Ne Mu Ka Tabela ku Buzañi Mulimu?

BATU mwa lifasi kaufela ba na ni lipuzo ze tuna ka za bupilo. Kana ni mina mu na ni lipuzo ze cwalo? Ba bañata ba buzize baluti ba bulapeli kono ha ba si ka fumana likalabo ze kolwisa. Ba bañwi ba ipuzize lipuzo zeo mwa pilu. Mi ba bañwi bona ba lapezi ku kupa ketelelo. Kana luli mwa kona ku fumana likalabo ku Mulimu ka za lipuzo ze mi zingile? Ze ñwi za lipuzo zeo batu ba bañata ba bulezi kuli ne ba ka buza Mulimu ki ze:

Mulimu kanti ki mañi luli?

Batu ba nga Mulimu ka ku ya ka sizo sa bona, bulapeli bwa bashemi ba bona, ni ka mo ba ikutwela. Ba bañwi ba itusisa libizo la mulimu o muñwi; ba bañwi bona ba mu biza fela kuli Mulimu. Kana ki kwa butokwa ku ziba kuli Mulimu ki mañi luli? Kana ku na ni Mulimu a nosi wa niti ya ipatulula ku luna ni ku patulula libizo la hae?

Ki kabakalañi ha ku na ni manyando cwana?

Mutu wa kona ku bilaela ha kenelwa ki matuku kamba bubotana kabakala buitamaeli bwa hae. Kono mwendi wa izibela hande ze mu nyandisa.

Niteñi batu ba bañata ba nyanda hahulu ku si na se ba fosize. Ba bañwi ki ba mapongo fela. Ba bañwi bona ba ziyelizwe ki kutokwa hande mandu a ku lobala ni lico za ku fepisa mabasi a bona. Bolule-lule ba nyandiswa ki bukebenga, lindwa, mifilifili, likozi za ka taho, kamba ba ba ba zamaisa.

Kacwalo kwa utwahala batu ba bañata ha ba buza kuli: ‘Ki kabakalañi miinelo ye cwalo ha i atile cwana? Mulimu u tuheleziñi manyando a kaufela?’

 Ni pilelañi? Mulelo wa bupilo ki ufi?

Hañata lipuzo zeo li buziwa ki mutu ya zwafile bakeñisa ku sa fumana tabo mwa misebezi y’a eza ka zazi—mi batu ba bañata ba ikutwa ku zwafa cwalo. Bolule-lule ba bañwi ba lumela kuli bupilo bwa bona bu tomezwi cimo ka nzila ye ñwi ki Mulimu. Kana ki cwalo? Haiba luli Mulimu u na ni z’a mi bupezi, ku si na ku kakanya mu ka bata ku li ziba.

Kwa libuka kaufela ze mwa lifasi, ku na ni i liñwi ye ipulela kuli i tahile ka moya wa Mulimu. Buka yeo i mwa lipuo ze ñata ku fita buka ifi kamba ifi ye kile ya ñolwa, mi seo ha si komokisi kakuli litaba zeo ze zwa ku Mulimu lu li libelela ku fumaneha kwa batu kaufela. Buka yeo ki Bibele ye Kenile. Mwa buka yeo, Mubupi wa lihalimu ni lifasi, yena Mulimu ka sibili, u ipatulula ni ku patulula libizo la hae. Kana libizo leo mwa li ziba? Kana Bibele i bulela kuli Mulimu ki mutu ya cwañi? Kana mwa ziba se i bulela ka za seo Mulimu a tokwa ku luna?

 [Manzwi a bañi ba siswaniso fa likepe 2]

Likepe la pili: Chad Ehlers/Index Stock Photography

[Manzwi a bañi ba siswaniso fa likepe 3]

Lilundu: Chad Ehlers/Index Stock Photography