Mu Ikemele mi Mu Bone Mw’a Piliseza Jehova!
Mu Ikemele mi Mu Bone Mw’a Piliseza Jehova!
“Mu itukise mi mu ikemele, mu ka bona mw’a piliseza [Muñ’a] Bupilo ye mu inzi ni Yena.”—2 MAKOLONIKA 20:17.
1, 2. Ki kabakalañi twaniso ye taha ya “Gogo, kwa naha ya Magogo” ha i li ye tuna ku fita ya likezo za businyi za mwa linaha?
LIKEZO za businyi ze mbemukisa li talusizwe ki ba bañwi kuli ki ku lwanisa batu ba mwa lifasi, mane ni yona zwelopili ka sibili. Ka ku utwahala, likezo ze cwalo ha li lukeli ku keshebiswa. Kono ku na ni twaniso ye tuna ni ku fita yeo batu ba mwa lifasi ba sa isezi pilu. Ki twaniso mañi?
2 Ki twaniso ya “Gogo, kwa naha ya Magogo,” ye bulelwa mwa Bibele, kwa Ezekiele kauhanyo 38. Kana ku bulela kuli twaniso yeo ki ye tuna ku fita likezo za businyi za mwa linaha, ki ku shangela litaba? Kutokwa, kakuli twaniso ya Gogo ha i lwanisi fela milonga ya butu. I lwanisa ni mulonga wa Mulimu wa kwa lihalimu! Kono ka ku sa swana ni batu, ba ba kana ba palelwa ku tiyela ku lwaniswa kwa mibuso ya bona, Mubupi yena wa kona ku taka twaniso ye tuna ya Gogo.
Ku Lwanisa Mulonga wa Mulimu
3. Babusi ba lifasi ba memilwe ku ezañi ku zwa ka 1914, mi ba ezize cwañi?
3 Ndwa ye mwahal’a Mulena ya busa cwale, ya ketilwe ki Mulimu, ni muinelo o maswe wa Satani se i zwezipili ku kolota ku kala ka 1914, fo ne u tomezwi Mubuso wa Mulimu kwa lihalimu. Ka nako yeo, babusi ba butu ne ba filwe temuso ya ku ipeya kwatas’a Mubusi ya ketilwe ki Mulimu. Kono ba hanile ku eza cwalo, ka mo ne ku polofitezwi kuli: “Malen’a lifasi ba lumelelani, ni bazamaisi ba kopani ku lelisana, mo ba ka lwaniseza [Muñ’a] Bupilo ni Mutoziwa wa hae; ba li: A lu pume mawenge a bona, lu nepele kwahule matamiso a bona.” (Samu 2:1-3) Kaniti, ku hana puso ya Mubuso ku ka fela ka nako ya twaniso ya Gogo wa Magogo.
4, 5. Batu ba kona ku lwanisa cwañi mulonga wa Mulimu wa kwa lihalimu, o sa bonahali?
4 Lu kana lwa komoka kuli batu ba kona ku lwanisa cwañi mulonga wa kwa lihalimu, o sa bonahali. Bibele i talusa kuli mwa mulonga w’o, ku na ni “ba ba eza 144,000, ili ba ba liuluzwi mwa lifasi,” hamoho ni “Ngunyana,” yena Kreste Jesu. (Sinulo 14:1, 3; Joani 1:29) Ka ku ba kuli mulonga o munca w’o u kwa lihalimu, u bulelwa kuli ki “lihalimu le linca,” mi ka ku utwahala, babusiwa ba ona ba fa lifasi ba bizwa kuli ki “lifasi le linca.” (Isaya 65:17; 2 Pitrosi 3:13) Buñata bwa bacalifa ni Kreste b’a 144,000 se ba felize bupilo bwa bona bwa fa lifasi ka busepahali. Kacwalo, ba bonisize kuli b’a swanela ku kala sebelezo ya bona ye nca ya kwa lihalimu.
