Muta Musebezi wa ku Kutaza U Ba O Sa Libalwi

“Lizazi li ngwelukile. Kanzila ka mwa malundu ka bonahala kuli ha ka fiti kwa mafelelezo. Ha se lu tuzi butata bo buñata, lu yo fita ko ne lu ya: ili munzi o kwahule ka ku fitisisa. Ha lu t’o ngongota fa ndu ya pili, mi lu amuhelwa ka tabo, mukatalo wa luna u fetuha ku ba tabo. Lizazi ha li yo likelanga, ki kale lu fa lihatiso kaufela ze ne lu lwezi mi se lu kalile lituto za Bibele li sikai. Batu ba tabela hahulu ku ituta. Cwale lu na ni ku funduka, kono lu sepisa ku yo kuta.”

W’O ki mufuta wa makande a atile mwahal’a sikwata se siñwi sa mapaina ba mwa Mexico. Mapaina bao ba tukufalezwi ku abana mwa ku peta musebezi w’o Jesu Kreste n’a file balutiwa ba hae ha n’a ize: “Mu ka ba lipaki za ka . . . ku isa kwa mafelelezo a lifasi.” (Likezo 1:8) Mwa Mexico, ku na ni libaka ze si na puteho ye kutalezanga teñi. Kacwalo, ku lukisizwe musebezi wa ku kutaza ko ku ipitezi, ko ku eziwanga ki mapaina, ilikuli libaka zeo k’o taba ye nde ya Mubuso wa Mulimu i sa fitiswangi kamita, li kone ku potelwanga. Buñata bwa libaka zeo li kwahule, mi ku fita ku zona ku t’ata. Liputeho ze kwahule ze na ni simu ye tuna ni zona za tusiwanga.

Kuli ku zibwe libaka za naha ze ka kutalezwa teñi ki mapaina, ofisi ya mutai ya Lipaki za Jehova i tatubanga butokwi bwa simu. * Ha se ku ezizwe cwalo, likwata za mapaina ba ba ipitezi ba lumiwanga ku y’o sebeleza mwa simu yeo. Ba fiwanga limota ze kona ku mata mwa mikwakwa ya matulungundu yeo. Ha ku tokwahala, zona limota zeo hape li banga malobalo ni mabulukelo a lihatiso.

Ku Itakaleza

Ku zwa October 1996, bakutazi ba taba ye nde ba bañwi se ba memilwe ku tusa mapaina ba ba ipitezi mwa musebezi w’o. Bahasanyi ba Mubuso ni mapaina ba kamita ba ba itakaleza ku y’o sebeleza ko ku na ni butokwi bo butuna, ba kenanga mwa musebezi w’o ka linako ze shutana-shutana. Ba bañwi ba lumelwanga kwa liputeho ze mwa libaka zeo ilikuli ba tokomele simu ni ku tusa ba ba tabela ba ba fumanwi. Mapaina ni mikulwani ba bañata ba ba li bahasanyi ba amuhezi memo yeo mi ba tiisizwe hahulu ki ze nde ze ezahezi.

Ka mutala, Abimael, Mukreste wa mukulwani ya n’a sebeza kwa kampani ya mawaile a ku zamaya ni ona, kwa n’a hola mali a mañata, n’a ikatulezi ku abana mwa musebezi wa ku kutaza mwa libaka za kwahule zeo. Babelekisi ba hae ha ne ba utwile kuli n’a bata ku tuhela musebezi, ba bata ku mu hulisa fa musebezi ni ku mu ekeleza kwa mali. Babeleki ba bañwi ba mu hapeleza ku lumela, ka ku bulela kuli n’a na ni litohonolo mi ku hana neikaba bukuba. Kono Abimael n’a bata ku tusa ka likweli ze talu mwa musebezi o ipitezi w’o wa ku kutaza. Ha s’a ikozi sebelezo yeo, Abimael s’a ikatulezi ku inelela mwa puteho ya kwahule mo ku tokwahala hahulu bahasanyi ba Mubuso. Nako ye u na ni kasebezinyana mi u itutile ku sa pila bupilo bo bu tula.

