Piho ya Bashaeli ba Mubuso

Tuso kwa ku Buluka Bukeni bwa Mali

BATANGA ba Jehova mwa lifasi kaufela ba bonisize busepahali bwa bona ku Mulimu ka ku ama ku za bukeni bwa mali. (Likezo 15:28, 29) Sitopa sa mutanga ya sepahala, ya na ni kutwisiso si file tuso kwa mizwale ba Sikreste kaufela. (Mateu 24:45-47) Ha lu boneñi ze ne zwile mwateñi kwa Philippines.

Mutai wa Philippines u biha kuli: “Ka 1990 ne lu zibisizwe kuli bayemeli ba kwa Betele ya Brooklyn ne ba ka to eza mukopano kwanu kwa Philippines. Mizwale ne ba memilwe ku zwa kwa mitai i sikai ya kwa Asia, ku kopanyeleza Korea, Taiwan, ni Hong Kong. Mulelo ne li wa ku tusa ku toma likolo la Lisebelezo za Litaba za kwa Sipatela mwa mitai ya bona ni ku toma Tutengo twa Kutwano ni ba Sipatela. Mwa Philippines tutengo t’o ne tu tomilwe pili mwa mileneñi ye mine ye mituna.” Tutengo t’o ne tu ka lika ku fumana madokota ba ba tabela ku swalisana ni luna mwa ku sa amuhela mali sina Bakreste. Hape ne tu ka tusa mizwale ha ne ku ka zuha butata bwa za mali.

Remegio n’a ketilwe ku sebeza mwa Katengo ka Kutwano ni ba Sipatela mwa Baguio. Nako ha ne inze i ya, madokota ba lemuha ze ne tu peta tutengo t’o. Remegio u hupula muta o muñwi madokota ba sikai be ne ba kopani ni Katengo ka Kutwano ni ba Sipatela ha ne ba bata ku ziba mwa ku alafela bakuli ba ba li Lipaki be ne ba hana ku pompelwa mali. Remegio n’a ize: “Madokota ne ba kalile ku buzaka lipuzo, kono na zingeha kakuli lipuzo zeo ne li tungile hahulu.” A lapela ku Jehova kuli a mu tuse ku talimana ni butata b’o. Remegio u ekeza kuli: “Hamulaho wa puzo ni puzo, madokota ba bañwi ne ba yemisa mazoho ni ku bulela mo ne ba kile ba tatululela butata bo bu swana.” Remegio n’a tabisizwe ki tuso yeo, sihulu kakuli puhisano yeo ya lipuzo ni likalabo ne i zwezipili ka lihora ze peli.

Cwale se ku na ni tutengo to tu 21 mwa naha yeo kaufela, mi ku na ni mizwale ba 77 ba ba sebeleza ku tona. Danilo, Paki ya li dokota, u li: “Madokota ba lemuha kuli bakuli ba bona ba ba li Lipaki ba yemelwa ki kopano y’e ba babalela ka lilato.” Mualafi yo muñwi pili n’a kata-katile ku pazula muzwale ku si na ku mu pompela mali. Kono muzwale y’o n’a tiyezi mayemo a hae. A pazulwa mi ne ku si ka ba ni butata. Ba Lisebelezo za Litaba za kwa Sipatela ba biha kuli: “Dokota n’a komokisizwe hahulu ki ku fola kwa muzwale y’o. A li: ‘Ku likana ni ze ezahezi f’a, muta yo muñwi wa mina a tokwa mupazulelo o sa tokwi mali wo, ni ka tabela ku eza cwalo.’”