5 Kono ku b’a 144,000 bao, ku sa na ni b’a sikai ba ba siyezi fa lifasi. Kwa batu ba ba fitelela 15,000,000 be ne ba fumanehile kwa mukiti wa Mulalelo wa Mulena ka 2002, ki b’a 8,760 fela be ne ba bonisize kuli ba na ni sepo ya kuli ba ketilwe ku fiwa musebezi wa kwa lihalimu w’o. Ufi kamba ufi ya ipa ku lwanisa bomasiyaleti bao ba ba ka ba lilama za Mubuso, kaniti u lwanisa Mubuso wa Mulimu.—Sinulo 12:17.
Mulena U Ya kwa ku Tula
6. Jehova ni Kreste b’a nga cwañi ku lwaniswa kwa batu ba Mulimu?
6 Z’a eza Jehova ka za ku lwaniswa kwa Mubuso wa hae o tomilwe ne li polofitilwe, kuli: “Ya inzi mwa lihalimu wa ba nyaziseza; [Muñ’a] Bupilo wa ba seha. Kih’a bulela ni bona inz’a halifile, a ba sabisa ka ku nyema kwa hae; a li: Ni tomile mulen’a ka Fa Sione, lilundu la ka le li kenile.” (Samu 2:4-6) Nako cwale i fitile ya kuli Kreste, ka ketelelo ya Jehova, a ‘ye kwa ku tula.’ (Sinulo 6:2) Jehova u’ nga cwañi ku lwaniswa kwa batu ba hae mwa nako ya tulo ya mafelelezo? U nga kuli yena ka sibili ni Mulena y’a ketile ku busa ki bona ba ba lwaniswa. Jehova u li: “Ya mi ngunyuta, u ngunyuta taku ya liito la [ka, NW].” (Zakaria 2:8) Mi Jesu n’a koñomekile kuli ze ba eza batu kamba ze ba sa ezi kwa banyani ba hae ba ba tozizwe li eziwa kamba ku sa eziwa ku yena.—Mateu 25:40, 45.
7. Ki kabakalañi ba “buñata bo butuna bwa batu” ba ba bulezwi kwa Sinulo 7:9 ha ba tukelwa ki buhali bwa Gogo?
7 Kaniti, ba ba yemela bomasiyaleti ba ba tozizwe ni bona ba ka tukelwa ki buhali bwa Gogo. Bona bao ba ba ka ba lilama za “lifasi le linca” la Mulimu ki “buñata bo butuna bwa batu” ba ba “zwa mwa macaba kaufela, ni mwa mishobo, ni mwa masika, ni mwa lipuo kaufela.” (Sinulo 7:9) Ba taluswa kuli ba “yemi fapil’a Lubona ni fapil’a Ngunyana, ba apezi likubo ze sweu.” (Sinulo 7:9) Kacwalo, ku Mulimu ni Kreste, ba kenile. Ka ku swala “nzalu mwa mazoho a bona,” ba bonisa kuli Jehova ki yena ya swanela ku busa pupo kaufela, mi puso ya hae i boniswa ka puso ya Mulena y’a ketile ku ba fa lubona, yena Jesu Kreste, “Ngunyan’a Mulimu.”—Joani 1:29, 36.
8. Twaniso ya Gogo i ka tahisa kuli Kreste a ezeñi, mi ki lifi ze ka zwa mwateñi?
8 Twaniso ya Gogo i ka tahisa kuli Mulena ya ketilwe ki Mulimu a lwane ndwa ya Armagedoni. (Sinulo 16:14, 16) Ba ba hanile ku amuhela bubusi bwa Jehova ba ka sinyiwa. Kono ba ba tiyezi nyandiso kabakala ku yemela Mubuso wa Mulimu bona ba ka fumana kimululo ya ku ya ku ile. Muapositola Paulusi n’a ñozi ka za seo, kuli: “Zeo ki sisupo sa katulo ya Mulimu, ye lukile; kuli mu be ba ba lukela mwa mubuso wa Mulimu, o mu utwa butuku kabakala ona. Kakuli ku lukile Mulimu h’a kutiseza ñalelwa ku ba ba mi kaleliswa; mi mina ba ba kaleliswa, mu fiwe pumulo ni luna, nako y’a ka bonahala Mulena Jesu, a zwa kwa lihalimu ni mangeloi a mata a hae, mwa malimi a mulilo; kuli a nate ka koto ba ba sa zibi Mulimu, ni ba ba sa ipeyi kwatas’a Evangeli ya Mulena Jesu.”—2 Matesalonika 1:5-8.