Mwa taba ye ñwi, Julissa n’a na ni ku zamaya lihora ze 22 ka mbasi kuli a y’o fita kwa n’a y’o sebeleza. Mwa kalulo ya mafelelezo ya musipili wa hae, a siiwa ki mbasi ya mafelelezo  ya lizazi leo. Kono ne ku na ni mota ye n’e lwezi babeleki. Julissa a ndumeba mi a ba kupa nzila. Ha ku komokisi kuli n’a ikalezwi, kakuli ne li yena musali a nosi mwahal’a banna ba bañata. Ha s’a kalisize ku kutaza ku mutangana yo muñwi, a lemuha kuli n’a li yo muñwi wa Lipaki za Jehova! Julissa u hupula kuli: “Hape, muzamaisi wa mota yeo n’a li eluda mwa puteho ye ne ni lumezwi ku yona!”

Basupali Ba Abana Teñi

Kono musebezi w’o haki wa mikulwani fela. Kaizeli yo muñwi wa musupali ya bizwa Adela kamita n’a batanga ku tanda nako ye ñata mwa musebezi wa ku kutaza. N’a fumani sibaka sa ku eza cwalo ha n’a memilwe ku abana mwa musebezi o ipitezi w’o wa ku kutaza. U li: “Ne ni ikozi hahulu musebezi wa ka kuli mane na kupa maeluda ba mwa puteho kuli ni si ke na tuhela musebezi w’o. Ni tabile kuli niha ni li musupali, ni sa kona ku sebeleza Jehova.”

Ka ku swana, ka ku itebuha Jehova ni ku lata ba bañwi, Martha wa lilimo ze 60 n’a ifanile ku abana mwa musebezi w’o. Ka ku bona kuli libaka ne li li kwahule, ni kuli ku yo fita kwateñi ne ku li t’ata, mi kacwalo sikwata sa habo ne si palelwa ku yo kutaza kwa batu kaufela, a lekela mapaina mota ya ku itusisa. Tuso ya kaizeli y’o ne i konisize kuli simu ye tuna i sebelezwe ni kuli litaba za mwa Bibele li fitiswe kwa batu ba bañata.

Ze Zwile Mwateñi Ze Tabisa

Mulelo wa ba ba abana mwa misebezi ye ipitezi ye ya ku kutaza ki ku “tahisa balutiwa.” Ze zwile mwateñi li bile ze nde luli. Batu ba ba mwa libaka za kwahule ba filwe litaba za mwa Bibele ze pilisa. (Mateu 28:19, 20, NW) Lituto ze ñata za Bibele se li kalisizwe. Zeo li zamaiswa ki bahasanyi ba mwa sibaka kamba bashaeli ba ba til’o pila mwa libaka zeo. Ko kuñwi, ku lukisizwe likwata za bahasanyi, mi mane ko kuñwi kona, se ku tomilwe liputeho ze nyinyani.

Magdaleno ni ba n’a sebeza ni bona ne ba kwezi mota ya nyangela ha ne ba ya kwa sibaka sa kwahule ko ne ba lumezwi ku yo sebeleza. Mwa nzila, ba kutaza ku muzamaisi wa mota. “Munna y’o a lu bulelela kuli viki ye n’e felile, kwa ndu ya hae ne ku tile Lipaki, yena inz’a si yo. Ha n’a kutile, lubasi lwa hae lwa mu taluseza ze ne ba utwile. Lwa mu  taluseza kuli ne lu sa pili mwa sibaka m’o kono ne lu zwa kwa libaka ze shutana-shutana za mwa naha ilikuli lu to tusa mwa musebezi o ipitezi w’o wa ku kutaza, mi kaufel’a luna ne lu itifezi nzila. Muzamaisi y’o n’a tabile mi n’a ize yena ni lubasi lwa hae ne ba ka kalisa ku ituta Bibele yona viki yeo. Mane n’a file nubu kwa musebezi w’o ka ku sa lu lifisa nzila.”

