Lipuzo Ze Zwa kwa Babali

Ki Kabakalañi Tora ya ku Libelela ya April 1, 2002 ha ne i bulezi fa likepe 11 paragirafu 7, kuli kolobezo ya mwa mezi ya balumeli ba banca ba Majuda fa Pentekonta ya 33 C.E. ne i li sisupo sa “buineelo bwa bona bwa ka butu ku Mulimu ka Kreste,” hailif’o kwamulaho ne ku lumelwa kuli nweliso ya Majuda ku zwa ka 33 C.E. ku to fita ka 36 C.E. ne i sa tokwi buineelo bo bu cwalo bwa ka butu?

Ka 1513 B.C.E., Jehova Mulimu n’a file Maisilaele kolo ya ku ba sicaba se si kenile ku yena ha ne ba ‘ka utwa Linzwi la hae luli, ni ku mamela bulikani bwa hae.’ Ba alaba kuli: “Z’a bulezi kaufela [Muñ’a] Bupilo lu ka li eza.”—Exoda 19:3-8; 24:1-8.

Ka ku lumela ku mamela bulikani bwa Mulao wa Mushe, Maisilaele ba ineela ku Mulimu. Majuda be ne ba simuluhile ku bona ne ba til’o pepelwa mwa sicaba se si ineezi seo. Kono kolobezo ya Majuda be ne ba til’o ba balateleli ba Jesu Kreste ku zwa fa Pentekonta ya 33 C.E. ku ya cwalo kwapili ne i ama ze ñata ku fita ku ifana fela kwa bona ku Mulimu sina ba sicaba se si ineezi. Ne i bonisa buineelo bwa bona ku Jehova Mulimu mwa silikani sa bona se sinca ka Jesu Kreste. Kamukwaufi?

Balutiwa ba ba bat’o eza 120 ha se ba amuhezi moya o kenile mwa muzuzu wa fahalimu kwa Jerusalema fa Pentekonta ya 33 C.E., muapositola Pitrosi a yema ni ku kala ku kutaza kwa Majuda ba bañata ni maproselite be ne ba til’o bona ze n’e ezahezi. Ha s’a file bupaki bo bu tezi, a bulelela Majuda be ne ba sisitwa ki lizwalo kuli: “Mu bake, mi mutu ni mutu wa mina a kolobezwe ka Libizo la Jesu Kreste, kuli a fiwe swalelo ya libi.” Ka ku utwa kelezo ye ñwi ya Pitrosi, “ba ba amuhezi linzwi la hae, ba kolobezwa; mi mwa lizazi leo, balutiwa ba ekelezwa batu ba ba batil’o eza 3,000.”—Likezo 2:1-41.

Kana Majuda be ne ba kolobelizwe hamulaho wa ku utwa kelezo ya Pitrosi ne si ba sicaba se ne si ineezi kale ku Mulimu? Kana ne ba siyo mwa bulikani bwa ku ineela ku Mulimu? Kutokwa. Muapositola Paulusi n’a ñozi kuli ‘Mulimu n’a felisize Mulao ka ku u kokotela fa [kota ya linyando, NW].’ (Makolose 2:14) Ka lifu la Kreste ka 33 C.E., Jehova Mulimu n’a felisize bulikani bwa Mulao—ili fo ne ku tomile luli buineelo bwa Maisilaele  ku Mulimu. Sicaba se ne si hanile Mwan’a Mulimu cwale sa haniwa ki Mulimu ka sibili. “Maisilaele ka nama” ne se ba tuhezi ku ba sicaba se si ineezi ku Mulimu.—1 Makorinte 10:18; Mateu 21:43.

Bulikani bwa Mulao ne bu felisizwe ka 33 C.E., kono sishemo se situna sa Mulimu ni ku isa mamelelo kwa Majuda ne ku si ka fela ka nako yeo. * Nako yeo ne ka zwelapili ku to fita ka 36 C.E., Pitrosi ha n’a kutalize ku mulapeli wa kwa Italia ya bizwa Kornele, ni ba ndu ya hae hamohocwalo ni ku bamacaba ba bañwi. (Likezo 10:1-48) Ki kabakalañi nako ya sishemo yeo ha ne i filwe?

Daniele 9:27 i li: “[Mesiya] u ka iswala bulikani bo bu tiile ni ba bañata, ka sunda i li ñwi.” Bulikani bwa Abrahama ki bona bo ne bu iswelwi ka lilimo ze 7, kamba “sunda i li ñwi,” ku zwa fa kolobezo ya Jesu ni makalelo a bukombwa bwa Mesiya bwa nyangela ka 29 C.E. Kuli mutu a be mwa bulikani b’o, n’a tokwa fela ku ba wa lusika lwa Abrahama. Bulikani b’o bwa lineku li li liñwi ne bu sa tahisezi mutu y’o ku ba mwa bulikani bwa ku ineela ku Jehova. Kacwalo, balumeli ba Majuda be ne ba kolobezwa hamulaho wa ngambolo ya Pitrosi fa Pentekonta ya 33 C.E., niha ne ba amuhela mamelelo ye ipitezi ka ku ba Majuda ba ka sipepo, ne ba siyo mwa bulikani bwa ku ineela ku Mulimu muta bulikani bwa Mulao ne bu felisizwe. Bona ka sibili ne ba tokwa ku ineela ku Mulimu.

Buineelo bwa ka butu bwa Majuda ni maproselite ka ku itahisa kwa kolobezo fa lizazi la Pentekonta ya 33 C.E. ne li bwa butokwa ka libaka le liñwi hape. Muapositola Pitrosi n’a susuelize bateelezi ba hae ku baka ni ku kolobezwa ka libizo la Jesu. Ku eza cwalo ne ku ba tokwa kuli ba ikambuse kwa lifasi ni ku lumela kuli Jesu ki Mulena ni Mesiya, ili Muprisita yo Mutuna, ni kuli ki yena ya inzi kwa lizoho la bulyo la Mulimu kwa lihalimu. Ne ba tokwa ku biza fa libizo Jehova Mulimu kuli ba piliswe ka Kreste Jesu, ili nto ye n’e ba tokwa ku ba ni tumelo ku Kreste ni ku lumela kuli ki Mueteleli wa bona. Mutomo ka ku tala wa ku ba ni silikani ni Mulimu ni ku fumana swalelo ya libi ne se u cincize cwale. Ka butu, balumeli ba Majuda ne ba tokwa ku amuhela tukiso ye nca yeo. Kamukwaufi? Ka ku ineela ku Mulimu ni ku itibahaza fa nyangela kuli ba ezize cwalo ka ku nweliswa mwa mezi ka libizo la Jesu Kreste. Kolobezo ya mwa mezi ne li sisupo sa buineelo bwa bona ku Mulimu, ili ku ba tahisa mwa silikani se sinca ni yena ka Jesu Kreste.—Likezo 2:21, 33-36; 3:19-23.

[Litaluso za kwatasi]