Mu Tiye Kuli Mu Fumane Mupuzo mwa Siyano ya Bupilo

HA NE mu ka ba mwa musipili, mwa liwate le li bifile, ne mu ka tabela ku zamaya cwañi? Ne mu ka keta ku zamaya ka kakolo ka ka si ka tiya, kamba ku zamaya ka sisepe se si tiile? Kaniti ne mu ka keta sisepe, kakuli sona si kona ku tiyela mandinda a’ buhali ao.

Ha lu li mwa muinelo wa cwale o buhali, o sabisa, lu talimananga ni miliko. Ka mutala, mikulwani fokuñwi ba lyanganiswanga ni ku kaleliswa ki mihupulo ni mikwa ye lyanganisa ya mwa lifasi. Batu ba ba bile Bakreste cwanoñu fa ba kana ba ikutwa ku sa tiya hande. Mane ni ba bañwi ba ba tiile, be se ba sebelelize Mulimu ka lilimo-limo, ba kana ba talimana ni muliko kakuli ze ne ba libelela ha li si ka petahala ka ku tala.

Maikuto a cwalo haki a’ sieñi. Batanga ba ba sepahala ba Jehova, ba ba cwale ka Mushe, Jobo, ni Davida, fokuñwi ne ba kalelwanga. (Numere 11:14, 15; Jobo 3:1-4; Samu 55:4) Niteñi, ne ba pilile ka busepahali bo butuna ku Jehova. Mutala wa bona o munde u lu susueza ku tiya, kono Satani Diabulosi u bata ku lu yembulula mwa siyano ya bupilo bo bu sa feli. (Luka 22:31) Kacwalo, lu kona ku zwelapili cwañi ku tiya “mwa tumelo?” (1 Pitrosi 5:9) Mi lu kona ku tiisa cwañi balumeli ba bañwi?

Jehova U Bata Kuli Lu Tiye

Haiba lu sepahala ku Jehova, kamita u ka lu tusa ku tiya. Walisamu Davida n’a talimani ni miliko ye miñata ye t’ata, kono n’a sepile Mulimu mi kacwalo n’a kona ku opela kuli: “[Jehova] u ni zwisize mwa musima o sabisa, ni mwa mataba a sileze; u tomile mautu a ka fa licwe, mi u tiisize mihato ya ka.”—Samu 40:2.

Jehova u lu fa m’ata a ku lwana “ndwa ye nde ya tumelo” ilikuli lu kone ku “swala bupilo bo bu sa feli.” (1 Timotea 6:12) Hape u lu fa z’e lu tiisa, z’e lu tusa ku tula mwa ndwa ya luna ya kwa moya. Muapositola Paulusi n’a susuelize Bakreste sina yena ku ‘tiyela ku Mulena, ni mwa m’ata a hae a’ sa palelwi ki se siñwi,’ ni ku ‘swala lilwaniso kaufela za Mulimu, kuli ba kone ku tiya kwa lunya lwa Diabulosi.’ (Maefese 6:10-17) Kono ki lika mañi ze kona ku lu kalelwisa? Mi lu kona ku tiyela cwañi zona lika ze kalelwisa zeo?

Mu Tokomele Miliko Ye Fokolisa

Ki ko kunde ku hupula taba ya butokwa ye: Likatulo ze lu eza kwa mafelelezo li ka ama hande kamba ku ama maswe ku tiya kwa luna kwa Sikreste. Mikulwani ba na ni ku eza likatulo mwa litaba ze cwale ka misebezi ya ku eza kwapili, ku ya kwa yunivesiti kamba kwa koleji, ni ku kena mwa linyalo. Ba bahulu ba kana ba tokwa ku atula ka za ku tutela  kwa sibaka si sili kamba ku ba ni mubeleko o muñwi. Ka zazi, lu atulanga ka za mwa ku itusiseza nako ni ze ñwi ze ñata-ñata cwalo. Lu kona ku tusiwa ki nto mañi kuli lu eze likatulo ze nde ze ka lu tiisa ka ku ba batanga ba Mulimu? Yo muñwi ya s’a bile Mukreste ka nako ye telele n’a ize: “Ha ni ezanga likatulo, ni kupanga Jehova kuli a ni tuse. Ni lumela kuli ku butokwa ku amuhela ni ku sebelisa kelezo ye fiwa mwa Bibele, kwa mikopano ya Sikreste, ki maeluda, ni mwa lihatiso za Sikreste.”

Ha lu eza likatulo, lu ipuze kuli: ‘Lilimo ze 5 kamba ze 10 ku zwa kacenu, kana ni ka inyaza ka za likatulo ze ni eza kacenu kamba kutokwa? Kana na likanga ku bona teñi kuli likatulo ze ni eza ha li na ku ni fokolisa kwa moya, kono kuli li ka ni tusa ku eza zwelopili kwa moya?’—Mafilipi 3:16.

