi hape ya ku fa Satani, ni kuli cwale u kona ku ku fa mupuzo. Mi kaniti u bata ku ba Mufani wa hao wa mupuzo. (Maheberu 11:6) Luli Jehova Mulimu ki Ndat’aho ya lilato!

Limbuyoti Ze Tuna Cwale

13. Ku sebeleza Jehova ku tahisa cwañi limbuyoti nihaiba nako ye?

¹³ Limbuyoti ze zwa mwa ku sebeleza Jehova ha li na ku fumanwa kwapili fela. Mikulwani ba bañata ba ba li Lipaki za Jehova yona nako ye ba na ni tabo ni mwangalwa, mi ki ka libaka le lituna. Walisamu n’a ñozi kuli: “Litaelo za [Muñ’a] Bupilo li lukile, li tabisa pilu.” (Samu 19:8) Jehova u ziba z’e lu  swanela ku fita mutu ufi kamba ufi. Jehova n’a bulezi ka mupolofita Isaya kuli: “Ki Na [Muñ’a] Bupilo Mulimu wa hao, ni ku luta se si ku swanela, ni ku zamaisa ka nzila y’o lukela ku zamaya ku yona. Mawe, kabe n’o utwile milao ya ka! n’o kabe u pilile mwa kozo ye swana inge nuka; ze lukile za hao ne li kabe li bonahala sina mandinda a mwa liwate.”—Isaya 48:17, 18.

14. Likuka za Bibele li kona ku ku tusa cwañi ku pima butuku bwa ku ba mwa likoloti?

¹⁴ Ku latelela likuka za Bibele ku ka ku tusa ku pima masitapilu a mañata. Ka mutala, Bibele i li ba ba lata hahulu mali “ba itabile ili bona ka manyando a mañata.” (1 Timotea 6:9, 10) Kana ku na ni mikulwani ba bañwi be u ziba bao lona liñolo le li sebelize ku bona? Mitangana ni likalibe ba bañata ba keni mwa likoloti ze ñata ka libaka fela la kuli ba bata ku ba ni liapalo ze tula ze tumile ni lipangaliko ze nca. Ku imezwa ki likoloti ze ñata za lika z’o sa kwanisi ku lifela ki butanga bo bu buima luli!—Liproverbia 22:7.

15. Likuka za Bibele li ku sileleza ka linzila lifi kwa masitapilu a tahiswa ki buhule?

¹⁵ Hape u nahane taba ya buhule. Ka silimo mwa lifasi kaufela, mikulwani ba bañata ba banga ni limba za mwa bucwañi. Ba bañwi ba pepanga bana be ba sa koni ku uta, be ba sa lati ni ku uta. Ba bañwi ba sululanga limba mi ku zwa f’o ba sisitiwanga ki mazwalo. Hape ku na ni micaha ni likalibe ba ba yambulanga matuku a sihule, a cwale ka AIDS. Mi ku ya ziba Jehova, nto ye maswe ka ku fitisisa neikaba ku latehelwa ki bulikani ni Jehova. * (Magalata 5:19-21) Ku swanezi Bibele ha i bulela kuli: “Mu sabe buhule.”—1 Makorinte 6:18.

Ku Sebeleza “Mulimu Ya Tabile”

16. (a) Lu ziba cwañi kuli Jehova u bata kuli u ikole bucaha bwa hao? (b) Ki kabakalañi Jehova h’a ku tomela likuka za ku latelela?

¹⁶ Bibele i talusa Jehova ku ba “Mulimu ya tabile.” (1 Timotea 1:11, NW) U bata kuli ni wena u be ni tabo. Mane lona Linzwi la hae ka sibili li li: “Ikole bunca bwa hao. U tabele ha u sa li mucaha.” (Muekelesia 11:9, Today’s English Version) Kono Jehova u kona ku bonela  cimo lika, mi wa ziba ze ka ba teñi ka nako ye telele ze kona ku tahiswa ki likezo ze nde kamba ze maswe. Ki lona libaka h’a ku eleza kuli: “U hupule Mubupi wa hao mwa mazazi a bucaha bwa hao, mazazi a maswe a si ka taha kale, mi myaha i sa li kwahule y’o ka li: Ha ni i tabeli!”—Muekelesia 12:1.