Magdaleno hape n’a tabisizwe ki ku amuhela niti kwa batu ba ba pila mwa malundu a Chiapas. “Na ni mufumahali wa ka ne lu kutalize taba ya Mubuso kwa sikwata sa mikulwani b’a 26 be ne ba li ba Keleke ya Presbyterian. Kaufel’a bona ne ba teelelize ka tokomelo ka mizuzu ye 30. Ne ba na ni Libibele za bona, mi ne lu konile ku paka ku bona ka butungi ka za milelo ya Jehova. Buñata bwa batu ba na ni Libibele za bona mwa puo ya Tzeltal.” Ne ku kalisizwe lituto li sikai za Bibele ze zwelapili.

Twaniso Ya Ombaliswa

Taba ya Bibele ne i si ka kutazwa mwa silalanda se siñwi sa mwa Chiapas ka lilimo ze fitelela ze peli kabakala twaniso ya batu ba bañwi ba mwateñi. Teresa, mukutazi wa ka nako kaufela, n’a lemuhile kuli Lipaki ba bañwi ne ba saba ku kutaza mwa silalanda seo. “Batu kaufela ne ba komokile kuli batu bao ne ba tabela ku teeleza. Ha ne lu felize ku kutaza, pula ya cuumuka. Ha ne lu bata kwa ku yaama, lwa to fita fa ndu ya Sebastián, munna ya n’a na ni kamuhelo. A lu lumeleza ku kena mwa ndu kuli lu yaame pula. Ha se lu keni mwa ndu, na mu buza haiba n’a s’a potezwi. Ha n’a ize n’a si ka potelwa, na kala ku kutaza ku yena mi na kalisa tuto ya Bibele ka ku itusisa buka ya Zibo Ye Isa kwa Bupilo bo Bu Sa Feli. * Ha se lu felize, Sebastián a lu kupa inz’a lila kuli lu yo taha hape kuli lu to ituta ni yena.”

Sikwata se siñwi sa mapaina be ne ba ile kwa Chiapas ba li: “Ka tuso ya Jehova, ne lu kutuzi ze nde. Mwa viki ya pili, ne lu kalisize lituto ze 27; ku ya bubeli, ne lu memile batu ku to buha vidio ya The Bible—Its Power in Your Life. Ne ku tile b’a 60. Kaufel’a bona ne ba ikozi yona. Hasamulaho, ne lu file akalezo ya ku kalisa tuto ya Bibele ya ka sikwata. Ka ku makaza, ne ku tomilwe likwata ze peli za tuto fa silalanda seo.

“Ha se lu felize ku kutaza mwa libaka ze ne lu filwe, lwa kutela mwa silalanda seo ku yo susueza be ne ba tabela niti ni ku yo bona mo ne li ezeza likwata za tuto ya Bibele ze n’e tomilwe.  Lwa ba mema kwa ngambolo ya nyangela ni kwa Tuto ya Tora ya ku Libelela. Kono ne ku si na sibaka se situna sa ku ezeza teñi mikopano yeo. Mutu ya n’a fanile lapa la hae kwa sikwata sa tuto a supa kwamulaho wa ndu ya hae mi a li: ‘Mikopano ya kona ku ezezwa kwamulaho kafa.’”

Kwa mafelelezo a viki yeo, mapaina be ne ba til’o pota ni batu be ne ba tabela niti ba tusa ka mafulofulo ku lukisa lapa leo ilikuli mikopano i ezezwe teñi. Kwa mukopano wa pili ne ku bile ni batu b’a 103. Nako ye mwa silalanda seo ku zamaiswa lituto za Bibele ze 40.

“Nto Ye Nde Luli”

Kwand’a ku peta ze tuna mwa musebezi wa ku kutaza, ba ba abani teñi ni bona ba tusizwe luli. María, kalibe ya li paina ya n’a abani mwa musebezi w’o ka nako ye ñwi, u bulela cwana ka za mwa n’a ikutwezi: “Ne li nto ye nde luli ka mabaka a mabeli. Tabo ya ka mwa musebezi wa ku kutaza ne i ekezehile, mi bulikani bwa ka ni Jehova ne bu tiile ni ku fita. Muta o muñwi ha ne lu pahama lilundu, ne lu topwezi. Ha se lu kupile tuso ku Jehova, lwa ikutwa inge mo i bulelela Isaya 40:29-31 kuli: ‘Ba ba sepa Jehova ba fiwa mata a manca.’ Kacwalo, lwa yo fita ko ne lu ya mi lwa yo zamaisa lituto ni batu be ne ba lu amuhezi hande.”