9, 10. (a) Jehova n’a konisize cwañi Juda ku tula sila se si m’ata? (b) Bakreste kacenu ba lukela ku zwelapili ku ezañi?
9 Mwa ñalelwa ye tuna ye taha, ye ka fela fa Armagedoni, Kreste u ka lwanisa bumaswe kaufela. Kono balateleli ba hae ha ba na ku tokwa ku lwana, sina mo ne ku bezi ku ba mishobo ye mibeli ya Juda lilimo ze likiti-kiti kwamulaho. Ndwa ne li ya Jehova, mi n’a file tulo. Taba i li: “[Muñ’a] Bupilo kih’a teisa Maamoni, ni Mamoabi, ni ba kwa lilundu la Seiri, ba ba ne ba li ba pumele Juda; mi ba komwa maswe. Bana ba Amoni ni Mamoabi ba itwanisa ni batu ba kwa lilundu la Seiri, ku ba feza ku ba bulaya; mi ha ba se ba felize ku bulaya ba kwa Seiri, ba ipetuhela ili bona. Majuda ha ba fita fo ku lumbile, fo li bonahala lihalaupa, ba talima kwa neku la mpi ye tuna ya lila; kiha ba bona litupu ze lapalezi fafasi, ku si na mutu ya pila.”—2 Makolonika 20:22-24.
10 Ne ku li fela sina mwa n’a polofitezi Jehova kuli: “Ha mu na ku tokwa ku lwana.” (2 Makolonika 20:17) W’o ki mutala o ba ka latelela Bakreste, Jesu Kreste h’a ka ‘ya kwa ku tula.’ Kono ka nako ye, ba zwelapili ku lwanisa bumaswe, isi ka lilwaniso za luli, kona ka lilwaniso za kwa moya. Ka ku eza cwalo, ba ‘tula bumaswe ka bunde.’—Maroma 6:13; 12:17-21; 13:12; 2 Makorinte 10:3-5.
Ki Mañi Ya ka Etelela mwa Ndwa ya Gogo?
11. (a) Gogo u ka itusisa likopano mañi kwa ku peta twaniso ya hae? (b) Ku tona kwa moya ku amañi?
11 Gogo wa kwa magogo u taluswa ku ba Satani Diabulosi ku zwa ka 1914, ha n’a kokobelizwe. Ka ku ba sibupiwa sa moya, h’a koni ku lwana luli ndwa ya hae, kono u ka itusisa likopano za butu kwa ku peta likezo za hae. Zona likopano zeo li ka ba lifi? Bibele ha i lu fi litaba mwa butungi, kono ya lu fa lisupo ze ñwi ze kona ku lu tusa ku ziba kuli li ka ba lifi. Lika ha li nze li ezahala mwa lifasi ka ku taleleza bupolofita bwa Bibele, lu ka fita fa ku ziba hande lika. Batu ba Jehova ba pimanga ku kabangisa, kono ba zwelapili ku tona kwa moya, inze ba ziba litaba za bupolitiki ni za bulapeli ze zamaelela ni talelezo ya bupolofita bwa Bibele.
12, 13. Mupolofita Daniele n’a polofitile cwañi ka za ku lwaniswa kwa mafelelezo kwa batu ba Mulimu?
