M’o Ba Bañwi Ba Fumanezi Likalabo

BOLULE-LULE ba lapelanga. Ba bañwi ba kolwa kuli litapelo za bona za alabiwa. Ba bañwi bona ha ba zibi hande nji litapelo za bona za utwiwa. Mi ba bañwi ba bata likalabo kono ha ba nahani ku li kupa ku Mulimu ka tapelo.

Bibele i bulela kuli Mulimu wa niti ki “ya utwa milapelo.” (Samu 65:2) Ha mu lapela, kana mwa ikolwisisa kuli litapelo za mina li yanga ku Mulimu wa niti? Kana litapelo za mina ki litapelo za kona ku alaba Mulimu?

Batu ba bañata mwa lifasi kaufela ba fumani kuli kalabo ki ee! Ne ba fumani cwañi likalabo? Ne ba itutileñi?

Mulimu Ki Mañi?

Muluti yo muñwi kwa Portugal ya n’a lutilwe ki masisita ni baprisita, n’a eza za n’a lutilwe kaufela. Keleke ha ne i cincize ni ku tuhela ku eza za n’a lutilwe ku ba za butokwa, a lyangana. Mwa ku zamaya, a iponela milapelelo ya ba kwa Upa, mi a kala ku ipuza haiba ku na ni Mulimu a nosi wa niti. N’a swanela ku lapela cwañi? Ha n’a buzize muprisita ka za litaba ze mwa Bibele, muprisita n’a si ka mu alaba, mi a zwafa.

Mwa tolopo ya n’a pila muluti y’o, keleke ya Katolika ne i abezi Makatolika pampili ye n’e ba hanisa ku ambola ni Lipaki za Jehova. Kono lipuzo za hae ne li sa li teñi. Zazi le liñwi, Lipaki ha ne ba mu potezi, a teeleza ku bona mi a tabela ze ne ba mu bulelezi. Ne li lona lwa pili ku ambola ni Lipaki.

Kuli a fumane likalabo kwa lipuzo za hae ze ñata, musali y’o a kalisa ku ituta Bibele ni Lipaki. Sunda ni sunda, n’a banga ni mukoloko o mutelele wa lipuzo za ku ba buza. N’a bata ku ziba libizo la Mulimu, ni ku ziba haiba ku na ni Mulimu a nosi wa niti, ni haiba wa lumeleza ku itusisa maswaniso mwa bulapeli, ni ze ñwi ze ñata. N’a lemuhile kuli likalabo za n’a fiwa kaufela ne li zwa mwa Bibele isiñi mwa minahano ya batu, kacwalo a komoka ni ku tabela za n’a ituta. Hanyinyani-hanyinyani,  a fumana likalabo kwa lipuzo za hae ze ñata. Kacenu le u lapela Jehova ka moya ni ka niti, sina Jesu Kreste ha n’a bulezi kuli “balapeli ba niti” ba ka mu lapela cwalo.—Joani 4:23.

Mwa Sri Lanka, lubasi lo luñwi ne lu balanga Bibele hamoho kamita, kono ne ba sa fumani likalabo kwa lipuzo za bona ze ñata za butokwa. Nihaike kuli ne ba tokwa tuso, muprisita wa bona n’a sa koni ku ba fa yona. Kono Lipaki za Jehova ba potela lubasi l’o mi ba ba siyela lihatiso za Bibele ze ne ka ba tusa. Hasamulaho, Lipaki za Jehova ha ne ba file lubasi l’o likalabo ze kolwisa kwa lipuzo za bona za mwa Bibele, lubasi l’o lwa lumela ku ituta Bibele. Ze ne ba itutile mwa lituto za bona ne li ba tabisize hahulu.

Kono lituto za bulapeli za n’a hulile ni zona wa musali za mu palelwisa ku lemuha kuli Ndat’ahe Jesu Kreste ki yena “Mulimu a nosi wa niti,” sina yena Jesu mwa n’a bulelezi. (Joani 17:1, 3) N’a lutilwe kuli Jesu u likana ni Ndat’ahe ni kuli “tuto” yeo ha i hononehi. Ka ku bata ku ziba, a lapela ku Jehova ha buniti, ka ku itusisa libizo la hae, mi a mu kupa kuli a mu bonise kuli Jesu ki mañi. Ku tuha f’o a kutela ku tatubisisa mañolo a bulela za taba yeo. (Joani 14:28; 17:21; 1 Makorinte 8:5, 6) Kwa ezahala inge kuli mayayu a zwile mwa meto a hae, mi a iponela hande kuli Jehova yena Mubupi wa lihalimu ni lifasi ni Ndat’ahe Jesu Kreste ki yena Mulimu wa niti.—Isaya 42:8; Jeremia 10:10-12.

Lu Nyandelañi?