Ku ituhelela ku tulwa ki miliko kamba ku ituhelela ku fita fakaufi ni ku loba milao ya Mulimu ku tahiselize batu ba bañwi ba ba kolobelizwe ku pila bupilo bo bu sa sepehi hande. Ba sikai ba ba zwisizwe mwa puteho kabakala ku eza sibi ba sa baki ba sebelize ka t’ata kuli ba kutiswe mwa puteho, mi ni ku zwisiwa hape—fokuñwi hamulahonyana wa ku kutiswa—kakuli ba kutezi ku eza sibi se si swana. Esi mwendi ha ba si ka kupa Mulimu kuli a ba tuse ku ‘toya bumaswe ni ku kumalela bunde’? (Maroma 12:9; Samu 97:10) Kaufel’a luna lu tokwa ku ‘ezeza mautu a luna linzila ze lukile.’ (Maheberu 12:13) Kacwalo, ha lu nyakisiseñi lisupo ze ñwi ze kona ku lu tusa ku tiya kwa moya.

Mu Tiye ka Misebezi ya Sikreste

Nzila ye ñwi ye lu kona ku tiya ka yona mwa siyano ya bupilo ki ku ba ni ze ñata za ku eza mwa musebezi wa ku shaela za Mubuso. Ee, bukombwa bwa luna bwa Sikreste bu lu tusa hahulu ku libisa lipilu ni minahano ya luna kwa ku eza tato ya Mulimu ni ku swala ka ku tiya mupuzo wa bupilo bo bu sa feli. Ka za seo, Paulusi n’a susuelize ba kwa Korinte kuli: “Banabahesu ba ba latwa, mu tiye, mu si ke mwa zikinyeha, mi mu tiise kamita musebezi wa Mulena, inze mu ziba kuli musebezi wa mina o tata ha u na ku ba o si na tuso ku Mulena.” (1 Makorinte 15:58) Ku ‘tiya’ ku talusa ‘ku sa shekesha.’ Ku sa “zikinyeha” ku kona ku talusa ‘ku sa ituhelela ku sutiswa f’a tomile mutu.’ Kacwalo, ku pateha mwa bukombwa bwa luna ku kona ku lu tiisa mwa Bukreste bwa luna. Ku tusa ba bañwi ku ziba Jehova ku lu tusa ku utwisisa libaka ha lu pila mi ku lu tiseza tabo.—Likezo 20:35.

Pauline, Mukreste ya s’a tandile lilimo ze 30 mwa bulumiwa ni mwa mifuta ye miñwi ya musebezi wa ku kutaza ka lihora ze ñata, u li: “Bukombwa ki silelezo kakuli ku kutaza ku ba bañwi ku ni kolwisa kuli kaniti ni na ni niti.” Buikolwiso bo bu swana hape bu kona ku tahiswa ki ku eza kamita misebezi ye miñwi ya Sikreste, inge cwalo ku fumanehanga kwa mikopano ya milapelo ni ku tukufalelwa ku eza tuto ya Bibele ya ka butu.

Ku Tiiswa ki Kopano ya Mizwale Ba Ba Lilato

Ku ba mwa kopano ya mwa lifasi kamukana ya balapeli ba niti kwa kona ku lu tiisa luli. Ki mbuyoti hakalo ku swalisana ni kopano ye cwalo ya mwa lifasi kamukana ya mizwale ba ba lilato! (1 Pitrosi 2:17) Mi hape lwa kona ku tiisa balumeli ba bañwi.

Mu nge lituso za n’a fanile Jobo, munna ya lukile. Niheba Elifazi, muomba-ombi wa buhata, n’a itumelezi kuli: “Manzwi a hao n’a konile ku tiisa ya n’a bata ku wa, ni ya n’a njanja mwa mañwele.” (Jobo 4:4) Kana ni luna lwa tusa ba bañwi cwalo? Mañi ni mañi wa luna u na ni buikalabelo bwa ku tusa mizwale ni likaizeli ba luna ba kwa moya kuli ba itiise mwa sebelezo ya Mulimu. Ha lu li ni bona, lwa kona ku eza ku bona ka mw’a bulela manzwi a, kuli: “Mu tiise mazoho a’ fokozi, mu tiise mañwele a’ kweta.” (Isaya 35:3) Kacwalo, ku cwañi ha ne mu ka lela ku tiisanga ni ku susueza Mukreste a li muñwi  kamba ba babeli nako kaufela ye mu bonana ni bona? (Maheberu 10:24, 25) Ku ba babaza ni ku itebuha buikatazo bwa bona bwa ku tabisa Jehova kaniti kwa kona ku ba tusa ku tiya ilikuli ba kone ku tula mwa siyano ya bupilo.