12 Mupolofita Daniele u fa litaba ze ñwi ka za ku lwaniswa kwa mafelelezo kwa batu ba Mulimu, kuli: “[Mulena wa kwa Mutulo] u ka kuta a halifile hahulu, ku y’o bulaya ni ku sinya ba bañata. F’a ka tibelela, mwa litende za hae za bulena, ki mwahal’a mawate ni lilundu le li tumile, le li kenile.”—Daniele 11:44, 45.
13 Mwa linako za ze ñozwi mwa Bibele, “mawate” ne li Liwate le Lituna, kamba Liwate la Mediteranea, mi “lilundu le li tumile” ne li Sione, yeo Jehova n’a bulezi ka za yona kuli: “Ni tomile mulen’a ka Fa Sione, lilundu la ka le li kenile.” (Samu 2:6; Joshua 1:4) Kacwalo, ka kutwisiso ya kwa moya, naha ye “mwahal’a mawate ni lilundu le li tumile” i yemela muinelo o munde wa kwa moya wa Bakreste ba ba tozizwe. Ha ba sa swalisaniswa ni liwate la batu ba ba kauhani ni Mulimu, mi ba libelela nako ya kwapili ha ba ka busa ni Kreste Jesu mwa Mubuso wa kwa lihalimu. Kaniti, batanga ba Mulimu ba ba tozizwe, hamoho ni balikani ba bona ba ba sepahala ba lingu ze ñwi, ki bona ba ba ka lwaniswa ki mulena wa kwa mutulo h’a ka kalisa ndwa ya hae ye buhali ka ku taleleza bupolofita bwa Daniele.—Isaya 57:20; Maheberu 12:22; Sinulo 14:1.
Batanga ba Mulimu Ba Ka Eza Cwañi?
14. Ki lika mañi ze talu ze ba ka eza batu ba Mulimu ha ba ka lwaniswa?
14 Batanga ba Mulimu ba ka libelelwa ku ezañi ha ba ka kala ku lwaniswa? Hape, ba ka eza mo ne si ezelize sicaba sa Mulimu mwa mazazi a Josafati. Mu lemuhe kuli sicaba seo ne si laezwi ku eza lika ze talu: (1) ku itukisa, (2) ku ikemela, ni (3) ku bona mw’a piliseza Jehova. Batu ba Mulimu kacenu ba ka latelela cwañi manzwi ao?—2 Makolonika 20:17.
15. Ku itukisa kwa batu ba Jehova ku talusañi?
15 Ba itukise: Batu ba Mulimu ba ka zwelapili ka ku tiya mwa mayemo a bona a ku yemela Mubuso wa Mulimu. Ba ka zwelapili mwa buikambuso bwa Sikreste. Ba ka ‘tiya, ba sa zikinyehi’ mwa ku sebeleza Jehova ka busepahali, mi ba ka zwelapili ku lumbeka Jehova patalaza kabakala sishemo sa hae. (1 Makorinte 15:58; Samu 118:28, 29) Ha ku na sineneketo ya cwale kamba ya kwapili ye ka ba fulalelisa mayemo a bona ao a’ tabelwa ki Mulimu.
16. Batanga ba Jehova ba ka ikemela ka nzila ifi?
16 Ba Ikemele: Batanga ba Jehova ha ba na ku lika ku itwanela kono ba ka sepa Jehova ka ku tala. Ki yena fela ya kona ku yangwela batanga ba hae kwa mifilifili ya lifasi, mi u sepisize ku eza cwalo. (Isaya 43:10, 11; 54:15; Malilo 3:26) Ku sepa Jehova ku ka kopanyeleza ni ku sepa nzila ye bonahala ya s’a itusisize ka lilimo-limo kwa ku peta milelo ya hae. Ku fita haisali, Bakreste ka nako yeo ba ka tokwa ku sepa balapeli ba bañwi bao Jehova, ni Mulena y’a ketile, ba file ku etelela. Banna ba ba sepahala bao ba ka etelela batu ba Mulimu. Ku sa isa pilu kwa ketelelo ya bona ku kona ku tahisa kozi.—Mateu 24:45-47; Maheberu 13:7, 17.
