“Mu Be ni Lizwalo Le Linde”

KELEZO ye fiwanga hañata ki ya kuli “haiba lizwalo la hao la ku lumeleza, ku lukile.” Kono kuli lizwalo la luna li lu konise ku eza ze lukile, li tokwa ku lutiwa ku ketahanya ze lukile ni ze si ka luka, mi lu lukela ku utwa ze li bulela.

Mu nge mutala wa se ne si ezahezi ku munna ya bizwa Zakia, wa mwa Bibele. Zakia, ya n’a pila mwa Jeriko, n’a li nduna wa batelisi mi n’a fumile. N’a itumelezi kuli n’a ipumanezi sifumu sa hae ka ku amuha batu, ili kezo ye n’e tahiselize ba bañwi manyando. Kana lizwalo la Zakia ne li mu sisitile kabakala likezo za hae ze maswe? Haiba ne li mu sisitile, ku bonahala kuli n’a si ka li isa pilu.—Luka 19:1-7.

Kono kwa ezahala nto ye n’e tahisize kuli Zakia a itekule. Jesu n’a tile mwa Jeriko. Zakia, ya n’a li yo mukuswani, n’a bata ku bona Jesu, kono kabakala buñata bwa batu, n’a sa koni ku mu bona. Kacwalo a mata ni ku yo pahama kwa kota kuli a kone ku mu bona hande. Jesu n’a tabisizwe ki tukufalelo ye tuna ya Zakia, mi a mu taluseza kuli n’a ka to pota kwa ndu ya hae. Ka tabo, Zakia a amuhela mueñi wa hae yo mutuna.

Za n’a boni ni ku utwa Zakia ha n’a li ni Jesu za mu susumeza ku cinca mikwa ya hae. N’a ize: “Bona, ni abela babotana liluwo la ka fahali; mi ha ni amuhile mutu sa hae, ni mu kutiseza litikanyo ze ne.”—Luka 19:8.

Lizwalo la Zakia ne li lutilwe, mi n’a li utwile ni ku latelela ze ne li bulela. Ku eza cwalo ne ku tahisize ze nde ze tuna. Mu nahane mwa n’a ikutwezi Zakia Jesu ha n’a mu bulelezi kuli: “Kacenu ku pilisa ku keni mwa ndu yeo”!—Luka 19:9.

Ki mutala kwa ku susueza! U bonisa kuli ku si na taba ni ze lu ezize kwamulaho, lwa kona ku cinca. Sina Zakia, lwa kona ku utwa manzwi a Jesu a ñozwi mwa Bibele ni ku luta munahano wa luna ku ziba ze lukile ni ze si ka luka. Mi ka mwa n’a susuelelize muapositola Pitrosi, lwa kona ku ‘ba ni lizwalo le linde.’ Lwa kona ku utwa lizwalo la luna le li lutilwe ni ku eza ze lukile.—1 Pitrosi 3:16.