Paina yo muñwi wa mukulwani, ya bizwa Claudia, wa lilimo ze 17, u li: “Ni fumani tuso ye tuna. Ni itutile ku eza hande mwa bukombwa, mi ku eza cwalo ku ni tahiselize tabo ye tuna, mi kacwalo ni konile ku lela za ku eza ku za kwa moya. Hape ni hulile kwa moya. Kwa ndu, boma ne ba ni ezezanga lika kaufela. Cwale ha se ni bile ni yeloseli, ha ku sa li cwalo. Ka mutala, ne ni keta-ketanga hahulu lico. Kono cwale bakeñisa kuli se ni twaezi miinelo ye shutana-shutana, ha ni sa bilaelanga za lico. Sebelezo ye cwalo i ni tusize ku ba ni balikani ba bande hahulu. Lu ikabelanga ze lu fumana kaufela mi lwa tusananga.”

Kutulo Ye Tabisa

Buikatazo bo bu ipitezi b’o bu tahisizeñi? Ha lu to fitanga kwa makalelo a silimo sa 2002, mapaina b’a 28,300 ne se ba abani mwa musebezi w’o. Ne ba zamaisize lituto za Bibele ze fitelela 140,000, ni ku tanda lihora ze fitelela 2 milioni mwa musebezi wa ku kutaza. Kuli ba tuse batu ku ituta litaba za Bibele, ne ba file libuka ze bat’o ba z’e 121,000 ni limagazini ze bat’o ba z’e 730,000. Ha ku komokisi kuli mapaina ba bañwi ba zamaisanga lituto za Bibele ze 20 kamba ku fitelela.

Ba ba boniswa sishemo seo ba itebuha hahulu buikatazo bo butuna bwa ku fitisa taba ya Bibele ku bona. Niha ba li linjebwe, ba bañata ba hapelezanga bahasanyi ku amuhela linubu. Musali-muhulu wa lilimo ze 70 ya li njebwe kamita u fanga se siñwi kwa mapaina ba ba mu potelanga. Haiba ba hana, wa lilanga. Lubasi lo luñwi lo lu botanile lu talusezanga bakutazi ba ka nako kaufela kuli kuhu i ba zwalezi mai, mi lu ba hapelezanga ku a’ nga.

Sa butokwa ni ku fita, batu ba ba sepahala bao ba itebuha hahulu za kwa moya. Ka mutala, kalibe yo muñwi u zamayanga musipili wa lihora ze talu ni licika kuli a yo fumaneha kwa mikopano ya Sikreste, mi ha ku na wa yawanga. Ka nako ya ku pota kwa muokameli wa maeto, musali yo muñwi wa musupali niha kula mañwele, u zamayanga lihora ze peli kuli a kone ku yo amuhela litaelo za mwa Bibele. Ba bañwi be ne ba sa zibi ku bala ni ku ñola ne ba bata ku ituta ku eza cwalo ilikuli ba fumane tuso kwa lituto za Bibele. Buikatazo bwa bona bu fuyozwi hahulu.

Mwa buka ya Likezo, Luka u talusa pono ye n’e bonwi ki muapositola Paulusi, kuli: ‘Munna wa kwa Masedonia n’a yemi mi n’a mu lapela, a li: Silela mwa Masedonia, u t’o lu tusa.’ Paulusi n’a ezize cwalo. Kacenu, mwa libaka za kwahule za mwa Mexico, ba bañata ba ezize sina Paulusi. Ba ifanile ku shaela taba ye nde “ku isa kwa mafelelezo a lifasi.”—Likezo 1:8; 16:9, 10.

[Litaluso za kwatasi]

[Siswaniso se si fa likepe 9]

Lipaki ba bañata ba mwa Mexico ba abani mwa musebezi o ipitezi wa ku kutaza