Ku Fana Ko ku Tabisa Mulimu

MWA Betania, Jesu ni balutiwa ba hae ne ba nze ba ikola lico ni balikani ba bona b’a sikai, mi ku bona ne ku na ni Maria, Mareta, ni Lazaro ya n’a sa z’o zuswa kwa bafu. Maria ha n’a ngile mafula a sende ye tula, a’ likana pondo ya bukiti, ni ku a toza Jesu kwa mautu, Judasi Isikariota a halifa, mi a bulela maikuto a hae. A bilaela a li: “Kiñi sende yeo s’e si ka lekiswa lipondo ze lishumi ka ze peli [ili mali a’ bat’o likana ni tuwelo ya silimo], mi mali ao a abelwe babotana?” Ba bañwi ni bona ka ku sa liyeha ba bilaela cwalo.—Joani 12:1-6; Mareka 14:3-5.

Kono Jesu a alaba a li: “Mu mu tuhele; . . . babotana mu na ni bona kamita, mi mu ka ba eza hande nako kaufela ye mu lata; kono na, ha mu na ku ba ni na kamita.” (Mareka 14:6-9) Ba bahulu ba bulapeli bwa Sijuda ne ba lutanga kuli ku tusa babotana ne li nto ye nde mi hape ne ku kona ku tahisa swalelo ya libi. Kono Jesu yena n’a bonisize hande kuli ku fana ko ku tabisa Mulimu ne ku sa ami fela ku tusa babotana.

Ku tatuba ka bukuswani mo ne ku fanelwanga mwa puteho ya pili ya Sikreste ku ka bonisa linzila ze ñwi ze nde ze lu kona ku bonisa ka zona buiyakato bwa luna mi kacwalo ni ku tabisa Mulimu ka ku fana kwa luna. Hape ku ka bonisa mufuta o muñwi o ipitezi wa ku fana o tusa ka ku fitisisa.

“Mu Fane Lituso”

Ka linako li sikai, Jesu n’a susuelize balutiwa ba hae ku ‘fana lituso,’ kamba ka mo i bulelela toloko ye ñwi, kuli ba “fe babotana.” (Luka 12:33, Bibele Ye Kenile, hatiso ya 1984) Kono Jesu n’a lemusize ka za ku iponahalisa ko ku lelezwi fela ku tahisa tumbo ku ya fana ku fita ku Mulimu. N’a ize: “Ha u tusa ya shebile, u si ke wa liza tolombita fapil’a hao, mo ba ezeza baipi mwa masinagoge, ni mwa mapatelo, kuli ba lumbiwe ki batu.” (Mateu 6:1-4) Bakreste ba kwa makalelo ne ba utwile kelezo yeo ka ku sa iponahalisa, sina mo ne ba ezezanga ba bahulu ba bulapeli mwa linako zeo. Bakreste ne ba iketezi ku tusanga ka butu ba ba mwa butokwi kamba ku fa limpo ka ku sa zibahaza.

Ka mutala, kwa Luka 8:1-3, lu talusezwa kuli Maria Magdalena, Joana, Suzana, ni ba  bañwi ka ku sa iponahalisa ne ba itusisize “bufumu bwa bona” kwa ku sebeleza Jesu ni baapositola ba hae. Banna bao niha ne ba si babotana, ne ba tuhezi misebezi ya bona ya ku ipilisa ka yona kuli ba ise mamelelo kaufela kwa bukombwa. (Mateu 4:18-22; Luka 5:27, 28) Ka ku ba tusa ku peta musebezi o ne ba filwe ki Mulimu, basali bao ne ba lumbeka Mulimu. Mi Mulimu n’a bonisize kuli n’a tabezi ze ne ba ezize ka ku tahisa kuli za bufani bwa bona li ñolwe mwa Bibele, ilikuli li kone ku to balwa mwa linako za kwapili.—Liproverbia 19:17; Maheberu 6:10.

Dorkasi ne li musali yo muñwi ya sishemo ya n’a “ezanga misebezi ye minde ye miñata, ni lituso.” Mwa Jopa, ye kwa likamba la liwate kwa n’a pila, n’a lukelanga limbelwa ba ba botanile liapalo. Ha lu zibi kamba ki yena ya n’a lekanga masila kamba n’a lukanga fela. Nihakulicwalo, musebezi wa hae o munde ne u tahisize kuli a latiwe ki ba n’a kona ku tusa, ni Mulimu, mi Mulimu n’a mu fuyauzi kabakala sishemo sa hae.—Likezo 9:36-41.

