“Mu Sutelele ku Mulimu Mi U Ka Sutelela ku Mina”

Pili Ni Hamulaho—Makalelo A Maswe, Mafelelezo A Mande

“LINZWI la Mulimu ki le li pila, mi li na ni mata; kwa buhali li fita lilumo le li lozizwe kafa ni kafa. . . mi li na ni bubebe mwa ku atula maikuto ni mihupulo ya mwa pilu.” (Maheberu 4:12) Ki mwa n’a bulelezi muapositola Paulusi ka za m’ata a’ punya kwa pilu a lushango lwa Mulimu. Buikoneli bwa lona bwa ku fita kwa pilu ne bu bonahezi sihulu mwa linako za baapositola. Ku si na taba ni kukuezo ye maswe ya miteñi yeo, be ne ba bile Bakreste ne ba apezi mutu yo munca.—Maroma 1:28, 29; Makolose 3:8-10.

M’ata a Linzwi la Mulimu, sina ka mwa taluselizwe mwa Bibele, a sa iponelwa ni kacenu. Ka mutala, mu nyakisise taba ya Richard, munna yo mutelele, ya tiile. Ka ku ba wa kacima-cima, Richard n’a kona ku lwana a sa conkolwa fela. Bupilo bwa hae ne bu sinyizwe ki mifilifili. Richard mane n’a keni mwa sikwata sa babapali ba liñindi. N’a itwaelize hahulu papali yeo kuli mane a fita fa ku ba caziba yo mutuna wa papali ya liñindi kwa Westphalia, mwa Germany. Richard hape n’a nwa maswe mi hañata n’a banga mwa mifilifili. Ku o muñwi wa mifilifili yeo, ne ku bulailwe mutu, mi ne ku siyezi fela hanyinyani kambe Richard n’a lengilwe mwa tolongo.

Ku cwañi ka za linyalo la Richard? U bulela kuli: “Na ni Heike lu si ka ituta kale Bibele, yo muñwi ni yo muñwi n’a ikezeza mwa latela. Heike n’a tandanga hahulu nako ni balikani ba hae, na inze ni eza lipapali ze ne ni tabela hahulu—sihulu papali ya liñindi, ku bapalela fa mezi, ni ku ndumbwikela mwa mezi.”

Bo Richard ni Heike ha ne ba kalile ku ituta Bibele ni Lipaki za Jehova, Richard na ziyelizwe ki ku eza licinceho ze n’e bonahala ku sa konahala ilikuli a pile ka lipimo ze pahami za Linzwi la Mulimu. Kono ha n’a nz’a ziba hande Jehova Mulimu, Richard a ba ni takazo ye tuna ya ku bata ku mu tabisa. Richard n’a lemuhile kuli Mulimu h’a tabeli batu ba ba lata mifilifili kamba ba ba bapala za lindwa. Richard n’a itutile kuli: ‘Moya wa Muñ’a Bupilo u toile ya maswe, ni ya lata situhu.’—Samu 11:5.

Hape, bo Richard ni Heike ne ba tabisizwe hahulu ki sepo ya ku pila ku ya ku ile mwa lifasi le li li paradaisi. Ne ba bata ku yo pila hamoho mwa lifasi leo! (Isaya 65:21-23) Memo ya kuli “mu sutelele ku Mulimu mi u ka sutelela ku mina” ne i fitile Richard kwa pilu. (Jakobo 4:8) N’a iponezi butokwa bwa ku mamela kelezo ye tahile ka moya wa Mulimu y’e li: “Mutu ya bambabile, u si ke wa mu shwela muna, mi u si ke wa likanyisa mikwa ya hae. Kakuli ya maswe u toilwe ki [Muñ’a] Bupilo; kono ya lukile u latwa ki Yena.”—Liproverbia 3:31, 32.

Nihaike n’a tabela hahulu ku cinca mikwa ya hae, Richard n’a lemuhile kuli n’a sa koni ku eza cwalo ka m’ata a hae fela. N’a fitile fa ku bona butokwa bwa ku kupa tuso ku Mulimu ka tapelo. Kacwalo a eza sina Jesu mwa n’a bulelezi baapositola ba Hae kuli: “Mu lapele, kuli mu si ke mwa kena mwa muliko; moya ona wa lata, kono nama ya fokola.”—Mateu 26:41.

Ha s’a itutile m’o Mulimu a’ ngela mifilifili ni buhali, Richard n’a sa kakanyi kuli ku eza papali  ya liñindi ku fosahezi. Ka tuso ya Jehova ni susuezo ya be ne ba ituta ni yena Bibele, Richard a ikayutula kwa mifilifili. A tuhela papali ya liñindi ni mifilifili mi a ikatulela ku kondolokisa bupilo bwa lubasi lwa hae. Richard, ya s’a li muokameli ya wile pilu mwa puteho ye ñwi ya Lipaki za Jehova, u li: “Ku ituta niti ye mwa Bibele ku ni tusize ku itekula pili ni si ka nga muhato.” U ekeza kuli: “Likuka za lilato ni likute se li ni etelela cwale mwa swalisano ya ka ni musal’a ka ni bana ba ka. Kacwalo lubasi lwa luna lu fitile fa ku swalisana.”

Batu ba ba kwashekilwe ka linako ze ñwi ba tamelelize Lipaki za Jehova kuli ba shandaula mabasi. Kono mitala ya batu ba ba swana sina Richard i bonisa kuli taba yeo ki ya buhata. Buniti kikuli, niti ya Bibele i konisa be ne ba bile ni makalelo a maswe ku ba ni buiketo fa lapa ni ku ba ni nako ye nde kwapili.—Jeremia 29:11.

[Manzwi a fa likepe 9]

“Sepo ya ku pila mwa lifasi le li li paradaisi ne i ni susumelize ku cinca”

[Mbokisi fa likepe 9]

Likuka za Bibele Z’e Beleka

Bibele y’a kona ku cincisa batu bupilo bwa bona. Ki ze likuka ze ñwi za Mañolo ze se tusize ba mifilifili ku cinca:

“Ya sa halifi kapili, u fita sinata kwa mata; mi ya busa pilu ya hae, u fita ya hapile munzi kwa bundume.” (Liproverbia 16:32) Buhali bo bu fitelezi bu bonahaza bufokoli, isi m’ata.

“Ngana ya mutu i mu tibela ku halifa kapili.” (Liproverbia 19:11) Ku ba ni kutwisiso ye tungile ya miinelo ku tusa mutu kuli a zibe luli se si tisa ku sa utwana mi ku kona ku mu tibela ku halifa kapili.

‘U si ke wa twaelana ni mutu ya buhali kakuli u ka swana wa twaela mizamao ya hae.’ (Liproverbia 22:24, 25) Bakreste ka butali ba ambuka siango ni batu ba ba halifa kapili.