17. Ki kabakalañi batanga ba Mulimu ba ba sepahala ha ba ka bona puluso ya Jehova?
17 Ba bone mw’a piliseza Jehova: Bote ba ba zwelapili ku ba Bakreste ba ba sepahala ili ba ba sepa kuli Jehova u ka ba pilisa, ba ka puluswa. Ka mo ba konela kaufela, ni ku isa kwa mafelelezo, ba ka zibahaza ku taha kwa lizazi la Jehova la katulo. Pupo kaufela i lukela ku ziba kuli Jehova ki yena Mulimu wa niti ni kuli u na ni batanga ba ba sepahala fa lifasi. Ha ku sa na hape ku tokwahala kuli kañi ya za tukelo ya bubusi bwa Jehova i zwelepili.—Ezekiele 33:33; 36:23.
18, 19. (a) Pina ya tulo ye kwa Exoda kauhanyo 15 i bonisa cwañi maikuto a ba ba ka punyuha twaniso ya Gogo? (b) Ki nto mañi ye ba swanela ku eza batu ba Mulimu cwale?
18 Batu ba Mulimu ba ka kena mwa lifasi le linca ni m’ata a uncafalizwe, ba lakaza ku opela pina ya tulo, sina mo ne ba ezelize Maisilaele ba kwakale ha se ba pulusizwe mwa Liwate le Lifubelu. Ka ku itebuha kamita silelezo ya Jehova, ka buñwi ni ka sikwata, ba ka kutela ku bulela manzwi a kwakale a’ li: “Ni ka opelela [Muñ’a] Bupilo, kakuli u fenyize ka bulena . . . [Muñ’a] Bupilo ki ndume wa ndwa, [Muñ’a] Bupilo ki lona Libizo la hae. . . . Lizoho la hao la bulyo, [Muñ’a] Bupilo, li tubahanyize sila. Ka butuna bwa bulena bwa hao u komile ba ba ikuhumuselize Wena, u ba nepile ka buhali bwa hao, mi bu ba cisize inge matakala. . . . Ka sishemo sa hao wa zamaisa sicaba s’o liuluzi; ka mata a hao wa y’o si kenya mwa Sibaka sa hao se si kenile. . . . U ka ba kenya, u ba cale fa lilundu la buswa bwa hao, mwa Sisa s’o ikezelize kuli u ine mwateñi, Wena [Muñ’a] Bupilo, sona Sibaka se si kenile, se si tiisizwe ki mazoho a hao Mulena. [Muñ’a] Bupilo ki Yena ya ka busa kamita, ni ku ya ku ile.”—Exoda 15:1-19.
19 Cwale ka ku ba kuli sepo ya bupilo bo bu sa feli se i tiile ku fita lili kaufela, ki nako ye nde hakalo kwa batanga ba Mulimu ku bonisa buipeyo bwa bona ku Jehova ni ku tiiseza mwa tukufalelo ya bona ya ku mu sebeleza, yena ka ku ba Mulena wa ku ya ku ile!—1 Makolonika 29:11-13.
Kana Mwa Kona ku Talusa?
• Ki kabakalañi Gogo h’a ka lwanisa batoziwa ni lingu ze ñwi?
• Batu ba Mulimu ba ka itukisa cwañi?
• Ku ikemela ku talusañi?
• Batu ba Mulimu ba ka bona cwañi mw’a piliseza Jehova?
[Lipuzo za Tuto]
[Siswaniso se si fa likepe 18]
Jehova n’a file Josafati ni batu ba hae tulo, bona ba sa tokwi ku lwana
[Siswaniso se si fa likepe 20]
Batoziwa ni lingu ze ñwi ba abana mwa ku yemela bubusi bwa Jehova bo bu pahami
[Siswaniso se si fa likepe 22]
Sina Maisilaele ba kwakale, batu ba Mulimu ba tuha ba opela pina ya tulo