Mulelo O Lukile U Butokwa

Kiñi se ne si susumelize batu bao ku fana? Ne si fela musa o n’o zusulusizwe ki likupo za tuso. Ne ba ikutwile kuli luli ne ba na ni ku eza mo ne ba konela ka zazi ku tusa babotana, ba ba mwa kozi, bakuli, ni ba ba mwa butata bo buñwi. (Liproverbia 3:27, 28; Jakobo 2:15, 16) Ku fana ko ku cwalo ki kona ko ku tabisa Mulimu. Sihulu ku tahiswa ki ku lata hahulu Mulimu ni ku ba ni takazo ye tuna ya ku likanyisa musa wa hae ni moya wa hae wa ku fana.—Mateu 5:44, 45; Jakobo 1:17.

Muapositola Joani n’a koñomekile kalulo ya butokwa yeo ya ku fana ha n’a buzize kuli: “Mutu h’a fumile tutu ya lifasi, mi a bona mwanahabo a tokwa se siñwi, mi a mu kwalela pilu ya hae, fo, lilato la Mulimu li inzi cwañi ku yena?” (1 Joani 3:17) Kalabo ya iponahaza. Lilato la ku lata Mulimu li susumezanga batu ku fana. Mulimu u lata hahulu bafani sina yena mi u ba fanga mupuzo. (Liproverbia 22:9; 2 Makorinte 9:6-11) Kana moya wa ku fana o cwalo lwa u bonanga kacenu? Mu nyakisise se ne si ezahezi mwa puteho ye ñwi ya Lipaki za Jehova cwanoñu fa.

Ndu ya musali yo muñwi wa musupali wa Sikreste ne i tokwa hahulu ku lukiswa. N’a pila a nosi mi n’a si na lubasi lo ne lu kona ku mu tusa. Mwa lilimo ze n’e fitile, ndu ya hae yeo ne i itusiswanga kwa mikopano ya Sikreste, mi n’a abananga lico za hae ni be ne ba amuhelanga memo ya hae kaufela. (Likezo 16:14, 15, 40) Ha ne ba boni butata bwa hae, ba mwa puteho ba swalisana mi ba mu tusa. Ba bañwi ne ba zwisize mali, mi ba bañwi bona ne ba sebelisize m’ata a bona. Mwa mazazi a’ sikai, baitateli ne ba yahile situwa se sinca, ku beya matapelo a manca, ku lila mamota kaufela a mizuzu ya fafasi ni ku a penda, ni ku beya likabati ze nca mwa liapeelo. Ku fana kwa bona ne ku tusize musali y’o, mi ne ku tahisize  kuli puteho i swalisane, mi hape ne ku bonisize be ne ba pila bukaufi mutala wa ku fana kwa niti kwa Sikreste.

Linzila za ku tusa ba bañwi ka zona ki ze ñata. Kana lwa kona ku tanda nako ni ndiala? Kana lwa kona ku leka-lekela lika kamba ku lukela liapalo mbelwa yo muñwi ya supezi ye lu ziba? Kana lwa kona ku apeela mutu yo muñwi ya si na hande mali a lico kamba ku mu fa mali? Ha lu tokwi ku ba bafumi kuli lu kone ku tusa. Muapositola Paulusi n’a ñozi kuli: “Ku lata ha ku li teñi mwa pilu, mutu u lumelelwa ka s’a sweli, isi ka s’a tokwile.” (2 Makorinte 8:12) Kono kana ku fana ko ku cwalo, ku fa yena mutu ka sibili, ki kona fela ku fana k’o Mulimu a ka fuyaula? Kutokwa.

Ku Tusa ka Tukiso Bo?

Fokuñwi, ku eza lika mutu a nosi ha ku si ka likana. Mane, Jesu ni baapositola ba hae ne ba na ni sikwama sa babotana, mi ne ba amuhelanga linubu ze ne ba fiwanga ki batu be ne ba katananga mwa musebezi wa bona. (Joani 12:6; 13:29) Ka nzila ye swana, liputeho za kwa makalelo ne li amuhelanga linubu ha ne ku tokwahala cwalo mi ne li lukisanga lituso ze ñata.—Likezo 2:44, 45; 6:1-3; 1 Timotea 5:9, 10.

Ne ku ezahezi cwalo ibat’o ba ka 55 C.E. Liputeho za mwa Judea ne li kenezwi ki bubotana, mwendi kabakala nako ya tala ye tuna ye n’e sa z’o fela. (Likezo 11:27-30) Muapositola Paulusi ya n’a iyakatwanga babotana kamita, n’a kupile tuso kwa liputeho ze kwahule ze cwale ka za kwa Masedonia. Yena ka sibili n’a lukisize za koleko mi n’a lumile banna ba ba swanela kuli ba y’o i fitisa. (1 Makorinte 16:1-4; Magalata 2:10) Yena ni ba bañwi be ne ba ezize musebezi w’o ne ba si ka lifiwa.—2 Makorinte 8:20, 21.