Jobo n’a nyandile hahulu luli. Bana ba hae kaufela ne ba bulailwe ki liñungwa, mi n’a siyezi mwa bubotana. Hape n’a kulile butuku bo butuna ni ku tiyela miliko ye ne zwa ku be ne ba ipuma ku ba balikani ba hae. Ha ne ku ezahala zeo, Jobo a bulela litaba ze ñwi ka ku sa nahanisisa. (Jobo 6:3) Kono Mulimu a utwisisa miinelo ya n’a li ku yona Jobo. (Jobo 35:15) N’a ziba ze ne li mwa pilu ya Jobo mi a mu fa kelezo ye ne mu swanela. Ni kacenu Mulimu u eza cwalo kwa batu.

Mwa Mozambique, Castro n’a li wa lilimo fela ze lishumi bom’ahe ha ba shwa. N’a swabile maswe. N’a ipuzize kuli: “Ki kabakalañi ha ba shwile.” Niha n’a hulisizwe ki bashemi ba ba saba Mulimu, n’a lyangani bom’ahe ha ne ba shwile. Ki sika mañi se ne si ka mu omba-omba? N’a omba-ombilwe ki ku bala Bibele ye nyinyani ya Sichewa ni ku i buhisana ni bahulwani ba hae.

Hanyinyani-hanyinyani, Castro a utwisisa kuli bom’ahe ne ba shwile kabakala sibi sa sihozo, isi kabakala ku sa luka kwa Mulimu. (Maroma 5:12; 6:23) Sepiso ye mwa Bibele ya kuli bafu ba ka zuha ne i mu omba-ombile hahulu kakuli ne i mu file sepo ya kuli n’a ka bonana ni bom’ahe hape. (Joani 5:28, 29; Likezo 24:15) Ka bumai, hamulaho wa lilimo z’e ne fela, bondat’ahe ni bona ba shwa. Kono ka nako yeo Castro n’a kona ku itiisa. Kacenu le, u lata Jehova mi u sebeleza Mulimu ka busepahali. Limbuyoti za fumani za iponelwa ki ba ba mu ziba kaufela.

Batu ba bañata ba ba shwezwi ki balatiwa ba bona ba omba-ombiwa ki niti ye mwa Bibele ye ne tiisize Castro. Ba bañwi ba ba nyandisizwe hahulu ki likezo za ba ba maswe, ba ipuza sina mwa n’a ipuzelize Jobo kuli: “Kiñi ba ba maswe ha ba nze ba pila.” (Jobo 21:7) Batu ha ba teeleza kwa likalabo za Mulimu ze mwa Linzwi la hae, ba fita fa ku ziba kuli kanti mane Mulimu u zamaisa lika ka nzila ye ba tusa.—2 Pitrosi 3:9.

Barbara, ya n’a hulezi kwa United States, n’a si ka iponela likezo ze maswe za ndwa. Kono n’a hula ka nako yeo lifasi ne li li mwa ndwa. Zazi ni zazi mwa makande ne ku bihiwa fela za lindwa. Mwa lituto za hae za kwa sikolo, n’a komokisizwe ki ze ne ezahalile kwamulaho ili ze ne tile ka sipundumukela. Ki kabakalañi ha ne ku bile cwalo? Kana Mulimu n’a isize pilu ku ze ne ezahala? N’a lumela kuli Mulimu u teñi kono n’a si na hande buniti ka za hae.

 Niteñi, mubonelo wa Barbara wa cinca hanyinyani-hanyinyani bakeñisa ku swalisana ni Lipaki za Jehova. N’a teelezanga ni ku ituta ni bona Bibele. N’a yanga kwa mikopano kwa Ndu ya Mubuso. Mane n’a fumanehile ku o muñwi wa mikopano ya bona ye mituna. Mi hape ha n’a buzanga lipuzo, n’a lemuhile kuli Lipaki ba ba fitana-fitana ne ba sa mu fangi likalabo ze shutana. Kono likalabo za Lipaki ne li swana kakuli mihupulo ya bona ne i zwelela mwa Bibele.

Lipaki ka ku itusisa Bibele ne ba bonisize kuli lifasi li mwatas’a Satani Diabulosi, yena mulen’a lona, ni kuli li bonahaza moya wa hae. (Joani 14:30; 2 Makorinte 4:4; Maefese 2:1-3; 1 Joani 5:19) Ne ba talusize kuli likezahalo ze ne komokisize Barbara ne li bulezwi cimo mwa Bibele. (Daniele, likauhanyo 2, 7, ni 8) Mulimu n’a li bulezi cimo kakuli u na ni m’ata a ku bona ze ka ezahala kwapili haiba a lata. Ze ñwi za likezahalo zeo ne li tahisizwe ki Mulimu. Mi ze ñwi n’a li tuhelezi fela. Lipaki ne ba bonisize Barbara kuli Bibele i bulelela cimo hape za likezahalo ze nde ni ze maswe za miteñi ye ni taluso ya zona. (Mateu 24:3-14) Ne ba mu bonisize lisepiso za Bibele za lifasi le linca la ku luka mo ku si ke kwa ba ni manyando.—2 Pitrosi 3:13; Sinulo 21:3, 4.