Maeluda ba Sikreste ba kona ku peta ze ñata ka ku susueza ba banca. Ba kona ku eza cwalo ka ku fa liakalezo ze nde ni kelezo ye nde ye tomile fa Mañolo ni ka ku sebeza ni bona mwa bukombwa bwa mwa simu. Muapositola Paulusi n’a tiisanga ba bañwi fa n’a kona ku ezeza cwalo kaufela. N’a shukezwi ku bona Bakreste mwa Roma ilikuli a ba tiise kwa moya. (Maroma 1:11) N’a nga mizwale ni likaizeli ba hae ba ba latwa ba kwa Filipi sina ‘tabo ya hae ni kuwani ya hae ya silena’ mi n’a ba susuelize ku ‘tiyela cwalo ku Mulena.’ (Mafilipi 4:1) Ha n’a utwile manyando a mizwale ba hae ba mwa Tesalonika, Paulusi n’a lumile Timotea kuli a y’o ‘ba tiisa ni ku ba wisa pilu bakeñisa tumelo ya bona; kuli ku si ke kwa fumanwa mutu ya zikinyeha mwa liñalelwa.’—1 Matesalonika 3:1-3.

Baapositola bo Paulusi ni Pitrosi ne ba lemuhile ni ku itebuha buikatazo bwa ka busepahali bwa balapeli ba bañwi. (Makolose 2:5; 1 Matesalonika 3:7, 8; 2 Pitrosi 1:12) Ka ku swana, ku fita ku isa pilu kwa bufokoli bwa mizwale ba luna, lu lemuhe mikwa ya bona ye minde ni ku tula kwa bona mwa ndwa ya ku zwelapili ku tiya ni ku kuteka Jehova.

Haiba lu talima fela bumaswe bwa ba bañwi kamba ku ba nyaza-nyaza, mwendi ka ku sa lela lu ba tatafaleza ku tiya mwa tumelo. Kwa swanela hakalo ku hupula kuli mwa linako za cwale, mizwale ba luna “ba katezi, ba hasani”! (Mateu 9:36) Mwa puteho ya Sikreste, ba na ni swanelo ya ku libelela ku omba-ombiwa ni ku imululwa. Kacwalo, haike kaufel’a luna lu eze mo lu konela kaufela ku tiisa balumeli ba bañwi ni ku ba tusa ku tiya.

Fokuñwi ba bañwi ba kana ba lu eza ka nzila ye kona ku lu fokolisa. Ba bañwi ha ba ka lu bulela maswe kamba ku lu eza maswe, kana lu ka kutela mwamulaho mwa sebelezo ya luna ku Jehova? Haike lu si tuheleli mutu ufi kamba ufi ku lu wisa mwa ku tiya kwa luna!—2 Pitrosi 3:17.

Lisepiso za Mulimu Za Tiisa

Sepiso ya Jehova ya nako ye nde ya kwapili muta Mubuso u busa i lu fa sepo ye lu tusa ku zwelapili ku tiya. (Maheberu 6:19) Mi ku kolwa kuli Mulimu kamita wa petanga z’a sepisize ku lu susueza ku ‘tona ni ku tiya mwa tumelo.’ (1 Makorinte 16:13; Maheberu 3:6) Ha ne ku ka bonahala kuli lisepiso ze ñwi za Mulimu za liyeha ku petiwa, tumelo ya luna neikana ya likiwa. Kacwalo, ku butokwa hahulu ku tokomela kuli ha lu yembululwi ki lituto za buhata ni ku sutiswa kwa sepo ya luna.—Makolose 1:23; Maheberu 13:9.

Mutala o maswe wa Maisilaele be ne ba shwezi ku sa lumela lisepiso za Jehova u lukela ku ba temuso ku luna. (Samu 78:37) Ku fita ku ba sina bona, haike lu tiye, lu nze lu sebeleza Mulimu ka ku tona mwa mazazi a  maungulelo a. Eluda yo muñwi ya yeziseli n’a ize: “Ka zazi, ni pila inge kuli lizazi le lituna la Jehova li ka taha kamuso.”—Joele 1:15.

Ee, lizazi le lituna la Jehova li fakaufi. Kono ibile fela lwa sutelela ku Mulimu, ha ku na se lu saba. Haiba lu kumalela ka ku tiya kwa lipimo za hae ze lukile ni ku zwelapili ku tiya, lwa kona ku tula mwa siyano ya bupilo bo bu sa feli!—Liproverbia 11:19; 1 Timotea 6:12, 17-19.

[Siswaniso se si fa likepe 23]

Kana mwa eza mo mu konela kaufela ku tusa Bakreste ba bañwi ku zwelapili ku tiya?

[Manzwi a bañi ba siswaniso fa likepe 21]

The Complete Encyclopedia of Illustration/J. G. Heck