Lipaki za Jehova ni bona kacenu ba tabelanga ku tusa ha ku ba ni kozi. Ka mutala, mwa mbumbi ya silimo sa 2001, mwa Houston, Texas, mwa U.S.A., ne ku bile ni munda. Mandu a Lipaki a’ 723 n’a sinyehile, mi buñata bwa ona n’a sinyehile hahulu. Honaf’o, kwa tomiwa katengo ka tuso, ka maeluda ba Sikreste ba ba hulile kwa moya, kuli ba bone butokwi bwa mañi ni mañi ni ku fa mali a ku tusa ka ona Lipaki ba mwa sibaka seo a ku sebelisa ni ku lukisisa mandu a bona. Musebezi kaufela ne u ezizwe ki baitateli ba mwa liputeho ze fakaufi. Paki yo muñwi n’a itebuhile hahulu tuso yeo kuli mane kampani ye lifelanga lisinyehelo za batu ha ne i mu file mali a ku lukisisa ndu ya hae, n’a fanile mali ao honaf’o kwa katengo ka tuso ilikuli a kone ku tusa ba bañwi be ne ba tokwa tuso.

 Kono ha ku taha ku za ku fana ka tukiso, lu tokwa ku tokomela kuli lwa tatubisisa hande likupo ze lu amuhela. Likopano ze ñwi li itusisa mali a mañata hahulu ku za tamaiso kamba kwa ku kupa lituso ni ku siya mali a manyinyani fela a’ peta mulelo wa zona wa luli. Liproverbia 14:15 i li: “Sikuba si lumela taba kaufela; kono ya na ni ngana u talimisisa mw’a hata.” Kacwalo ku tatubisisa litaba ka tokomelo ku butokwa.

Ku Fana Ko Ku Tusa ka ku Fitisisa

Ku na ni ku fana ko kuñwi kwa butokwa hahulu ku fita ku tusa fela babotana. Jesu n’a bulezi ka za teñi ha n’a buzizwe ki mutangana ya n’a fumile kuli n’a tokwa ku eza cwañi kuli a fumane bupilo bo bu sa feli. Jesu n’a mu bulelezi kuli: “U lekise z’o luwile, u li abele babotana, mi u ka ba ni bufumu kwa lihalimu; hape u tahe, u ni latelele.” (Mateu 19:16-22) Mu lemuhe kuli Jesu n’a si ka bulela fela kuli, ‘U tuse babotana mi u ka fumana bupilo.’ Kono n’a bulezi hape kuli, “U ni latelele.” Seo si talusa kuli, ku tusa babotana niha ku li ko kunde, ko ku tusa, ku ba mulutiwa wa Sikreste ku ama ze ñata.

Sa n’a iyakatwa hahulu Jesu ki ku tusa batu kwa moya. Ha n’a tuha a shwa, n’a bulelezi Pilato kuli: “Ki sona se ni pepezwi, ni se ni tezi mwa lifasi; kuli ni t’o paka niti.” (Joani 18:37) Niha n’a etelela mwa ku tusa babotana, ku folisa bakuli, ni ku fepa ba ba lapile, nto ya pili ya n’a lutile Jesu balutiwa ba hae ki ku kutaza. (Mateu 10:7, 8) Mane, kwa manzwi a hae a mafelelezo ku bona, n’a ba laezi kuli: “Mu ye cwale, mu lute macaba kaufela.”—Mateu 28:19, 20.

Ki niti kuli ku kutaza ha ku na ku tatulula matata kaufela a mwa lifasi. Kono ku taluseza batu kaufela taba ye nde ya Mubuso wa Mulimu ku tahisa tumbo ku Mulimu kakuli ku kutaza ku peta tato ya Mulimu ni ku konahalisa kuli bote ba ba utwa taba ya Mulimu ba fumane lituso za ku ya ku ile. (Joani 17:3; 1 Timotea 2:3, 4) Muta o tatama Lipaki za Jehova ha ba ka to mi potela, ite mu teeleze ku ze ba ka bulela. Ba lwezi mpo ya kwa moya. Mi ba ziba kuli k’o ki kona ku fana ko kunde ka ku fitisisa.

[Maswaniso a fa likepe 6]

Ku na ni linzila ze ñata za ku bonisa ka zona buiyakato bwa luna

[Siswaniso se si fa likepe 7]

Ku shaela taba ye nde kwa luna ku tabisa Mulimu mi ku konahalisa kuli lituso za ku ya ku ile li fumanwe