Hanyinyani-hanyinyani, Barbara a kala ku utwisisa kuli Jehova Mulimu niha sa tahisi manyando, h’a tibeli manyando kuli a hapeleze batu ku utwa litaelo za hae ni ko ba sa lati. (Deuteronoma 30:19, 20) Mulimu u ezize litukiso ze kona ku lu pilisa ku ya ku ile mwa tabo, kono u lu fa kolo cwale ya ku bonisa haiba lu ka tabela ku pila ka linzila za hae ze lukile. (Sinulo 14:6, 7) Barbara n’a ikatulezi ku ituta litaelo za Mulimu ni ku pila ka zona. Mi hape n’a fumani kuli Lipaki za Jehova ba na ni lilato la n’a bulezi Jesu kuli balateleli ba hae ne ba ka zibahala ka lona.—Joani 13:34, 35.

Ni mina mwa kona ku tusiwa ki litukiso ze ne tusize Barbara.

Bupilo Bo Bu Kolwisa

Niheba ba ba bonahala ku pila hande ba kana ba bata likalabo kwa lipuzo ze ba zingile. Ka mutala, Matthew, mutangana wa kwa Britain, n’a batanga hahulu ku fumana Mulimu wa niti ni mulelo wa bupilo. Bondat’ahe Matthew ne ba shwile ha n’a li wa lilimo ze 17. Hamulaho wa f’o, Matthew a pasa hahulu mwa lituto za lipina za fa yunivesiti. Cwale hanyinyani-hanyinyani a lemuha kuli bupilo bwa ku lata sifumu ki bwa mbango. A ya kwa London mi a yo kala ku ikenya mwa milyani ye kola, mikiti, bunuhi, za mioya, sikolo sa bu-Buddha ni lituto ze ñwi za batu—ka mulelo fela wa ku fumana bupilo bo bu kolwisa. Ka ku ziyeleha, a itilelela ku Mulimu kuli a mu tuse ku fumana niti.

Hamulaho wa mazazi a mabeli, Matthew a katana mulikan’a hae wa kale mi a mu taluseza butata bwa hae. Munna y’o n’a itutile ni Lipaki za Jehova. Matthew ha n’a bonisizwe liñolo la 2 Timotea 3:1-5, n’a komokile ku bona m’o Bibele i taluseza miinelo ya mwa lifasi ka ku nepahala. Ha n’a balile Ngambolo ya fa Lilundu, n’a tabile hahulu. (Mateu, likauhanyo 5-7) Pili n’a zina-zinile kakuli n’a kile a bala litaba za buhata ka za Lipaki za Jehova, kono hasamulaho a ikatulela ku ya kwa mikopano kwa Ndu ya Mubuso ye ne li bukaufi.

Matthew n’a ikozi za n’a utwile mi a kala ku ituta Bibele ni yo muñwi wa maeluda ba puteho. Honaf’o a lemuha kuli n’a ituta lika za n’a bata, ili kalabo kwa tapelo ya n’a kile a lapela ku Mulimu. N’a fumani lituso ha n’a tuhezi likezo ze sa tabisi Jehova. Ha n’a nz’a ba ni sabo ya ku saba Mulimu, n’a susumelizwe ku pila ka litaelo za Mulimu. Matthew n’a lemuhile kuli bupilo bo bu cwalo bwa kolwisa.—Muekelesia 12:13.

Ha ku na ya n’a tomezi cimo kuli Matthew kamba ba bañwi ba ba bulezwi mwa taba ye ba fumane bupilo bo bu kolwisa. Kono ne ba itutile kuli Jehova Mulimu u lelile ze nde  ku bote ba ba utwa litaelo za hae. (Likezo 10:34, 35) Ze ñwi ku zona ki bupilo bo bu sa feli mwa lifasi mo ku si na lindwa, makulanu ni tala, niheba lona lifu. (Isaya 2:4; 25:6-8; 33:24; Joani 3:16) Kana mwa li tokwa zeo? Haiba ki cwalo, mwa kona ku ituta ze ñwi ka za mwa ku fumanela bupilo bo bu kolwisa ka ku fumanehanga kwa mikopano ya ku ituta Bibele kwa Ndu ya Mubuso ya Lipaki za Jehova. Mi mwa memiwa ku taha kwa mikopano.

[Siswaniso se si fa likepe 7]

Mu lapelange ku Mulimu ka t’ata ka ku itusisa libizo la hae

[Siswaniso se si fa likepe 7]

Mu itute Bibele ni ba ba luta batu ze ku yona luli

[Siswaniso se si fa likepe 7]

Mu fumanehange kwa mikopano kwa Ndu ya Mubuso

[Manzwi a bañi ba siswaniso fa likepe 4]

Muzamai: Chad Ehlers/Index Stock Photography