17, 18. Mukulwani yo muñwi wa Sikreste n’a talusize cwañi tabo ya hae mwa ku sebeleza Jehova, mi ni wena u kona ku ba cwañi ni tabo ye cwalo?

¹⁷ Kacenu, mikulwani ba bañata ba bile ni tabo ye tuna mwa ku sebeleza Jehova. Ka mutala, Lina, wa lilimo ze 15 u li: “Ha ku na nto y’e ni swabisa. Mubili wa ka u iketile hande kakuli ha ni si ka zuba ni ku itusisa milyani ye kola. Kwa puteho ni fiwa ketelelo ya butokwa y’e ni tusa ku tiyela likukuezo ze maswe za Satani. Ni ya tabile kabakala sango se sinde se ni fumana kwa Ndu ya Mubuso. Sa butokwa ni ku fita, ni na ni sepo ye nde ka ku fitisisa ya ku pila ku ya ku ile fa lifasi.”

¹⁸ Sina Lina, mikulwani ba bañata ba Sikreste ba lwanela tumelo ka ku tiya, mi ku eza cwalo ku ba tahiseza tabo. Ba lemuha kuli bupilo, fokuñwi niha bu li t’ata, bu na ni mulelo o bu tomezwi mi ha bu feli. Kacwalo, u zwelepili ku sebeleza Mulimu ya iyakatwa hahulu wena. U tabise pilu ya hae, mi ni yena u ka ku tabisa cwale ni ku ya ku ile!—Samu 5:11.

[Litaluso za kwatasi]

Kana Wa Hupula?

• Satani, yena “ya maswe” u ku teezi kozi mañi?

• U kona ku tabisa cwañi pilu ya Jehova?

• Bibele i bonisa cwañi kuli Jehova wa iyakatwa wena?

• Ki limbuyoti mañi ze ñwi ze zwa mwa ku sebeleza Jehova?

[Lipuzo za Tuto]

[Mbokisi/Siswaniso se si fa likepe 13]

Munna Ya Lukile U Bat’o Sitatala

Asafi n’a li Mulivi, muopeli yo mutuna kwa tempele ya Jehova mwa Isilaele wa kwakale. Mane n’a ñozi lipina ze n’e itusiswa mwa milapelo ya nyangela. Kono niha n’a na ni matohonolo a ipitezi, ka nakonyana Asafi n’a ebezi mikwa ya sihedeni ya ba n’a pila ni bona, be ne ba bonahala kuli niha ne ba loba milao ya Mulimu, ha ku na ze n’e eziwa ku bona. Hamulaho, Asafi n’a itumelezi kuli: “Mautu a ka a batile ku sitatala, ni batile ku telela ha ne ni hata. Kakuli ne ni shwela baikuhumusi muna, ha ne ni bona ba ba maswe mo ba kondela.”—Samu 73:2, 3.

Hamulaho, Asafi a ya kwa tempele ya Mulimu mi a yo lapela ka za taba yeo. Mubonelo wa hae wa lika za kwa moya ha se u tiisizwe, a utwisisa kuli Jehova u toile bumaswe ni kuli kwa mafelelezo, ba ba maswe ni ba ba lukile ba ka kutula se ba cala. (Samu 73:17-20; Magalata 6:7, 8) Luli ba ba maswe ba mwa mabaka mo ku telela. Kwa mafelelezo ba ka wa Jehova h’a ka sinya lifasi le li maswe le.—Sinulo 21:8.

[Maswaniso a fa likepe 15]

Jehova wa iyakatwa hahulu wena, Satani yena u bata ku ku miza

[Siswaniso se si fa likepe 16]

Mikulwani ba bañata ba fumana tabo ye tuna mwa ku sebeleza Jehova ni Bakreste ba bañwi