Ze Ñozwi Ze Hapa Munahano

KATALA-MATUNGA ya bizwa Richard E. Byrd n’a ile haketalizoho kwa Antarctica ku zwa 1928 ku isa 1956. Ka ku ñolanga litaba ze n’e ezahala ni lipiho ze nepahezi za misipili, yena ni litopa za hae ne ba kona ku ziba mufukelo wa moya, ku lukisa limapa, ni ku sela litaba ze ñata ka za lifasi la Antarctica.

Misipili ya Byrd i bonisa butokwa bwa ku buluka litaba ze ñozwi za musipili. Mwa buka ya litaba za musipili, ku ñolwanga tunango twa litaba za lieto la ka sisepe kamba fulai. Litaba zeo za kona ku itusiswa hasamulaho wa ku londota ze n’e ezahezi kamba ku alakanya litaba ze kona ku tusa mwa misipili ya kwapili.

Mañolo a fa litaba ze hapa munahano ka za Munda wa mwa miteñi ya Nuwe. Munda w’o n’o ambakani lifasi kaufela ku fitelela silimo. Mwa ku itukiseza Munda, Nuwe, musal’a hae, ni bana ba bona ba balalu ni basali ba bona ne ba tandile lilimo ze 50 kamba 60 inze ba ngangula aleka—ili lingwalungwalu la sisepe se ne si eza limita ze 133.5 mwa butelele, limita ze 22.3 mwa bukuswani, ni limita ze 13.4 mwa butelele bwa ku ya mwahalimu. Ne i ngangulezwiñi? Libaka ne li kuli batu ba bañwi ni lifolofolo ba bande Munda.—Genese 7:1-3.

Kona kuli buka ya Genese ye mwa Bibele i na ni ze ne lu ka li ki litaba ze ñozwi za Nuwe ze talusa ze n’e ezahezi ku zwa kwa makalelo a Munda ku fitela yena ni lubasi lwa hae ha ba longoka mwa aleka. Kana litaba zeo li na ni butokwa ku luna kacenu?