Mu Kete Bupilo bwa Kamita

BATU ha ba si ka ba kale ni lika ze ñata cwana za ku keta ku zona. Ka mutala, litino ze lu apala, lico ze lu ca, ni ko lu sebeza ni ko lu pila hañata ki lika za ku iketela. Mwa libaka ze ñata za lifasi, ku iketela wa ku nyalana ni yena ni kona ku tumile. Niteñi, Bibele i fa keto ye fita liketo ze ñwi kaufela—ili keto ye filwe batu kaufela.

Bibele i li: “Ya tiiseza mwa ku eza niti u ka fumana bupilo; kono ya tundamena bumaswe u liba kwa lifu.” (Liproverbia 11:19) Mi Jesu Kreste n’a ize: “Bupilo bo bu sa feli, kikuli ba ku zibe, Wena, Mulimu a nosi wa niti, ni y’o lumile, yena Jesu Kreste.”—Joani 17:3.

Kaniti, Mubupi wa luna u lu file kolo ya ku keta nzila ye isa kwa bupilo bo bu sa feli! Lu lukela ku ezañi kuli lu fumane bupilo bwa kamita?

Bibele i li: “Niti, mwa nzila ya yona, ku na ni bupilo.” (Liproverbia 12:28) Lwa kona ku ba mwahal’a ba ba lukile ba ba mwa nzila ye isa kwa bupilo bo bu sa feli. Ka nzila ifi? Ka ku bona teñi kuli lu pila ka ku lumelelana ni tato ya Mulimu ni litaelo za hae. (Mateu 7:13, 14) Kacwalo, haike lu eze keto ye lukile kuli lu amuhele mpo ya Mulimu ya bupilo bo bu sa feli.—Maroma 6:23.