Lipuzo Ze Zwa kwa Babali

Haiba Mukreste a utwa manzwi a sa zibahali kw’a zwelela, kana f’o ku talusa kuli u kenwi ki badimona?

Kutokwa. Niha se ku bihilwe kuli badimona ba kona ku sebeza cwalo, batu ba bañata ba ba utwanga manzwi a’ sa zibahali kw’a zwelela kamba ba ba banga ni maikuto a mañwi a sa utwisisehi, a filikanya, ha ba tatubisisa lika, ba fumananga kuli b’a kula.

Nihaiba mwa lilimo za kwa makalelo a Bukreste, ku bonahala kuli ne ku zibahala kuli ku kenwa ki badimona ni makulanu fokuñwi li tahisanga maikuto a swana. Kwa Mateu 17:14-18, lu bala ka za mushimani ya n’a folisizwe ki Jesu. Mushimani y’o niha n’a bonahala luli kuli n’a kula kanono, butuku bwa hae ne bu tahisizwe ki sidimona. Kono kwamulaho, bakuli ba bañata-ñata ha ne ba tisizwe ku Jesu kuli a to ba folisa, mwahal’a bona ne ku na ni ‘ba ba na ni mioya ye maswe, ni ba ba ciwa ki kanono.’ (Mateu 4:24) Ku bonahala kuli ne ku zibahala kuli ba kanono ba bañwi ne ba si ka kenwa ki badimona. Butuku bwa bona ne bu itahezi fela.

Se ku bihilwe kuli ba bañwi ba ba kula butuku bwa ku takana, b’o hañata bu kona ku alafiwa, ba utwanga manzwi a’ sa zibahali kw’a zwelela kamba ba banga ni maikuto a kana a bonahala kuli a tahiswa ki badimona. * Matuku a mañwi ni ona a kona ku tahisa ku lyangana mwa munahano, k’o ba bañwi ba kana b’a nga kuli ku tahiswa ki badimona. Kacwalo, mutu y’a li u utwanga manzwi kamba u banga ni maikuto a mañwi a’ filikanya niha n’a ka nahana kuli u kenwi ki badimona, luli u lukela ku susuezwa ku batisisa ka za haiba ku na ni butuku bo buñwi bw’a kula.

[Litaluso za kwatasi]